Lambi huyi jaati hai teri hizra raaten

Bahar dhadkanon ki meri bhi ab toot rahi hai

~ sandilya tanishq
AHMAD FARAZ
Qurbat bhi nahi dil se utar bhi nahi jata

qurbat bhi nahin dil se utar bhi nahin jaata

vo shakhs koi faisla kar bhi nahin jaata

aankhen hain ki khaali nahin rahti hain lahu se

aur zakhm-e-judai hai ki bhar bhi nahin jaata

vo raahat-e-jaan hai magar is dar-badri mein

aisa hai ki ab dhyaan udhar bhi nahin jaata

hum dohri aziyyat ke girftaar musaafir

paanv bhi hain shal shauk-e-safar bhi nahin jaata

dil ko tiri chaahat pe bharosa bhi bahut hai

aur tujh se bichhad jaane ka dar bhi nahin jaata

paagal hue jaate ho faraaz us se mile kya

itni si khushi se koi mar bhi nahin jaata

Saqiya Ek nazar jam se pehle pehle

saaqiya ek nazar jaam se pehle pehle

hum ko jaana hai kahi shaam se pehle pehle

nau-giraftaar-e-wafa saee-e-rihaaee hai abas

hum bhi uljhe the bahut daam se pehle pehle

khush ho ai dil ki mohabbat to nibha di tu ne

log ujad jaate hain anjaam se pehle pehle

ab tire zikr pe hum baat badal dete hain

kitni raghbat thi tire naam se pehle pehle

saamne umr padi hai shab-e-tanhaai ki

vo mujhe chhod gaya shaam se pehle pehle

kitna achha tha ki hum bhi jiya karte the faraaz

ghair-maaruf se gumnaam se pehle pehle

Qurbaton mein bhi judai ke bahane mange

qurbaton mein bhi judaai ke zamaane maange

dil vo be-mehr ki rone ke bahaane maange

hum na hote to kisi aur ke charche hote

khilqat-e-shehr to kehne ko fasaane maange

yahi dil tha ki tarasta tha maraasim ke liye

ab yahi tark-e-taalluq ke bahaane maange

apna ye haal ki jee haar chuke loot bhi chuke

aur mohabbat wahi andaaz purane maange

zindagi hum tire daaghoon se rahe sharminda

aur tu hai ki sada aaina-khaane maange

dil kisi haal pe qaaney hi nahin jaan-e-'faraz

mil gaye tum bhi to kya aur na jaane maange

Tujhe hai mashq-e-sitam ka malal waise hi

tujhe hai mashq-e-sitam ka malaal vaise hi

hamaari jaan thi jaan par vabaal vaise hi

chala tha zikr zamaane ki bewafaai ka

so aa gaya hai tumhaara khayal vaise hi

hum aa gaye hain tah-e-daam to naseeb apna

wagarana us ne to fenka tha jaal vaise hi

main rokna hi nahin chahta tha vaar us ka

giri nahin mere haathon se dhaal vaise hi

zamaana hum se bhala dushmani to kya rakhta

so kar gaya hai humein paayemaal vaise hi

mujhe bhi shauq na tha dastaan sunaane ka

faraaz us ne bhi poocha tha haal vaise hi
Chalo wo ishq nahi chahne ki adat hai

Chalo Woh Ishq Nahi Chahne Ki Aadat Hai

Par Kiya Kareen Hume Ek Dosre Ki Aadat hai,

Tu Apni Sheesha Gari ka Na Kar Hunar Zaya

Main Aayena Hoon Mujhe Tootne Ki Adat Hai,

Main Kiya Kahoon K Mujhe Sabar Kiyo Nahi Aata

Main Kiya Karoon K Tujhe Dekhne Ki Aadat Hai,

Tere Naseeb Main Aye Dil e Sada Ki Mehroomi

Na Woh Sawali Na Tujhe Mangne Ki Aadat Hai,

Wisal Main Bhi Wohi Firaaq Ka Aalam

K Usko Neend Mujhe Rat Jage Ki Aadat Hai,

Yeh Mushkalin Hun To Pher Kayse Raste Tay Hoon

Main Na Saboor Use Sochne Ki Aadat Hai,

Yeh Khud Aziyati Kab Tak “FARAZ”

Tu Bhi Use Na Kar Yaad Jise Bholne Ki Aadat Hai.
Ab ke tajdid-e-wafa ka nahi imkan jana

