KALLATTIIN, US waraana Iraaniif baasiin baaste dolaara bil. 43 caale - Gabaasa

Haguuggii Tamsaasa Kallattii

1. 20 Fuulbaana 2026Ertiraan US qoqqobbii irraa kaasuu fuula gaariin simatte

   

   Madda suuraa, Reuters

   Bulchiinsi Pirezidaant Donald Tiraamp qoqqobbii humna Ittisaa Ertiraa fi dhaabbilee biyyattii tokko tokkorra kaa'amee ture kaasuu beeksiseera.

   Qoqqobbiin kuni yeroo waraana Kaaba Itoophiyaa badii raawwateen walqabatee kan kaa'ame ture.

   Tarkaanfiin kun kan dhaga'ame yeroo waraanni Baha Giddugaleessaa babal'achaa jiruu fi xiyyeeffannoon addunyaa Galaana Diimaa irratti dabalaa jirutti.

   Dhimma kanarratti kan gaafataman Ministirri Odeeffannoo Ertiraa Yamaana G/Masqal durumaa qoqqobbiin kuni sababii gahaa malee kaa'ame jedhan.

   Dabaluunis, qoqqobbiin kaa'ame biyya isaanii miidhuu dubbatan.

   ''Tarkaanfii sirreeffamaa bulchiinsa Tiraampiin [kenname] ni simanna,'' jechuun AP'tti dubbachuun gabaafameera.

   Ameerikaan qoqqobbii sababa waraana Tigraayin Ertiraarra keessee turte kaaste

2. 20 Fuulbaana 2026Arsenaal maaltu qunname?

   

   Madda suuraa, getty

   Dorgommiin Piriimeerliigii Ingiliz baranaa erga eegalee Arsenaal tapha Sambata Biraayitan waliin taasiseen 3-0dhaan mo'amuu osoo hin taane, gahuumsa gadaanaa kan itti agarsiisedha.

   Arsenaal baranas waancaa kan irraa fudhatu hin jiru osoo jedhamuu Biraayitaniin akka hin taanetti mo'ame. Arteettaan gahuumsa taphattoota isaatti baay'ee gadduu ibse.

   Taphattoonni Biraayitan "teenyee akka of ilaalluuf hojii manaa cimaa nuuf kennan" jedhe taphicha booda yaada kenneen.

   'Biraayitan Arsenaal ciibsee irra deeme' - Alan Shiirar

3. 20 Fuulbaana 2026Haleellaa 'jabaa' Yukireeniin namoonni lama du'an - Raashiyaa

   

   Madda suuraa, Reuters

   Haleellaa diroonii ''baay'ee'' Yukireen naannawa Moskoo irratti raawwatteen yoo xiqqaate namoonni lama yeroo ajjeefaman jaha immoo madaa'uu bulchaan naannichaa Andireeyi Vorobyeeb dubbatan.

   Kantiibaan magaalaa Moskoo Sargeeyi Sobyaanin gama isaaniin dirooniiwwan 450 gara magaalattiitti qajeelanii turan haleelamuu dubbatan.

   Haleellaa Yukireen kanas ''kan dorgomaa hin qabne'' jechuun ibsan.

   Wiirtuun boba'aa calalu yeroo haleelamu manneen baay'ee immoo ibiddi qabateera.

   Pirezidantiin Yukireen Voloodimir Zeleeniskii Yukireen wiirtuu boba'aa ''ijoo'' Raashiyaa akkasumas bakkee lojistikii rukuchuu mirkaneessaniiru.

   Kunneen kan waraana Raashiyaa maallaqaan utubanidha jedhaniirus.

   

   Madda suuraa, Reuters

4. 20 Fuulbaana 2026Hidhattooti Huutii magaalaa guddoo Sa'udi Arabiyaatti misaa'ela dhukaasan

   

   Madda suuraa, Reuters

   Hidhattoonni Huutii Iraaniin deeggaraman magaalaa guddoo Sa'udi Arabiyaa Riyaaditti dirooniifi misaa'ela baalistikii dhukaasuu dubbatan.

   Akkasumas, wiirtuuwwan anniisaa biyyattii qarqara Galaana Diimaa jiranitti dhukaasuullee himan.

   Aangawoonni Sa'udi Arabiyaa misaa'ela baalistikii gaafa Sambataa itti dhukaafame qolachuu beeksisaniiru.

   Waa'ee haleellaa kanaa maaltu jedhame?

