RIWAYAT HIDUP BAPAK PATI GOWING
Temutu Nuane …
Pati Tena Lima Laya … Laya Pati Ola Ama, …Morita Pi Tanah Eka’n, … Tibura,… Pi Nura
Wolo Lolo’n.
Bai lake kayo puke wai mata’n …… Opu ata kayo puke … teti amak Boro Pathi’n ……….
wahe’n ata wai mata’n … weli inak Pria Pathi … ata suku Ata Kelang … lewo nisa koli olak
lodo.
Puke weka … wua goka … mata’n bage lolo’n doro … Goka lodo, doro hau … manone tuena
….. , murate’n gehaka … nala Inak Lipa Borho.
Hau tobo,…… tobo tada lau lango amak Buri Raine … ata suku Bale Pap’an ,… bel’en Lewo
Tara’n wana, Lewo Nisa…. Nuane tepe tu’n ribu ratu hiwha pulu rua no butho on’e.
Ana tani rema tuka’n teke leo ……. Bai huta’n manuk gokok, doa’n dahe temenange …
Lei sedan tana eka’n……. rane loa nura wolo lolon.
Tani ago’ … lango amak buri raine ……….. huta’n reda …. Suku lango Bale Papan.
Amak Buri pakero… nara makene …. PATI GOWIN.
Petrus Pati Gowin … ana ke telho .Nabe Kaka’n tali ari’n… ina wae amalake ata pito wati.
Weru’in :
1. Rate Raine……….. (Alm) Tedo lodo
2. Ina Bolene (Alm)
3. Pati Gowin ……….. pi tena turu
4. Date Balhi…………. (Alm)
5. Boro Pathi
6. Rain Ola ……………(Alm)
7. Geroko Pathi ………(Alm)
8. Uba Leta ……………. (Alm)
Nuane ama Pati tawa gere, …… ata raena ……. Mura – mura, pana tedun …tou nolo rua dore
…… rai sekolah tulis basa roi kenir’en……………………..ama pati nae’n take.
Pana lau nato dai … weli rai nato pai …………….. ama Pati,… tedo baran, mete pana no amak
Buri raine.
Nuane ama Pati keropo’n tawa gere …. Kemamu hode haka ……. Nulu Pati tue’n hala.
Lodo ola lau duli … ne balik dai ,… manuk, kayo lolon gereka ………………….
Tuen tiwan teti ori’n … tue’n pai … padu lau nadin nelo.
Rero’n pulo- pulo kae ……. Pati perudut hopan hala.
Ata keropo’n, lewo noro gole rai tekena nato dai … Pati tobo on’o olune.
Pete’n nae’n, … duli lau no olha’n,… wolo teti no ehi’n …… gere na’an pohe tali Buri olha’n
… pao pasi’n bai ana sama aya. ………..
Pete’n heket … ne peroho’n ina Lipa meha, weli rura’n tuka’n. ………. Teke dei ama Pati
on’en suka mata pasana… huda gahi ina Bita Bedha ,…. Sedo’n ata … Pandai no Lipa
jadi,... suku ata Kela’n lewo nisa lodo………………………., tepe tu’n ribu ratu hiwha… Pulu
lema no ruha on’e.
Pana tedu’n, baran pana baran balik………., lela hala…. Rera Wulan teti, pohe ekak…
tanah ekan lali sera genawe, bai ana ina wae ama lake ata pito.
Ama lake pat……. Ina wae ata telo……………………………… ana weru’in …
1. Gebe Pathi
2. Boro Berene
3. Lusia (Alm)
4. Lipa Borho
5. Buri Raine
6. Ola Berene
7. Kia Helane
Nuane pi rero’n …… ana amalake ata rua …………. Ariket Buri Raine … no ana tuho
wutu’n,… anaket Kia Helane …, gere roon eko kowa lolon beka …. Beka epana mehe pi
reron.
Lodo roon kolon lio … rabe lie …… lie gadaka mehe pi harhin, … lau Pekan Baru dai.
Tu’n mete tal’in ……. Wula’n mete hekat ……. Tobo heket,… Pati on’e penaha hala ….
Rate Boro … tekena bera balik hala. ……………. Teke dei … gere nai no butu buat ….
Lau nai … hode tedu’n rate Boro balik geniko lewo tanah.
Tut uro nulu walen , gasiko budi akare, ama Pati nae … taaro balika pi ribu ratu lewo
nisa ata’n kayak tanah Tale.
nulu mel’a wale’n sar’e ……………… budhi dike aka slog’an……………….mela hala, sare
kura’n, … dik’en take slog’a kuran …………….. nimoket tai tutu pepa…………. Hama- hama
tai gasik bage.
Dik’en slog’an …… tutu ata re roi denge ………… slog’an kuran … gasik ata re lile liki.
Nabe on’e… moripet tala ata dik’e … liwo hapan papa rua kae……...mel’an kelemure dike
deina …… Rera Wula’n meha liwo hapan.
Gike pelate menge gelek … helo ata waha kae. Nabe deina …… bel’en teti Rera Wulan
paro tauro dikae.
Tepe tun…. Riburua no pulok ruha on’e ………………. Lau duli, ama Pati , nai hala mure.
Teti ori’n …… ama pati gere balika…………
Pana tiwa’n dekemelena ……. Lage lok’on teti rorana.
Reron getan … sape pi nuane nhi ……. Ama Pati nodi leto’n, pana na lango gole.
Ina Bita … inak ata sare …….. leton dore lodo lau gere rae…….. dore sape,… ama Pati
letu mata’n.
Badhu kae ……. Nuane getana……………… nuane … ari reu’n suku dosinaen … rae atu
lolo’n neka peli, kakaket … ariket…. Reuket Thomas Ola Sul’en mehe de lepat… balik
tobo kedepa wati,… temani mete tani ulika………………..
Meli- meli, … temut’u tutu, nupene hewo …………… Amak Pati Gowine ,… lau. nae gohu
kae.
Letu mata wia, minggu rema gere …… dahu Pulok To’u. …….. Tena’n nai geniko Alapet
Rera Wula’n .
Pana Peke’n, kiden meha weli ul’i mete tani…………….. gawe lupa’n, ana nukak nemu
kae, tali cucu pulok telo…, lodo cece ata rua … Poe hutan … lango tukan sama peno.
Pai peke’n … kaka ari edo reu ribu ratu lewo nisa,… ata kayak bale pap’a waha’n kae.
Ama Pati … morita pi tanah eka’n ……….. tibura pi nura wolo lolon …………..
sape naaro tune …….. Pulu Hiwa geta’n.