Ab ke tajdeed-e-wafa ka nahin imkaan janaan

Yaad kya tujh ko dilaaein tera paiman janaan

Youn hi mosam ki ada dekh ke yaad aya hai

Kis qadar jald badal jaate hein insaan janaan

Zindagi teri ataa thi so tere naam ki hai

Hum ne jaise bhi basar ki tera ehsaan janaan

Dil yeh kehta hai ke shaid ho fasurda tu bhi

Dil ki kya baat karein dil to hai nadaan janaan

Awal Awal ki muhabaat ke nashe yaad to kar

Be-piye bhi tera chehra tha gulistaan janaan

Aakhir Aakhir too yeh aalam hai ke ab hosh nahin

Rag-e-Meena sulag uthi ke rag-e-jaan janaan

Mudatton se yahi aalam na tawaqqu na umeed

 Dil pukare hi chala jata hai janaan janaan

Hum bhi kya saada the hum ne bhi samajh rakha tha

Gham-e-Doraan se juda hai gham-e-janaan janaan

Ab ke kuch aise saji mefil-e-yaraan janaan

Sar ba-zaanu hai koi sar ba-garebaan janaan

Har koi apni hi awaaz se kaanp uthta hai

Har koi apne hi saaye se harasaan janaan

Jis ko dekho wohi zanjeer bapaa lagta hai

Shaher ka Shaher huwa dakhil-e-zindaan janaan

Ab tera zikr bhi shaid hi ghazal mein aaye

Aor se aor huwe dard ke unwaan janaan

Hum ke roothi hoi rut ko bhi mana lete the

Hum ne dekha hi na tha mosam-e-hijraan janaan

Hosh aaya to sabhi khawab the reza reza

Jaise urte huwe aoraaq-e-preshan janaan

Ankh se door na ho dil se utar jayega

aankh se door na ho dil se utar jaayega

waqt ka kya hai guzarta hai guzar jaayega

itna maanoos na ho khilvat-e-gham se apni

tu kabhi khud ko bhi dekhega to dar jaayega

doobte doobte kashti ko uchhaala de doon

main nahin koi to saahil pe utar jaayega

zindagi teri ata hai to ye jaane waala

teri bakshish tiri dahleez pe dhar jaayega

zabt laazim hai magar dukh hai qayamat ka faraaz

zalim ab ke bhi na roega to mar jaayega
Zindagi se yahi gila hai mujhe

zindagi se yahi gila hai mujhe

tu bahut der se mila hai mujhe

tu mohabbat se koi chaal to chal

haar jaane ka hausla hai mujhe

dil dhadakta nahin tapkata hai

kal jo khwaahish thi aablaa hai mujhe

hum-safar chahiye hujoom nahin

ik musaafir bhi qaafila hai mujhe

kohkan ho ki qais ho ki faraaz

sab mein ik shakhs hi mila hai mujhe
Silsile tod gaya wo sabhi jaate jaate

silsile tod gaya vo sabhi jaate jaate

warna itne to maraasim the ki aate jaate

shikwa-e-zulmat-e-shab se to kahi behtar tha

apne hisse ki koi sham'a jalate jaate

kitna aasaan tha tire hijr mein marna jaanaan

phir bhi ik umr lagi jaan se jaate jaate

jashn-e-maqtal hi na barpa hua warna hum bhi

paa-b-jaulaan hi sahi naachte gaate jaate

is ki vo jaane use paas-e-wafa tha ki na tha

tum faraaz apni taraf se to nibhaate jaate
Suna hai log use ankh bhar ke dekhte hai

suna hai log use aankh bhar ke dekhte hain

so us ke shahr mein kuchh din Thahar ke dekhte hain

suna hai rabt hai us ko KHarab-haalon se

so apne aap ko barbaad kar ke dekhte hain

suna hai dard ki gahak hai chashm-e-naz us ki

so hum bhi us ki gali se guzar ke dekhte hain

suna hai us ko bhi hai sher o shairi se shaghaf

so hum bhi moajize apne hunar ke dekhte hain

suna hai bole to baaton se phul jhaDte hain

ye baat hai to chalo baat kar ke dekhte hain

suna hai raat use chand takta rahta hai

sitare baam-e-falak se utar ke dekhte hain

suna hai din ko use titliyan satati hain

suna hai raat ko jugnu Thahar ke dekhte hain

suna hai hashr hain us ki ghazal si aankhen

suna hai us ko hiran dasht bhar ke dekhte hain

suna hai raat se baDh kar hain kakulen us ki

suna hai sham ko sae guzar ke dekhte hain

suna hai us ki siyah-chashmagi qayamat hai

 so us ko surma-farosh aah bhar ke dekhte hain

suna hai us ke labon se gulab jalte hain

so hum bahaar pe ilzam dhar ke dekhte hain

suna hai aaina timsal hai jabin us ki

jo sada dil hain use ban-sanwar ke dekhte hain

suna hai jab se hamail hain us ki gardan mein

mizaj aur hi lal o guhar ke dekhte hain

suna hai chashm-e-tasawwur se dasht-e-imkan mein

palang zawiye us ki kamar ke dekhte hain

suna hai us ke badan ki tarash aisi hai

ki phul apni qabaen katar ke dekhte hain

wo sarw-qad hai magar be-gul-e-murad nahin

ki us shajar pe shagufe samar ke dekhte hain

bas ek nigah se luTta hai qafila dil ka

so rah-rawan-e-tamanna bhi Dar ke dekhte hain

suna hai us ke shabistan se muttasil hai bahisht

makin udhar ke bhi jalwe idhar ke dekhte hain

ruke to gardishen us ka tawaf karti hain

chale to us ko zamane Thahar ke dekhte hain

kise nasib ki be-pairahan use dekhe

kabhi kabhi dar o diwar ghar ke dekhte hain

kahaniyan hi sahi sab mubaalghe hi sahi

agar wo KHwab hai tabir kar ke dekhte hain

ab us ke shahr mein Thahren ki kuch kar jaen

'faraaz' aao sitare safar ke dekhte hain

Har koi dil ki hatheli pe hai sehra rakhe

har koi dil ki hatheli pe hai sehra rakhe

kis ko sairaab kare vo kise pyaasa rakhe

umr bhar kaun nibhaata hai taalluq itna

ai meri jaan ke dushman tujhe allah rakhe

hum ko achha nahin lagta koi hamnaam tira

koi tujh sa ho to phir naam bhi tujh sa rakhe

dil bhi paagal hai ki us shakhs se waabasta hai

jo kisi aur ka hone de na apna rakhe

kam nahin tam-e-ibaadat bhi to hirs-e-zar se

faqr to vo hai ki jo deen na duniya rakhe

hans na itna bhi faqeeron ke akeley-pan par

ja khuda meri tarah tujh ko bhi tanhaa rakhe

ye qana'at hai itaaat hai ki chaahat hai faraaz

hum to raazi hain vo jis haal mein jaisa rakhe
Ab aur kya kisi se marasim badhaye hum

