Gaan na inhoud

Drie Reines

in Wikipedia, die vrye ensiklopedie
Die Drie Reines.

Die Drie Reines (Chinees: 三清, Sanqing) is die drie-eenheid van Taoïsme, die drie belangrikste gode in die panteon. Hulle word beskou as reine manifestasies van die Tao en die oorsprong van alle redelike wesens. Volgens die geskrif Daodejing het "die Tao Een voortgebring, Een het Twee voortgebring, Twee het Drie voortgebring en Drie het Alle dinge voortgebring".

Die Drie Reines is: Yuanshi Tianzun, Lingbao Tianzun en Daode Tianzun. Elkeen verteenwoordig ’n godheid en ’n hemel. Yuanshi heers oor die eerste hemel, Yu-Qing, wat in die Jadeberge geleë is. Die ingang na hierdie hemel heet die Goue Deur. Lingbao regeer oor die hemel Shang-Qing en Daode oor Tai-Qing. Die drie word dikwels as oueres op trone voorgestel.

Skole van Taoïstiese denke het om elk van hierdie drie godhede ontwikkel. Taoïstiese alchemie was ’n groot deel van dié skole, want elkeen van die Drie Reines verteenwoordig een van die drie noodsaaklike dele van die liggaam: jing, qi en shen. Die vergadering van al drie Reines het gelei tot die terugkeer na die Tao.

Aangesien die Drie Reines manifestasies van hemelse oerenergie is, is hulle vormloos. Om hul rol in die Skepping te illustreer, word hulle egter as bejaarde gode uitgebeeld in die drie basiese kleure waarvan alle kleure afkomstig is: rooi, blou en geel. Elkeen hou ’n goddelike voorwerp vas wat met hul taak verbind word. Yuanshi Tianzun word gewoonlik uitgebeeld met ’n pêrel, wat dui op sy rol as die skepper van die heelal uit chaos. Lingbao Tianzun se septer verteenwoordig gesag: Die tweede fase van die Skepping was waar die jang van die jin geskei is en die Wet van Dinge ingestel is. Lingbao Tianzun het toe sy plek links van Yuanshi Tianzun ingeneem. Later, toe alles klaar was, het Daode Tianzun sy plek regs ingeneem, met die waaier wat die voltooiing van die Skepping simboliseer, asook die verspreiding van die Tao na alle mense.

Bronne

[wysig | wysig bron]
  • Barrow, Terrence; Williams, Charles Alfred Speed (2006). Chinese Symbolism and Art Motifs. Singapore: Tuttle Publishing. p. 372.
  • Ching, Julie (2000). The Religious Thought of Chu His. Oxford: Oxford University Press US. pp. 168–169.
  • Fowler, Jeaneane (2005). An introduction to the Philosophy and Religion of Taoism. Brighton; Portland: Sussex Academic Press. pp. 202–205.
  • Dobbins, Frank Stockton; Williams, Samuel Wells; Halls, Isaac Hollister (1883). Errors Chains. California: Standard publishing house. p. 224.
  • Morgan, Harry T. (1972). Chinese Symbols and Superstitions. Detroit: Gale Research Company. p. 148.
  • "The Taoist Deities". 19 Oktober 2008.
  • Werner, E.T.C. (2003). Myths and Legends of China. Kessinger Publishing. pp. 124–126.
  • Whiting, Roger (1991). Religions for Today. Cheltemham: Nelson Thorne. p. 14.
  • Yudelove, Eric (1997). 100 Days to Better Health, Good Sex and Long Life. Saint Paul, Minnesota: Llewellyn Worldwide. p. 114.
  • "Yu Di". Microsoft Encarta Online Encyclopedia. Microsoft. 2008. Geargiveer vanaf die oorspronklike op 28 April 2009. Besoek op 15 Junie 2017.
  • "Yuan Shi". Microsoft Encarta Online Encyclopedia. Microsoft. 2008. Geargiveer vanaf die oorspronklike op 7 Oktober 2008. Besoek op 15 Junie 2017.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Drie_Reines&oldid=2679115"