Afmæli

Kan det bli finare?? Denne genseren ligg som gratisoppskrift her, og har det blitt strikka i eit utal fargekombinasjonar. Ifølgje Google Translate betyr det islandske ordet Afmæli bursdag på norsk, og det passar bra- for denne genseren er ei bursdagsgåve. (Mottakar fekk lov til å velje seg ein genser eg skulle strikke.)

Genseren er strikka i str M i dei originale fargane i Lettlopi: Black sheep, Ligth beige heather, Bottle green heater, Violet heater, Stone blue heather, Celery green heater, Golden heater, Rust heater og Brick heater. 

Eg brukte pinnar nummer 3,5 på vrangbordene og 4,5 på resten.

Weatherman

Eg er veldig glad i rein ull, og både norsk og islandsk garn står høgt på favorittlista. Denne genseren er av islandsk design og heiter Veurfringurinn/Weatherman.

Genseren er strikka i Lettlopi. Botnfargen heiter Chocolate heather nr 0867. I tillegg er det heile seks mønsterfargar: Murkey (nr 1420), Oatmeal Heather (nr 0085), Ash Heather (nr 0056), Light Beige Heather (nr 0086), Light Ash Heather (nr 0054) og White (nr 0051). Eg kjøpte garnpakke her, men eg bytta ut Black Sheep- som eigentleg skulle vere hovudfargen,

Eg strikka den største storleiken (XL), så den er i største laget til elleveåringen- det er altså ikkje ho som skal bruke genseren. Vrangbordene er strikka på pinnar nummer 3,5, resten på pinnar nummer 4,5. 

Det gjekk med akkurat ni nøster av botnfargen. Og berre litt av dei andre fargane.

Kosegenser

Dette er ein Kosegenser. Oppskrifta er henta frå boka "Garnglede i Rosendal", og originalgarnet er Fritidsgarn frå Sandnes. 

Eg gjorde ein vri, sidan eg har ein del garn på lager (kremt): eg strikka med ein tråd Lettlopi og ein tråd Pickles pure wool. Lettlopi-fargen heiter Rust heather (nr 9427). Pickles-garnet heiter Høstløv og har nummer 115. Begge fargane er kjempefine åleine og saman vart dei endå finare! 

Mønsteret er strikka i lys grått Fritidsgarn. Heile genseren er strikka på pinnar nummer seks. Storleiken er M/L. 

Restevottar

Her vart det eit par kjappe vottar, strikka av restegarn etter Henniegenseren. Eg brukte pinnar nummer seks og tova dei på kortvask, førti grader. Garnet er altså Lettlopi.

Hennie

Det er noko eige med islandsk ull! Denne genseren heiter Hennie og er strikka i Lettlopi. Oppskrift og garn er kjøpt hos garnmani.no. Eg valde å bruke fargane som er brukt i jakkeversjonen.

Eg strikka str Large. Genseren er strikka frå halsen og ned.