ab aur kya kisi se maraasim badhaayein hum

ye bhi bahut hai tujh ko agar bhool jaayen hum

sehara-e-zindagi mein koi doosra na tha

sunte rahe hain aap hi apni sadaaein hum

is zindagi mein itni faraaghat kise naseeb

itna na yaad aa ki tujhe bhool jaayen hum

tu itni dil-zada to na thi ai shab-e-firaq

aa tere raaste mein sitaare lutaaein hum

vo log ab kahaan hain jo kahte the kal faraaz

he he khuda-na-karda tujhe bhi rulaayein hum
Dukh fasana nahin ki tujhse kahe

dukh fasana nahin ki tujh se kahein

dil bhi maana nahin ki tujh se kahein

aaj tak apni bekli ka sabab

khud bhi jaana nahin ki tujh se kahein

be-tarah haal-e-dil hai aur tujh se

dostana nahin ki tujh se kahein

ek tu harf-e-aashna tha magar

ab zamaana nahin ki tujh se kahein

qaasida hum faqeer logon ka

ik thikaana nahin ki tujh se kahein

ai khuda dard-e-dil hai bakhsheesh-e-dost

aab-o-daana nahin ki tujh se kahein

ab to apna bhi us gali mein faraaz

aana jaana nahin ki tujh se kahein
Jis shamt bhi dekhun nazar ata hai ki tum ho

jis samt bhi dekhoon nazar aata hai ki tum ho

ai jaan-e-jahaan ye koi tum sa hai ki tum ho

ye khwaab hai khushboo hai ki jhonka hai ki pal hai

ye dhund hai baadal hai ki saaya hai ki tum ho

is deed ki saaat mein kai rang hain larzaan

main hoon ki koi aur hai duniya hai ki tum ho

dekho ye kisi aur ki aankhen hain ki meri

dekhoon ye kisi aur ka chehra hai ki tum ho

ye umr-e-gurezaan kahi thehre to ye jaanoon

har saans mein mujh ko yahi lagta hai ki tum ho

har bazm mein mauzoo-e-sukhan dil-zadgaan ka

ab kaun hai sheerin hai ki leila hai ki tum ho

ik dard ka faila hua sehra hai ki main hoon

ik mauj mein aaya hua dariya hai ki tum ho

vo waqt na aaye ki dil-e-zaar bhi soche

is shehar mein tanhaa koi hum sa hai ki tum ho

aabaad hum aashufta-saron se nahin maqtal

ye rasm abhi shehar mein zinda hai ki tum ho

ai jaan-e-'faraz itni bhi taufeeq kise thi

hum ko gham-e-hasti bhi gawara hai ki tum ho
Aisa hai ki sab khwab musalsal nahi hote

aisa hai ki sab khwaab musalsal nahin hote

jo aaj to hote hain magar kal nahin hote

andar ki fazaaon ke karishme bhi ajab hain

meh toot ke barase bhi to baadal nahin hote

kuch mushkilein aisi hain ki aasaan nahin hoti

kuch aise muamme hain kabhi hal nahin hote

shaistagi-e-gham ke sabab aankhon ke sehra

namnaak to ho jaate hain jal-thal nahin hote

kaise hi talaatum hon magar qulzum-e-jaan mein

kuch yaad-jazeera hain ki ojhal nahin hote

ushshaq ke maanind kai ahl-e-hawas bhi

paagal to nazar aate hain paagal nahin hote

sab khwaahishein poori hon faraaz aisa nahin hai

jaise kai ashaar mukammal nahin hote
Hui hai sham to ankhon me bas gaya fir tu

hui hai shaam to aankhon mein bas gaya phir tu

kahaan gaya hai mere shehar ke musaafir tu

meri misaal ki ik nakhl-e-khushk-e-sehra hoon

tira khayal ki shaakh-e-chaman ka taair tu

main jaanta hoon ki duniya tujhe badal degi

main maanta hoon ki aisa nahin b-zaahir tu

hasi-khushi se bichhad ja agar bichadna hai

ye har maqaam pe kya sochta hai aakhir tu

fazaa udaas hai rut muzmahil hai main chup hoon

jo ho sake to chala aa kisi ki khaatir tu

faraaz tu ne use mushkilon mein daal diya

zamaana saahib-e-zar aur sirf shaayar tu
Tujhse bichad ke hum bhi muqaddar ke ho
gaye

Tujhse Bichhad Ke Ham Bhi Muqaddar Ke Ho Gaye,

Phir Jo Bhi Dar Mila Hai Usi Dar Ke Ho Gaye,

Phir Yun Hua Ke Ghhair Ko Dil Se Lagaa Liyaa,

Andar Wo Nafraten Thin Ke Baahar Ke Ho Gaye,

Kyaa Log The Ke Jaan Se Badh Kar Aziz The,

Ab Dil Se Mahw Naam Bhi Aksar Ke Ho Gaye,

Ai Yaad-E-Yaar Tujh Se Karen Kyaa Shikaayaten,

Ai Dard-E-Hijr Hum Bhi To Patthar Ke Ho Gaye,

Samjhaa Rahe The Mujh Ko Sabhi Nasehaan-E-Shehar,

Phir Rafta Rafta Khud Usi Kaafir Ke Ho Gaye,

Ab Ke Na Intizaar Karen Chaaragar Ka Ham,

Ab Ke Gaye To Koo-E-Sitamgar Ke Ho Gaye,

Rote Ho Ek Jazira-E-Jaan Ko “Faraz” Tum,

Dekho To Kitne Shahr Samandar Ke Ho Gaye.
Muntazir kab se tahayyur hai tiri taqreer ka

muntazir kab se tahayyur hai tiri taqreer ka

baat kar tujh par gumaan hone laga tasveer ka

raat kya soye ki baaki umr ki neend ud gai

khwaab kya dekha ki dhadka lag gaya taabeer ka

kaise paaya tha tujhe phir kis tarah khoya tujhe

mujh sa munkir bhi to qaael ho gaya taqdeer ka

jis tarah baadal ka saaya pyaas bharkaata rahe

main ne ye aalam bhi dekha hai tiri tasveer ka

jaane kis aalam mein tu bichhda ki hai tere baghair

aaj tak har naqsh fariyaadi meri tahreer ka

ishq mein sar phodna bhi kya ki ye be-mehr log

joo-e-khoon ko naam de dete hain joo-e-sheer ka

jis ko bhi chaaha use shiddat se chaaha hai faraaz

silsila toota nahin hai dard ki zanjeer ka
Ranjish hi sahi dil hi dukhane ke liye aa

ranjish hi sahi dil hi dukhaane ke liye aa

aa phir se mujhe chhod ke jaane ke liye aa

kuch to mere pindaar-e-mohabbat ka bharam rakh

tu bhi to kabhi mujh ko manaane ke liye aa

pehle se maraasim na sahi phir bhi kabhi to

rasm-o-rah-e-duniya hi nibhaane ke liye aa

kis kis ko bataaenge judaai ka sabab hum

tu mujh se khafa hai to zamaane ke liye aa

ik umr se hoon lazzat-e-giryaa se bhi mahroom

ai raahat-e-jaan mujh ko rulaane ke liye aa

ab tak dil-e-khush-fahm ko tujh se hain ummeedein

ye aakhiri shamaein bhi bujhaane ke liye aa
Ab ke bichde to shayad kabhi khwabon me
mile

ab ke hum bichhde to shaayad kabhi khwaabon mein milen

jis tarah sukhe hue phool kitaabon mein milen

dhoondh ujde hue logon mein wafa ke moti

ye khazaane tujhe mumkin hai kharaabon mein milen

gham-e-duniya bhi gham-e-yaar mein shaamil kar lo

nasha badhta hai sharaaben jo sharaabon mein milen

tu khuda hai na mera ishq farishton jaisa

dono insaan hain to kyun itne hijaabo mein milen

aaj hum daar pe kheeche gaye jin baaton par

kya ajab kal vo zamaane ko nisaabon mein milen

ab na vo main na vo tu hai na vo maazi hai faraaz

jaise do shakhs tamannaa ke saraabo mein milen
Us ko juda hue bhi zamaana bahut hua