5. 20 Fuulbaana 2026US waraana Iraaniif baasiin baaste dolaara bil. 43 caaluu tilmaamame

   

   Madda suuraa, Getty Images

   Baasiin hanga ammaatti waraanni Ameerikaa waraana Iraan irratti baase gara dolaara biiliyoona 43.6'tti guddachuu gabaafame.

   Kuni hanga Fulbaana 03, 2026'tti kan jiru akka ta'eefi kunis tilmaama seera baastotaaf kan dhihaate ta'uu AP'n gabaaseera.

   Tilmaamni kuni Wiirtuu Ajajaa waraana US irraa kan dhihaate akka ta'e gabaafameera.

   Guyyoota muraasa dura Yunaayitid Isteet sababa waraana Iraaniin hanqinni meeshaa waraanaa ishee quunnamu Ministeera Ittisaa US irraa dhagahamee ture.

   Pirezidantiin Donaald garuu hanqinni nu mudate hin jiru jechuun dubbatu.

   Ameerikaan duula waraana Iraaniin meeshaaleen waraanaa fayyadamte irratti gabaasni jalqabaa yeroo dhiyaate Guraandhalaa hanga Waxabajjii biyyattiin doolaara biiliyoona 33.4 baasuu ministeerichi beeksiseera.

   Kana keessaa doolaarri biiliyoona 22.3 kan bahe meeshaalee waraanaa dhuka'an irratti bahe.

   Ogeessonni UN, Ameerikaan Iraan keessatti yakka waraanaa raawwatte jedhe

   Meeshaaleen waraanaa US ittiin dhaadattuu fi Iraan ittiin haleelaa jirtu kan akkamiiti?

6. 20 Fuulbaana 2026Ashamaa!

   Tamsaasa kallattii BBC Afaan Oromoo eegalleerra.

   Odeessaalee karaa Marsariitii (Website), Instagram, YouTube, Facebook, WhatsApp fi TikTok keenyaas ni argattu.

   Nu waliin turaa.

7. 19 Fuulbaana 2026Paakistaanitti haleellaa boombii Masjiida irratti raawwatameen yoo xiqqaate namoonni 21 du'an, 100 ol madaa'an

   

   Madda suuraa, EPA

   Kaaba lixa Paakistaan Masjiida mooraa poolisii keessatti argamurratti konkolaataan boombii hidhate haleellaa raawwateen yoo xiqqaate namoonni 21 yoo du'an, 100 kan caalan madaa'aniiru jedhan qondaalonni.

   Haleellaan balleessanii baduu raawwatame kanaan miseensonni poolisii 15 fi daa'imni waggaa afurii lubbuu dhabaniiru.

   Miidiyaan Paakistaan APP jedhamu akka gabaasetti hidhattoonni konkolaataatti boombii fe'uun mooraa poolisii Masjiidi keessatti argamu haleelan.

   Mooraan haleellaan irratti raawwatame kun bulchiinsa Khyber Pakhtunkhwa magaalaa Kohat keessatti argama.

   Poolisiin bulchiinsa Khyber Pakhtunkhwa kanneen haleellaa raawwatan hidhattoota hidhattoota Tehrik-e-Taliban Pakistan (TTP)- Pakistani Taliban jedhamuunis beekaman ta'uu ibse.

   Garee haleellaa banan keessaa yoo xiqqaate ja'a dhohiinsa uumaniin fi walitti dhukaasuu gidduu sanatti tureen du'aniiru jedhe dubbi himaan poolisii bulchiinsa Khyber Pakhtunkhwa.

   Dhaabbati Biyyoota Gamtoomanii haleellaa kana balaaleffayeera.

   Guraandhala darbe haleellaa Masjiida Islaamaabaad dabalatee kutaalee biyyattii keessatti irra deddeebiin mudatee fi lubbuu namoota 30 caalanii galaafateefis aanga'oonni garee kana himatan.

8. 19 Fuulbaana 2026Tiraamp wixinee labsii Raashiyaafi Iraan qoqqobuuf ba'e mallatteesse

   

   Madda suuraa, EPA/Shutterstock

   Pirezidantiin US Doonaald Tiraamp qoqqobbiin boba'aa fi gaazii Raashiyaa irratti xiyyeeffate akka hojiirra oolu mallatteessuun mirkaneesse.

   Qoqqobbiin kun diinagdee Raashiyaa miidhuuf yaadameeti.

