Flora og Vimselue

Luer er eigentleg raskt strikk. Men desse to strikkepakkane har eg hatt liggande sidan eg kjøpte dei på strikkefestivalen i Bergen hausten 2017.... 

Dette er Flora frå Knit Me. Den er strikka av Knit Me Merino på pinnar nummer 3,5. Mønsteret er veldig enkelt og litt tidkrevjande- men det vart veldig fint! 

Lue nummer to heiter Vimselue, også den er frå Knit Me. Garnet også i denne er Knit Me Merino, og her er det altså to rosafargar. Flettemønsteret er slett ikkje vanskeleg, men veldig tidkrevjande. Fint blei det i alle fall! 

Dusken er festa med ein trykk-knapp. Eg strikka str 3-6 år. 

Gul lue

Eg sat igjen med ein del garn etter å ha strikka Norsk skoggenser. Nytta høvet til å strikke ei gul lue. Pinnar nummer seks, dobbel tråd Rauma finullgarn- det gjekk unna i ein fei.

Grå lue

Garnet Lun Ull frå Sandnes har eg ikkje prøvd før. Førsteinntrykket er godt og garnet passa veldig godt til dette lueprosjektet. Tiåringen bestilte lue til ein lærar, som hadde bursdag no i desember.

Eg la opp 80 maskar på pinnar nummer fem og strikka ein rett og ein vrang nokre centimeter. Bytta etter kvart til pinne nummer 5,5 og heldt fram med vrangbordstrikk. Felte av litt på måfå.

Eg brukte akkurat 50 gram garn, og lua sat visst som eit skot på mottakaren. Nummeret på fargen er 4254.

Lue i nytt garn

Det dukkar stadig opp nye garnsortar og eg rekk ikkje å prøve alle. Men Kos frå Sandnesgarn måtte eg berre teste! For mjukare garn skal du leite lenge etter. Eg kjøpte to nøster gråmelert (farge 1043) for å strikke ei lue. 

Garnet inneheld babyalpakka, ull og nylon. Eg brukte pinne nummer 5,5 og strikka ei lang vrangbord, heldt fram med glattstrikk og felte så i løpet av nokre omgangar.

Resultatet vart ei veldig mjuk lue. Men eg synest ikkje det nye garnet var så veldig godt å strikke av, det sat liksom litt fast i pinnen. Men det er veldig drygt, eg brukte berre 50 gram til denne lua. 

Og som vanleg: Tarzan, som nyleg fylte ti år, blir gjerne med når det skal takast bilde tl bloggen.

Dress, lue, vottar og sokkar

Ikkje så store plagg, men dette vart ein del pirkearbeid.  Alle plagga er inspirert heilt eller delvis av Klompelompe-oppskrifter.

Lua er Vinterkonglelue frå den siste Klompelompeboka, men mønsterborda er henta frå dressen.

Vottar med litt annleis vrangbord.

Sokkar med rillestrikk under foten.

Klompelompedressen skal eigentleg strikkast i fire fargar, men eg har, etter ønske frå mottakar, brukt berre tre: mørkegrå, lysegrå og natur.

Alt er strikka i ca str 3-6 mnd.  Eg har brukt Lanett frå Sandnes og pinnar nr 3.

Ein liten løyndom på vranga: fine ugleband for å skjule sårkanten på knappestolpane.

Lothepus igjen

Denne lua rakk eg berre å knipse nokre raske mobilbilde av, før den forsvann ut døra på veg til mottakaren.

Lothepuslua er strikka i Pure Eco Wool på pinnar nummer fire. Eg la opp 96 maskar. 

Oppskrifta finn du her.

Detaljar....

Rosa Lothepuslue

Denne Lothepuslua er strikka i to gråfargar, to rosafargar og ein liten rest lilla.  Eg la opp 88 maskar på pinnar nr 4.  Strikka i originalgarnet Dale Pure Eco Wool.

Lue med vrange slangar

Det dukka opp eit behov for ei gåve til ein gut.  Då vart denne lua til, strikka i økologisk ull frå Dale på pinnar nr 4. Eg brukte tre fargar: blått, grått og grønt.

Eg la opp 90 maskar og strikka vrangbord ein rett, ein vrang. Så auka eg ti maskar og strikka sju omgangar rett med blått. Så ein omgang rett og fire omgangar vrangt med grønt.  Byta mellom grønt og grått på desse vrange partia.

Åtteåringen synest dei grå og grøne partia ser ut som slangar.

Alle skal få!

Om eg kunne strikke Lothepusluer til alle jentene i tredje klasse...?  Klart eg kunne! Heldigvis er det berre fem jenter i klassa til åtteåringen, og sidan ho allereie hadde fått ei Lothepuslue, var det berre å strikke fire til.   Alle luene er strikka i originalgarnet Dale Pure Eco Wool på pinnar nr 4. Ei lue fekk koksgrå som hovudfarge og lys lilla som kantfarge.

Denne har lys grå som hovudfarge og lys lilla som kantfarge.

Her er det lilla kantfarge og grå som hovudfarge.

Denne har lys rosa kantfarge og sandbeige som hovudfarge.

På alle luene la eg opp 96 maskar. 

Oppskrifta er gratis frå Dale, her hos TV2 finn du den.

Lothepuslue

Åtteåringen anar ikkje kven Lothepus er.  Eg veit ikkje så mykje om han eg heller, men har fått med meg at han har mange fine strikkaplagg, til dømes i Kjendis Farmen.  Dette er altså ei Lothepuslue, strikka på pinnar nummer 4 i originalgarnet Dale Pure Eco Wool.

"Mamma, heiter lua LODDEN KATT, eller noko sånt..?", spurde ho, etter at ein lærar hadde kommentert lua.  Tja, to sider av same sak...?

Ekstremt dårlege bilde- seier meg lei for det- dei er tekne under eit gatelys på veg til skøyteisen.  Elles likte eg garnet veldig godt. Nydeleg å strikke av, og med pinnar nummer fire går det raskt unna.  Eg la opp 96 maskar i staden for 120, for at det skulle passe eit barnehovud.

Raskt babysett

Angoragarnet frå Nøstebarn er noko av det mjukaste eg veit. I denne jakka har eg strikka med ein tråd angoragarn og ein tråd totråds merinoull, også frå Nøstebarn.

Jakka er i str 3 månader.  Det vart eit litt uroleg uttrykk av meleringa, men eg håper mottakaren synest den er ok. Varm og mjuk er den i alle fall!

Eg strikka også ei lita lue til, berre i lilla. Både den og jakka er strikka på pinnar nr 4, så det gjekk raskt unna.

Oppskrifta er henta frå boka Strikk meir til Nøstebarn.

Regnbogelue (i alle fall starten på ein regnboge..)

Mottakaren av denne regnbogekjolen ville gjerne ha ei matchande lue. Resultatet vart altså denne lua.

Lua er strikka i grå DROPS baby merino og regnbogefarga Kauni. Eg kom ikkje så langt i fargeskifta, naturleg nok.   Vrangborda er strikka på pinnar nr 2,5, resten på pinnar nr 3