us ko juda hue bhi zamaana bahut hua

ab kya kahein ye qissa puraana bahut hua

dhalti na thi kisi bhi jatan se shab-e-firaq

ai marg-e-na-gahaan tira aana bahut hua

hum khuld se nikal to gaye hain par ai khuda

itne se waqie ka fasana bahut hua

ab hum hain aur saare zamaane ki dushmani

us se zara sa rabt badhaana bahut hua

ab kyun na zindagi pe mohabbat ko vaar den

is aashiqi mein jaan se jaana bahut hua

ab tak to dil ka dil se taaruf na ho saka

maana ki us se milna milaana bahut hua

kya kya na hum kharab hue hain magar ye dil

ai yaad-e-yaar tera thikaana bahut hua

kehta tha naasehon se mere munh na aaiyo

phir kya tha ek huu ka bahaana bahut hua

lo phir tire labon pe usi bewafa ka zikr

ahmad-'faraz tujh se kaha na bahut hua
Rog aise bhi gham-e-yaar se lag jaate hain

rog aise bhi gham-e-yaar se lag jaate hain

dar se uthte hain to deewaar se lag jaate hain

ishq aaghaaz mein halki si khalish rakhta hai

baad mein saikron aazaar se lag jaate hain

pehle pehle havas ik-aadh dukaaan kholti hai

phir to bazaar ke bazaar se lag jaate hain

bebaasi bhi kabhi qurbat ka sabab banti hai

ro na paaye to gale yaar se lag jaate hain

katarnen gham ki jo galiyon mein udri phirti hain

ghar mein le aao to ambaar se lag jaate hain

daagh daaman ke hon dil ke hon ki chehre ke faraaz

kuch nishaan umr ki raftaar se lag jaate hain
Yun hi mar mar ke jiyen waqt guzare jaye

yoonhi mar mar ke jiein waqt guzaare jaayen

zindagi hum tire haathon se na maare jaayen

ab zameen par koi gautam na mohammad na maseeha

asmaanon se naye log utaare jaayen

vo jo maujood nahin us ki madad chahte hain

vo jo sunta hi nahin us ko pukaare jaayen

baap larzaan hai ki pahunchee nahin baaraat ab tak

aur ham-joliyaan dulhan ko sanwaare jaayen

hum ki naadaan juwaari hain sabhi jaante hain

dil ki baazi ho to jee jaan se haare jaayen

taj diya tum ne dar-e-yaar bhi ukta ke faraaz

ab kahaan dhoondne gham-khwaar tumhaare jaayen
Dosto Yun Bhi Na Rakho Khumoo Pemana
Khulay

Dosto Yun Bhi Na Rakho Khumoo Pemana Khulay

Chund Hi Roz Howe Hain Abhi Maykhana Khulay

Ek Zara Rung Pe Aaye To Sahi Josh-E-Bahar

Ek Zara Dhung Ka Mausam Ho To Dewana Khulay

Jis K Hijra Me Kitabo Pe Kitabe Likh Dein

Us Pe Gar Haal Humara Nahi Khulta Na Khulay

Hum To Sach Much K Hi Kirdar Samajh Bethay Thy

Log Aakhir Ko Kahi Sorat-E-Afsaana Khulay

Jane Ye Pyar Sikhate Hain K Inkar FARAZ

Humpe But Khana O Kaaba O Kalisa Na Khulay

Bhali si ek shakl thi

Bhale dinon ki baat hai

Bhali si ek shakl thi
Na ye ki husn-e-tam ho
Na dekhne men aam si

Na ye ki vo chale to
Kahkashan si rahguzar lage
Magar vo saath ho to phir
Bhala bhala safar lage

Koi bhi rut ho us ki chhab

Faza ka rang-rup thi
Vo garmiyon ki chhanv thi
Vo sardiyon ki dhuup thi

Na muddaton juda rahe

Na saath subh-o-sham ho
Na rishta-e-vafa pe zid
Na ye ki izn-e-am ho

Na aisi khush-libasiyan
Ki sadgi gila kare
Na itni be-takallufi
Ki aaina haya kare

Na ikhtilat men vo ram

Ki bad-maza hon khvahishen
Na is qadar supurdagi
Ki zach karen navazishen

Na ashiqi junun ki
 Ki zindagi azaab ho
Na is qadar kathor-pan
Ki dosti kharab ho

Kabhi to baat bhi khafi

Kabhi sukut bhi sukhan
Kabhi to kisht-e-zaafaran
Kabhi udasiyon ka ban

Suna hai ek umr hai

Muamalat-e-dil ki bhi
Visal-e-jan-faza,n to kya
Firaq-e-jangusil ki bhi

So ek roz kya hua

Vafa pe bahs chhid gai
Main ishq ko amar kahun
Vo meri zid se chid gai

Main ishq ka asiir tha

Vo ishq ko qafas kahe
Ki umr bhar ke saath ko
Vo bad-tar-az-havas kahe

Shajar hajar nahin ki ham

Hamesha pa-ba-gil rahen
Na Dhor hain ki rassiyan
Gale men mustaqil rahen

Mohabbaton ki vasuatein
Hamare dast-o-pa men hain
Bas ek dar se nisbaten
Sagan-e-ba-vafa men hain