   Tiraamp kan mallatteesse wixineen labsii qoqqobbii kana kaa'uuf ba'e torban darbe mana maree bakka bu'ootaatti dhihaachuun erga raggaasifamee booda.

   Biyya Raashiyaa waliin hidhata qabdi jedhamtu Iraan irra qoqqobbii kaa'amee ture itti fufsiisuunis wixinee Tiraamp mallatteesse kana keessa jira.

   Akkaataa labsii kanaan Tiraamp biyyoota Raashiyaa irraa boba'aa fi gaazii bitatan kanneen akka Chaayinaa fi Hindii irra qaraxa harka 100 kaa'uu danda'a.

   Qoqqobbiin kun oomishaalee anniisaa fi meeshaalee waraanaa Iraanis kan ilaallatuudha.

   Wixineen labsii maqaa miseensa mana maree bakka bu'oota uummataa du'aan addunyaa kanarraa boqotan Liinzii Giraaham jedhamaniin kan moggaafame labsiin kun fuula 48 qaba.

   Biyyoonni oomisha boba'aa Raashiyaa dhibbeentaa 15 gadi bitan akkasumas kanneen Raashiyaarratti hirkachuu hir'isaa jiran qoqqobbii kana jalaa ni baraaramu.

   Qoqqobbiin kun baankii fi jaarmiyaalee faayinaansii Pirezidanti Vilaadmiir Puutin fi aanga'oota olaanoo mootummaa Raashiyaas ni dabalata.

9. 18 Fuulbaana 2026Paakistaan yeroo lamaffaaf loltoota Huutii akeekkachiifte

   

   Madda suuraa, AP

   Dubbi himaan waraanaa Paakistaan, biyyattiin michuu ishee Sa’uudii Arabiyaa haleellaa irraa ittisuuf “tarkaanfii barbaachisu kamiyyuu fudhachuuf dubatti hin jettu” jechuun Huutii akeekkachiisan.

   Dubbiin kun kan dhufe yeroo haleellaan humnoota Huutii Yaman Sa’uudii irraatti hammaachaa jirutti.

   Wiirtuuwwan boba’aa Sa’uudii fi karaan daddabarsa boba’aa biyyattii wal qunnamsiisu akkasumas buufati doonii haleelamuun al-ergii boba’aa Sa’uudii dhiibba jala galeera.

   Gareen Huutis, haleellaa qilleensaa Sa’uudii irraa yeroo hedduu irratti raawwatamuu himatu. Riyadh immoo gareen kun bakkeewwan qulqulluu amantii Islaamaa Makkaa fi Madiinaa irratti haleellaa raawwachuuf yaaluun himatte.

   Himannaan kunis biyyoota Muslimaa hedduu keessatti mufii uumeera.

   Paakistaan gama isheen, “nageenya Masjiidota Qulqulluu lamaani fi Mootummaa Sa’uudii Arabiyaa mirkaneessuuf tarkaanfii barbaachisaa ta’e kamiyyuu ni fudhanna,” jette.

   Paakistaan, Sa’uudi Arabiyaa fi Turkiin ji’a darbe Waliigaltee Ittisa waloo Makkaa jedhamu mallatteessaniiru.

   Waliigaltichi, yoo biyyoota sadan keessaa tokkorratti haleellaan raawwatame, biyyoonni hafan lama akka tumsaniif waadaa walif galan.

   Waliigaltichi kan mallatteeffame yeroo waraanni Ameerikaa fi Iraan gidduutti itti fufee jiruu fi naannichatti haleellaan humnoota Huutii Iraaniin deeggaraman Sa'udii irratti raawwatamaa jirutti.

   Ahmed Sharif “Paakistaan guutummaatti Mootummaa Sa’uudi cinaa dhaabbachuuf gama dippilomaasiinis ta'ee gama waraanan tumsuuf qophiidha'' jechuun ibsan.

10. 18 Fuulbaana 2026Hanga Tiraamp aangorraa bu'utti Hormuuz hin banamu- Iraan

    

    Madda suuraa, Reuters

    Gorsaan siyaasaa hogganaa olaanaa Iraan akka jedhanitti, Tehran hanga pirezidaantiin Ameerikaa Doonaald Tiraamp aangoo irraa bu'anitti ulaa Hormuz cuftee akka turtu himan.