Main koi panting nahin

 Ki ik frame men rahun
Wahi jo man ka miit ho
Usi ke prem men rahun

Tumhari soch jo bhi ho

Main us mizaj ki nahin
Mujhe vafa se bair hai
Ye baat aaj ki nahin

Na us ko mujh pe maan tha

Na mujh ko us pe zoam hi
Jo ahd hi koi na ho
To kya gham-e-shikastagi

So apna apna rasta

Hansi-khushi badal diya
Vo apni raah chal padi
Main apni raah chal diya

Bhali si ek shakl thi

Bhali si us ki dosti
Ab us ki yaad raat din
Nahin, magar kabhi kabhi
Khwabon ke byopari

ham khvabon ke byopari the

par is men hua nuqsan bada

kuchh bakht men dheron kalak thi

kuchh ab ke ghazab ka kaal pada

ham raakh liye hain jholi men

aur sar pe hai sahukar khada

yaan buund nahin hai deve men

vo baj-byaj ki baat kare

ham banjh zamin ko takte hain

vo dhor anaaj ki baat kare

ham kuchh din ki mohlat mangen

vo aaj hi aaj ki baat kare

jab dharti sahra sahra thi

ham dariya dariya roe the

jab haath ki rekhaen chup thiin

aur sur sangit men soe the

 tab ham ne jivan-kheti men

kuchh khvab anokhe boe the

kuchh khvab sajal muskanon ke

kuchh bol kabat divanon ke

kuchh lafz jinhen maani na mile

kuchh giit shikasta-janon ke

kuchh niir vafa ki shamon ke

kuchh par pagal parvanon ke

par apni ghayal ankhon se

khush ho ke lahu chhidkaya tha

maati men maas ki khaad bhari

aur nas nas ko zakhamaya tha

aur bhuul gae pichhli rut men

kya khoya tha kya paaya tha

har baar gagan ne vahm diya

ab ke barkha jab aaegi

har biij se konpal phutegi

aur har konpal phal laegi

 sar par chhaya chhatri hogi

aur dhuup ghata ban jaegi

jab fasl kati to kya dekha

kuchh dard ke tuute gajre the

kuchh zakhmi khvab the kanton par

kuchh khakistar se kajre the

aur duur ufuq ke sagar men

kuchh dolte dubte bajre the

ab paanv khadaun dhul-bhari

aur jism pe jog ka chola hai

sab sangi sathi bhed-bhare

koi maasa hai koi tola hai

is taak men ye is ghaat men vo

har or thagon ka tola hai

ab ghaat na ghar dahliz na dar

ab paas raha hai kya baaba

bas tan ki gathri baaqi hai

ja ye bhi tu le ja baaba
ham basti chhode jaate hain

tu apna qarz chuka baaba

Hamdard

ai dil un aankhon par na ja

jin mein wafur-e-ranj se

kuchh der ko tere liye

aansu agar lahra gae

ye chand lamhon ki chamak

jo tujh ko pagal kar gai

in jugnuon ke nur se

chamki hai kab wo zindagi

jis ke muqaddar mein rahi

subh-e-talab se tirgi

kis soch mein gum-sum hai tu

ai be-KHabar nadan na ban

teri fasurda ruh ko

chahat ke kanTon ki talab

aur us ke daman mein faqat

hamdardiyon ke phul hain

Mai ki do roz ka mehman tere shahar mien tha

main ki do roz ka mehman tere shahr mein tha

ab chala hun to koi faisla kar bhi na saka

zindagi ki ye ghaDi TuTta pul ho jaise

ki Thahar bhi na sakun aur guzar bhi na sakun

mehrban hain teri aankhen magar ai munis-e-jaan

in se har zaKHm-e-tamanna to nahin bhar sakta

aisi be-nam masafat ho to manzil kaisi

koi basti ho basera hi nahin kar sakta

ek muddat hui laila-e-watan se bichhDe

ab bhi riste hain magar zaKHm purane mere

jab se sarsar mere gulshan mein chali hai tab se

barg-e-awara ki manind Thikane mere

aaj is shahr kal us shahr ka rasta lena

hae kya chiz gharib-ul-watani hoti hai

ye safar itna musalsal hai ki thak haar ke bhi

baiTh jata hun jahan chhanw ghani hoti hai

tu bhi aisa hi dil-aram shajar hai jis ne

mujh ko is dasht-e-qayamat se bachae rakha

ek aashufta-sar o aabla-pa ki KHatir

 kabhi zulfon kabhi palkon ko bichhae rakha

dukh to har waqt taaqub mein raha karte hain

yun panahon mein kahan tak koi rah sakta hai

kab talak ret ki diwar sambhaale koi

wo thakan hai ki mera jism bhi Dah sakta hai

ajnabi log nae log parai galiyan

zindagi aaise qarain mein kaTegi kaise

teri chahat bhi muqaddas teri qurbat bhi bahisht

des paradesh ki tafriq ghaTegi kaise

na-guzir aaj hua jaise bichhaDna apna

kal kisi roz mulaqat bhi imkan mein hai

main ye pairahan-e-jaan kaise badal sakta hun

ki tera hath mere dil ke gareban mein hai

Mujhse pahle tujhe

mujh se pahle tujhe jis shaKHs ne chaha us ne

shayad ab bhi tera gham dil se laga rakkha ho

ek be-nam si ummid pe ab bhi shayad

apne KHwabon ke jaziron ko saja rakkha ho

main ne mana ki wo begana-e-paiman-e-wafa

kho chuka hai jo kisi aur ki ranai mein

shayad ab lauT ke aae na teri mahfil mein

aur koi dukh na rulae tujhe tanhai mein

main ne mana ki shab o roz ke hangamon mein

waqt har gham ko bhula deta hai rafta rafta

chahe ummid ki shamen hon ki yaadon ke charagh

mustaqil boad bujha deta hai rafta rafta

phir bhi mazi ka KHayal aata hai gahe-gahe

muddaten dard ki lau kam to nahin kar saktin

zaKHm bhar jaen magar dagh to rah jata hai

duriyon se kabhi yaaden to nahin mar saktin

ye bhi mumkin hai ki ek din wo pashiman ho kar

tere pas aae zamane se kinara kar le

tu ki masum bhi hai zud-faramosh bhi hai

us ki paiman-shikani ko bhi gawara kar le

aur main jis ne tujhe apna masiha samjha

ek zaKHm aur bhi pahle ki tarah sah jaun

jis pe pahle bhi kai ahd-e-wafa TuTe hain

isi do-rahe pe chup-chap khaDa rah jaun

Qurb-e-jana ka na maikhane ka mausam aya

qurb-e-jaanan ka na mai-KHane ka mausam aaya

phir se be-sarfa ujaD jaane ka mausam aaya

kunj-e-ghurbat main kabhi gosha-e-zindan mein the hum

jaan-e-jaan jab bhi tere aane ka mausam aaya

ab lahu rone ki KHwahish na lahu hone ki

dil-e-zinda tere mar jaane ka mausam aaya

kucha-e-yar se har fasl mein guzre hain magar

shayad ab jaan se guzar jaane ka mausam aaya

koi zanjir koi harf-e-KHirad le aaya

fasl-e-gul aai ki diwane ka mausam aaya

sail-e-KHun shahr ki galiyon mein dar aaya hai 'faraaz'

aur tu KHush hai ki ghar jaane ka mausam aaya

Vehsaten badhti gayin hizra ke azar ke sath

wahshaten baDhti gain hijr ke aazar ke sath

ab to hum baat bhi karte nahin gham-KHwar ke sath

hum ne ek umr basar ki hai gham-e-yar ke sath

'mir' do din na jiye hijr ke aazar ke sath

ab to hum ghar se nikalte hain to rakh dete hain

taq par izzat-e-sadat bhi dastar ke sath

is qadar KHauf hai ab shahr ki galiyon mein ki log

chap sunte hain to lag jate hain diwar ke sath

ek to KHwab liye phirte ho galiyon galiyon

us pe takrar bhi karte ho KHaridar ke sath

shahr ka shahr hi naseh ho to kya kijiyega

warna hum rind to bhiD jate hain do-chaar ke sath

hum ko us shahr mein tamir ka sauda hai jahan

log meamar ko chun dete hain diwar ke sath

jo sharaf hum ko mila kucha-e-jaanan se 'faraaz'

su-e-maqtal bhi gae hain usi pindar ke sath

Wo ishq kya hai jo daman ko paak chahta hai

misal-e-dast-e-zuleKHa tapak chahta hai

ye dil bhi daman-e-yusuf hai chaak chahta hai

duaen do mere qatil ko tum ki shahr ka shahr

usi ke hath se hona halak chahta hai

fasana-go bhi kare kya ki har koi sar-e-bazm

maal-e-qissa-e-dil dardnak chahta hai

idhar udhar se kai aa rahi hain aawazen

aur us ka dhyan bahut inhimak chahta hai

zara si gard-e-hawas dil pe lazmi hai 'faraaz'

wo ishq kya hai jo daman ko pak chahta hai

Ajab junun-e-masafat mein ghar se nikla tha

ajab junun-e-masafat mein ghar se nikla tha

KHabar nahin hai ki suraj kidhar se nikla tha

ye kaun phir se unhin raston mein chhoD gaya

abhi abhi to azab-e-safar se nikla tha

ye tir dil mein magar be-sabab nahin utra

koi to harf lab-e-chaaragar se nikla tha

ye ab jo aag bana shahr shahr phaila hai

yahi dhuan mere diwar-o-dar se nikla tha

main raat TuT ke roya to chain se soya

ki dil ka zahr meri chashm-e-tar se nikla tha

ye ab jo sar hain KHamida kulah ki KHatir

ye aib bhi to hum ahl-e-hunar se nikla tha

wo qais ab jise majnun pukarte hain 'faraaz'

teri tarah koi diwana ghar se nikla tha

Isse pehle ki bewafa ho jayen

is se pahle ki be-wafa ho jaen

kyun na ai dost hum juda ho jaen

tu bhi hire se ban gaya patthar

hum bhi kal jaane kya se kya ho jaen

tu ki yakta tha be-shumar hua

hum bhi TuTen to ja-ba-ja ho jaen

hum bhi majburiyon ka uzr karen

phir kahin aur mubtala ho jaen

hum agar manzilen na ban pae

manzilon tak ka rasta ho jaen

der se soch mein hain parwane

rakh ho jaen ya hawa ho jaen

ishq bhi khel hai nasibon ka

KHak ho jaen kimiya ho jaen

ab ke gar tu mile to hum tujh se

aise lipTen teri qaba ho jaen

bandagi hum ne chhoD di hai 'faraaz'