    Mohammad Baqer Zolghadr, gorsaan hoogganaa haaraa Iraan, Mojtaba Kamenii, ibsa Kamisa darbe kennaniin “Ummanni diina isa haleele cabsuu fi warra of tuulan dugda kutuuf murteesseera,” jechuun dubbatan.

    Akka inni jedhutti, ulaan Hormuz kan banamu erga Doonaald Tiraamp fi MM Israa’el Beeniyaamin Netaaniyaahuu aangoo irraa kaafamanii booda qofa.

    Tarkaanfiin kunis tarkaanfii “marsaa jalqabaa haaloo ba’uu Iraanii” jechuun ibsan

    Pirezidaantiin Ameerikaa Doonald Tirump yeroo ammaa waa’ee waraana Iraan ilaalchisee ibsa gara garaa kennaa jiru. Amma waraanni kun gara xumuratti gahe jechuun tibbana ibsan.

    Gama Iraanitiin immoo, waraanni itti fufuu qaba moo Ameerikaa waliin mariin gaggeeffamuu jira isa jedhu irratti garaagarummaa yaadaatu jira.

    Qondaaltonni siyaasaa Iraan keessaa muraasni, Massud Pezeshkian fi Mohammad Bagher Galibaf dabalatee, Ameerikaan gara qabxiilee waliigaltee Islamabaditti akka deebitu gaafachaa jiru. Akka isaan jedhanitti, kun waraana dhaabuuf haalduree ta’uu qaba.

    Gama biraatiin, qondaaltonni ejjennoo cimaa qaban, keessumaa hooggantoonni Eegdota Warraaqsa Islaamaa Iraan, waraana itti fufuu fi ulaan Hormuz cufamee turuu deeggaraa jiru. Tarkaanfiin kun Ameerikaa fi Israa’el irratti dhiibbaa uumuuf ta'uu ibsu.

    Haa ta’u malee, qaala’iinsi jireenyaa, kufaatiin dinagdee fi cufamuun ulaa galaanaa buufatawwan doonii Iraan irratti dhiibbaa geessisaa jiru. Gatiin maallaqa biyyatti Riyaalli Iraan, maallaqota addunyaa isa baay'ee rakasa ta'uun, jireenya uummataa irratti dhiibbaa dabalataa uumaa jira.

11. 18 Fuulbaana 2026Ameerikaan qondaalonni olaanoo mootummaa Iraan kora UN irratti akka hirmaataniif viizaa kenniteef

    

    Madda suuraa, AP

    Bulchiinsi Tiraamp qondaalota olaanoo mootummaa Iraan Kora Dhaabbata Biyyoota Gamtoomanii torban dhufu Niiwu Yoork keessatti gaggeeffamurratti hirmaachuuf gara US imalaniif viizaa kenneera.

    Biyyoonni lameen wal waraanaa jiraatanis, Ameerikaan garuu pirezidantii fi ministira dhimma alaa Iraan dabalatee jila qondaalota mootummaa biyyattii hundaaf viizaa kenniteetti.

    Ministeerri dhimma alaa US ''aanga'oonni murteessoon'' Iraan, waahillan isaanii barbaachisoo ta'an waliin Kora UN irratti hirmaachuuf viizaa argataniiru jedhe.

    Ministeerichi aanga'oonni akkaan murteessoo jedheen kunneen eenyu akka ta'an maqaadhaan eeruu baatus, AFPn aanga'aa dhimma kana keessa beeku gaafachuun akka gabaasetti Pirezidant Masuud Pezeshkiyaan fi Ministira dhimma alaa Abbaas Araagshiiti.

    Ji'oota ja'aa oliif Iraan waliin waraanatti kan jirtu Ameerikaan, tarkaanfii kana fudhachuun waan hin baratamnedha, kanaaf raajii uumeera.

    Ameerikaa fi Iraan gara mariitti deebi'uunsaanii ibsamus, dhimmi murteessaa ta'e- Ulaan Hormuuz ammallee hin banamne.

12. 18 Fuulbaana 2026Jibuutiin duula waraanaa Huutii irratti gaggeeffamuuf daangaashee akka hin eeyyamne ibsite

    

    Madda suuraa, SM

    Ministirri maallaqaa Jibuutii Eliyaas Muusaa Dawaalee duula waraanaa hidhattoota Huutii irratti gaggeeffamu kamiifuu biyyisaanii daangaa sochii akka hin eeyyamne beeksisan.