kya karen log jab KHuda ho jaen

FAIZ AHMAD FAIZ
Mujhse pahli si mohabbat mere mahboob na
mang

mujh se pahli si mohabbat meri mahbub na mang

main ne samjha tha ki tu hai to daraKHshan hai hayat

tera gham hai to gham-e-dahr ka jhagDa kya hai

teri surat se hai aalam mein bahaaron ko sabaat

teri aankhon ke siwa duniya mein rakkha kya hai

tu jo mil jae to taqdir nigun ho jae

yun na tha main ne faqat chaha tha yun ho jae

aur bhi dukh hain zamane mein mohabbat ke siwa

rahaten aur bhi hain wasl ki rahat ke siwa

an-ginat sadiyon ke tarik bahimana tilism

resham o atlas o kamKHab mein bunwae hue

ja-ba-ja bikte hue kucha-o-bazar mein jism

KHak mein luThDe hue KHun mein nahlae hue

jism nikle hue amraaz ke tannuron se

pip bahti hui galte hue nasuron se

lauT jati hai udhar ko bhi nazar kya kije

ab bhi dilkash hai tera husn magar kya kije

aur bhi dukh hain zamane mein mohabbat ke siwa

 rahaten aur bhi hain wasl ki rahat ke siwa

mujh se pahli si mohabbat meri mahbub na mang

Nisar mai teri galiyon ke ai watan ke jahan

nisar main teri galiyon ke ai watan ki jahan

chali hai rasm ki koi na sar uTha ke chale

jo koi chahne wala tawaf ko nikle

nazar chura ke chale jism o jaan bacha ke chale

hai ahl-e-dil ke liye ab ye nazm-e-bast-o-kushad

ki sang-o-KHisht muqayyad hain aur sag aazad

bahut hai zulm ke dast-e-bahana-ju ke liye

jo chand ahl-e-junun tere nam-lewa hain

bane hain ahl-e-hawas muddai bhi munsif bhi

kise wakil karen kis se munsifi chahen

magar guzarne walon ke din guzarte hain

tere firaq mein yun subh o sham karte hain

bujha jo rauzan-e-zindan to dil ye samjha hai

ki teri mang sitaron se bhar gai hogi

chamak uThe hain salasil to hum ne jaana hai

ki ab sahar tere ruKH par bikhar gai hogi

gharaz tasawwur-e-sham-o-sahar mein jite hain

giraft-e-saya-e-diwar-o-dar mein jite hain

 yunhi hamesha ulajhti rahi hai zulm se KHalq

na un ki rasm nai hai na apni rit nai

yunhi hamesha khilae hain hum ne aag mein phul

na un ki haar nai hai na apni jit nai

isi sabab se falak ka gila nahin karte

tere firaq mein hum dil bura nahin karte

gar aaj tujh se juda hain to kal baham honge

ye raat bhar ki judai to koi baat nahin

gar aaj auj pe hai tala-e-raqib to kya

ye chaar din ki KHudai to koi baat nahin

jo tujh se ahd-e-wafa ustuwar rakhte hain

ilaj-e-gardish-e-lail-o-nahaar rakhte hain

Do ishq

taza hain abhi yaad mein ai saqi-e-gulfam

wo aks-e-ruKH-e-yar se lahke hue ayyam

wo phul si khulti hui didar ki saat

wo dil sa dhaDakta hua ummid ka hangam

ummid ki lau jaga gham-e-dil ka nasiba

lo shauq ki tarsi hui shab ho gai aaKHir

lo Dub gae dard ke be-KHwab sitare

ab chamkega be-sabr nigahon ka muqaddar

is baam se niklega tere husn ka KHurshid

is kunj se phuTegi kiran rang-e-hina ki

is dar se bahega teri raftar ka simab

us rah pe phailegi shafaq teri qaba ki

phir dekhe hain wo hijr ke tapte hue din bhi

jab fikr-e-dil-o-jaan mein fughan bhul gai hai

har shab wo siyah bojh ki dil baiTh gaya hai

har subh ki lau tir si sine mein lagi hai

tanhai mein kya kya na tujhe yaad kiya hai

kya kya na dil-e-zar ne DhunDi hain panahen

 aankhon se lagaya hai kabhi dast-e-saba ko

Dali hain kabhi gardan-e-mahtab mein bahen

chaha hai isi rang mein laila-e-watan ko

taDpa hai isi taur se dil us ki lagan mein

DhunDi hai yunhi shauq ne aasaish-e-manzil

ruKHsar ke KHam mein kabhi kakul ki shikan mein

us jaan-e-jahan ko bhi yunhi qalb-o-nazar ne

hans hans ke sada di kabhi ro ro ke pukara

pure kiye sab harf-e-tamanna ke taqaze

har dard ko ujyala har ek gham ko sanwara

wapas nahin phera koi farman junun ka

tanha nahin lauTi kabhi aawaz jaras ki

KHairiyyat-e-jaan rahat-e-tan sehhat-e-daman

sab bhul gain maslihaten ahl-e-hawas ki

is rah mein jo sab pe guzarti hai wo guzri

tanha pas-e-zindan kabhi ruswa sar-e-bazar

garje hain bahut shaiKH sar-e-gosha-e-mimbar

kaDke hain bahut ahl-e-hakam bar-sar-e-darbar

chhoDa nahin ghairon ne koi nawak-e-dushnam

chhuTi nahin apnon se koi tarz-e-malamat

is ishq na us ishq pe nadim hai magar dil

har dagh hai is dil mein ba-juz-dagh-e-nadamat

Tanhai

phir koi aaya dil-e-zar nahin koi nahin

rah-rau hoga kahin aur chala jaega

Dhal chuki raat bikharne laga taron ka ghubar

laDkhaDane lage aiwanon mein KHwabida charagh

so gai rasta tak tak ke har ek rahguzar

ajnabi KHak ne dhundla diye qadmon ke suragh

gul karo shamen baDha do mai o mina o ayagh

apne be-KHwab kiwaDon ko muqaffal kar lo

ab yahan koi nahin koi nahin aaega

Na deed hai na sukhan

na did hai na suKHan ab na harf hai na payam

koi bhi hila-e-taskin nahin aur aas bahut hai

umid-e-yar nazar ka mizaj dard ka rang

tum aaj kuchh bhi na puchho ki dil udas bahut hai

Rat yun dil mein teri khoyi huyi yad aayi

raat yun dil mein teri khoi hui yaad aai

jaise virane mein chupke se bahaar aa jae

jaise sahraon mein haule se chale baad-e-nasim

jaise bimar ko be-wajh qarar aa jae

Ab ki wabasta hai us husn ki yaden

aa ki wabasta hain us husn ki yaaden tujh se

jis ne is dil ko pari-KHana bana rakkha tha

jis ki ulfat mein bhula rakkhi thi duniya hum ne

dahr ko dahr ka afsana bana rakkha tha

aashna hain tere qadmon se wo rahen jin par

us ki madhosh jawani ne inayat ki hai

karwan guzre hain jin se usi ranai ke

jis ki in aankhon ne be-sud ibaadat ki hai

tujh se kheli hain wo mahbub hawaen jin mein

us ke malbus ki afsurda mahak baqi hai

tujh pe barsa hai usi baam se mahtab ka nur

jis mein biti hui raaton ki kasak baqi hai

tu ne dekhi hai wo peshani wo ruKHsar wo honT

zindagi jin ke tasawwur mein luTa di hum ne

tujh pe uTThi hain wo khoi hui sahir aankhen

tujh ko malum hai kyun umr ganwa di hum ne

hum pe mushtarka hain ehsan gham-e-ulfat ke

itne ehsan ki ginwaun to ginwa na sakun

hum ne is ishq mein kya khoya hai kya sikha hai

 juz tere aur ko samjhaun to samjha na sakun

aajizi sikhi gharibon ki himayat sikhi

yas-o-hirman ke dukh-dard ke mani sikhe

zer-daston ke masaib ko samajhna sikha

sard aahon ke ruKH-e-zard ke mani sikhe

jab kahin baiTh ke rote hain wo bekas jin ke

ashk aankhon mein bilakte hue so jate hain

na-tawanon ke niwalon pe jhapaTte hain uqab

bazu tole hue manDlate hue aate hain

jab kabhi bikta hai bazar mein mazdur ka gosht

shah-rahon pe gharibon ka lahu bahta hai

aag si sine mein rah rah ke ubalti hai na puchh

apne dil par mujhe qabu hi nahin rahta hai

Subh-e-azadi

ye dagh dagh ujala ye shab-gazida sahar

wo intizar tha jis ka ye wo sahar to nahin

ye wo sahar to nahin jis ki aarzu le kar

chale the yar ki mil jaegi kahin na kahin

falak ke dasht mein taron ki aaKHiri manzil

kahin to hoga shab-e-sust-mauj ka sahil

kahin to ja ke rukega safina-e-gham dil

jawan lahu ki pur-asrar shah-rahon se

chale jo yar to daman pe kitne hath paDe

dayar-e-husn ki be-sabr KHwab-gahon se

pukarti rahin bahen badan bulate rahe

bahut aziz thi lekin ruKH-e-sahar ki lagan

bahut qarin tha hasinan-e-nur ka daman

subuk subuk thi tamanna dabi dabi thi thakan

suna hai ho bhi chuka hai firaq-e-zulmat-o-nur

suna hai ho bhi chuka hai visal-e-manzil-o-gam

badal chuka hai bahut ahl-e-dard ka dastur

nashat-e-wasl halal o azab-e-hijr haram

jigar ki aag nazar ki umang dil ki jalan

 kisi pe chaara-e-hijran ka kuchh asar hi nahin

kahan se aai nigar-e-saba kidhar ko gai

abhi charagh-e-sar-e-rah ko kuchh KHabar hi nahin

abhi girani-e-shab mein kami nahin aai

najat-e-dida-o-dil ki ghaDi nahin aai

chale-chalo ki wo manzil abhi nahin aai

Guzar rahe hain shab o roz tum nahi ati

guzar rahe hain shab o roz tum nahin aatin

riyaz-e-zist hai aazurda-e-bahaar abhi

mere KHayal ki duniya hai sogwar abhi

jo hasraten tere gham ki kafil hain pyari

abhi talak meri tanhaiyon mein basti hain

tawil raaten abhi tak tawil hain pyari

udas aankhen teri did ko tarasti hain

bahaar-e-husn pe pabandi-e-jafa kab tak

ye aazmaish-e-sabr-e-gurez-pa kab tak

qasam tumhaari bahut gham uTha chuka hun main

ghalat tha dawa-e-sabr-o-shakeb aa jao

qarar-e-KHatir-e-betab thak gaya hun main

Hum par tumhari chah ka ilzam hi to hai

hum par tumhaari chah ka ilzam hi to hai

dushnam to nahin hai ye ikram hi to hai

karte hain jis pe tan koi jurm to nahin

shauq-e-fuzul o ulfat-e-nakaam hi to hai

dil muddai ke harf-e-malamat se shad hai

ai jaan-e-jaan ye harf tera nam hi to hai

dil na-umid to nahin nakaam hi to hai

lambi hai gham ki sham magar sham hi to hai

dast-e-falak mein gardish-e-taqdir to nahin

dast-e-falak mein gardish-e-ayyam hi to hai

aaKHir to ek roz karegi nazar wafa

wo yar-e-KHush-KHisal sar-e-baam hi to hai

bhigi hai raat 'faiz' ghazal ibtida karo

waqt-e-sarod dard ka hangam hi to hai

Intizar

guzar rahe hain shab o roz tum nahin aatin

riyaz-e-zist hai aazurda-e-bahaar abhi

mere KHayal ki duniya hai sogwar abhi

jo hasraten tere gham ki kafil hain pyari

abhi talak meri tanhaiyon mein basti hain

tawil raaten abhi tak tawil hain pyari

udas aankhen teri did ko tarasti hain

bahaar-e-husn pe pabandi-e-jafa kab tak

ye aazmaish-e-sabr-e-gurez-pa kab tak

qasam tumhaari bahut gham uTha chuka hun main

ghalat tha dawa-e-sabr-o-shakeb aa jao

qarar-e-KHatir-e-betab thak gaya hun main

Dono jahan teri mohabbat me har ke

donon jahan teri mohabbat mein haar ke

wo ja raha hai koi shab-e-gham guzar ke

viran hai mai-kada KHum-o-saghar udas hain

tum kya gae ki ruTh gae din bahaar ke

ek fursat-e-gunah mili wo bhi chaar din

dekhe hain hum ne hausle parwardigar ke

duniya ne teri yaad se begana kar diya

tujh se bhi dil-fareb hain gham rozgar ke

bhule se muskura to diye the wo aaj 'faiz'

mat puchh walwale dil-e-na-karda-kar ke

Nahin nigah me manzil to justaju si sahi

nahin nigah mein manzil to justuju hi sahi

nahin visal mayassar to aarzu hi sahi

na tan mein KHun faraham na ashk aankhon mein

namaz-e-shauq to wajib hai be-wuzu hi sahi

kisi tarah to jame bazm mai-kade walo

nahin jo baada-o-saghar to haw-hu hi sahi

gar intizar kaThin hai to jab talak ai dil

kisi ke wada-e-farda ki guftugu hi sahi

dayar-e-ghair mein mahram agar nahin koi

to 'faiz' zikr-e-watan apne ru-ba-ru hi sahi

Gulon mein rang bhare bad-e-bahar chale

gulon mein rang bhare baad-e-nau-bahaar chale

chale bhi aao ki gulshan ka karobar chale

qafas udas hai yaro saba se kuchh to kaho

kahin to bahr-e-KHuda aaj zikr-e-yar chale

kabhi to subh tere kunj-e-lab se ho aaghaz

kabhi to shab sar-e-kakul se mushk-bar chale

baDa hai dard ka rishta ye dil gharib sahi

tumhaare nam pe aaenge gham-gusar chale

jo hum pe guzri so guzri magar shab-e-hijran

hamare ashk teri aaqibat sanwar chale

huzur-e-yar hui daftar-e-junun ki talab

girah mein le ke gareban ka tar tar chale

maqam 'faiz' koi rah mein jacha hi nahin

jo ku-e-yar se nikle to su-e-dar chale

Tum aye ho na shab-e-itnizar guzri hai

tum aae ho na shab-e-intizar guzri hai

talash mein hai sahar bar bar guzri hai

junun mein jitni bhi guzri ba-kar guzri hai

agarche dil pe KHarabi hazar guzri hai

hui hai hazrat-e-naseh se guftugu jis shab

wo shab zarur sar-e-ku-e-yar guzri hai

wo baat sare fasane mein jis ka zikr na tha

wo baat un ko bahut na-gawar guzri hai

na gul khile hain na un se mile na mai pi hai

ajib rang mein ab ke bahaar guzri hai

chaman pe ghaarat-e-gul-chin se jaane kya guzri

qafas se aaj saba be-qarar guzri hai

Humne sab sher mein sanvaare the

hum ne sab sher mein sanware the

hum se jitne suKHan tumhaare the

rang-o-KHushbu ke husn-o-KHubi ke

tum se the jitne istiare the

tere qaul-o-qarar se pahle

apne kuchh aur bhi sahaare the

jab wo lal-o-gohar hisab kiye

jo tere gham ne dil pe ware the

mere daman mein aa gire sare

jitne tasht-e-falak mein tare the

umr-e-jawed ki dua karte

'faiz' itne wo kab hamare the