    Ministirichi gaaffii fi deebii BBC Afaan Somaalee waliin taasisaniin kanaan dura Ameerikaa buufata humna waraanaa biyyattii keessaa qabdu fayyadamuun Huutii irratti akka haleellaa raawwattu dhorkuu ibsuun, ammas ejjennoon jijjiirame akka hin jirre dubbatan.

    Jibuutiin duula waraanaa kam keessattuu hirmaachuu hin barbaaddu jedhan.

    Yaman keessatti waraanni gareewwan adda addaa gidduutti gaggeeffamaa jiru karaa nagaan furamuu akka qabus dhaaman.

    Jibuutiin dirree waraanaa fi iddoo buufata waraanaa biyyoota jajjaboo ta'uu hin qabdu kan jedhan qondaalli kun, biyyattiin ofiifuu itti gaafatama jajjabaa hedduu qabdi jedhan.

    Galoo Galaanaa keessatti kan argamtu Jibuutiin, Ulaa Galaana Diimaa akkaan murteessaa ta'e Baab el-Mandabitti baayyee dhihaattee argamti.

    Ulaa Baab el-Mandab walaba gochuun Jibuutiif ga'ee olaanaa gumaacha jedhan.

    Waraanni Yamanii lammiilee biyyattiirratti dhiibbaa guddaa uumaa jiraachuu kan ibsan ministirichi, erga Huutiin akka haaraatti haleellaa eegalee hedduun gara Jibuutii baqachuu eeran.

    Jaarmiyaan godaantotaa UN Hagayya keessa baqattoonni 1600 caalan Yaman irraa gara Jibuutii baqachuu ibseera.

    Jalqaba wayita haleellaan Huutii eegalu sa’atii 24 keessatti namoonni 1,400 Jibuutii seenuu ministeerri diinagdee Jibuutii ibseera.

13. 18 Fuulbaana 2026Chaayinaan iyyata Sa'uudii erga dhageessee booda Iraan akka Sochii Huutii dhaabsistu gaafatte

    

    Madda suuraa, Reuters

    Chaayinaan iyyata Sa'uudii Arabiyaa erga dhageessee booda Iraan akka hidhattoonni Huutii tarkaanfii fudhataa jiranirraa of qusatan gochuu qabdi jette.

    Maddeen Iraan dhimma kanatti dhihoo jiran Chaayinaan dhuunfaadhaan gaaffii kana Tehraaniif dhiheessuu Rooyitarsitti himan.

    Huutiin Galaana Diimaa irratti to'annoosaa cimsuun dooniiwwan ishee haleeluu hordofee Sa'uudii Arabiyaan Ameerikaarraa deeggarsa gaafattus hin arganne.

    Amma garuu gara Chaayinaa deebi'uun tumsa gaafatteetti.

    Chaayinaan gaaffii Sa'uudiin dhiheessiteef irratti hundaa'uun Iraan akka sochii Huutii daangessitu gaafatteetti.

    Qaamoleen hunduu waraana babal'isuu fi haleellaa raawwachuurraa of qusachuun gara marii dippiloosiitti deebi'uun nageenyi yabala dooniiwwanii akka bakkatti deebi'u gaafatteetti Beejiingi.

    Huutiin ulaa daldala boba'aa Chaayinaa miidhu danda'u ugguruu irraa akka of qusatus akeekkachiisteetti Chaayinaan.

    Kanaaf ammoo Iraan gareen kun gochasaarraa akka of qusatu dhiibbaa uumuu qaba jette.

    Gaaffiin Chaayinaan dhiheessite kun wayita Ministirri dhimma alaa Iraan Abbaas Araagchii gita isaa kan Chaayinaa Wang Yi waliin Beejiingitti walargan dhihaachuu fi kallattiin mootummaa Chaayinaarraa Iraaniif dhihaachuu wanti barame hin jiru.

    

    Madda suuraa, Reuters

14. 18 Fuulbaana 2026Yooyyaa!

    Tamsaasa kallattii keenya eegalleerra.

    Waraana Huutii Yaman fi Sa'uudii Arabiyaa akkasumas dhimmoota Baha Giddugaleessaa kaanirratti xiyyeeffanna.

    Odeeffannoo biyya keessaa fi addunyaa mara irraa hordofnee karaa kanaan isin biraan geenya.

    Tamsaasa kallattii armaan duraan odeeffannoo tamsaasaa turre asii argattu.

    Odeessaalee keenya Marsariitii (Website), YouTube, Facebook, WhatsApp fi TikTok keenyarraas ni argattu.