Louis XVI vo Frankriich
| Ludwig XVI. | |
|---|---|
| Herzog vo Berry (1754–65) Dauphin vo Frankriich (1765–74) König vo Frankriich und Navarra (1774–91) König vo de Franzose (1791–92) | |
Louis XVI | |
| Regierigsziit | 10. Mai 1774 - 10. August 1792 |
| Chrönig | 11. Juni 1775, Reims |
| Uf d Wält cho | 23. August 1754 |
| Geburtsort | Versailles |
| Gstorbe | 21. Januar 1793 |
| Dodesort | Paris |
| Begrabe | schlussändlig in dr Basilika vo Saint Denis |
| Vorgänger | Louis XV |
| Verhürotet mit | Marie Antoinette vo Östriich (1755–93) |
Dr Ludwig XVI. (Louis XVI Auguste) (* 23. August 1754 z Versailles; † 21. Januar 1793 z Paris) isch vo 1774 bis 1791 König vo Frankriich und Navarra gsi, vo 1791 bis 1792 König vo de Franzose in erä konstitutionelle Monarchii. Noch em Sturm uf d Tuilerie am 10. August 1792 isch er abgesetzt und vor der Nationalversammlig wäge Hochverrot ageklagt und schuldig gfunde worde. Am Morge vom 21. Januar 1793 isch er as Bürger Ludwig Capet vom Scharfrichter Charles-Henri Sanson mit dr Guillotine gchöpft worde.
Währed der Französische Revolution het män em dr Familiename Capet ge, noch em Hugo Capet, em Gründer vom französische Herrschergschlächt. Mit dr Bezeichnig Bürger Ludwig Capet isch si Status as König in Frog gstellt worde.
Herrschaft
[ändere | Quälltäxt bearbeite]Dr Louis isch mit nünzähni noch em Dod vo siim Grossvater, em Louis XV, König worde und het ä Königriich gerbt, wo dief verschuldet gsi isch. 1774 het er dr Anne Robert Jacques Turgot as Finanzminister iigsetzt, aber däm siini Reforme si vo de Adlige und de parlements abglehnt worde, und dr Turgot het müesse go. Zu dere Ziit si no neui groossi Usgobe gmacht worde, wil Frankriich si Flotte vergrösseret het und denn im Amerikanische Unabhängikeitschrieg d Koloniste gege Grossbritannie understützt het, ä Schritt wo si neu Finanzminister, dr Jacques Necker befürwordet, wo aber s Land finanziell no ganz ruiniert het.
Ass er aber im ä Chrieg gege d Ängländer gwunne het, het en für ä baar Johr populär gmacht. Gege s Budgetdefizit het er aber nüt chönne mache, wil d Massnahme so unpopulär und dr Adel so uniisichtig gsi si. Won er denn 1879 d Generalständ iiberuefe het, het dr Dritt Stand (d Bürger) rasch d Kontrolle über d Gschehnis a sich grisse und im Louis siini Entscheid si immer z spot cho und hüfig falsch gsi, was die Moderate under de Revolutionäre gschwecht het, wo nume die absoluti Macht, wo die französische König währed fast zwei Johrhundert gha und missbruucht hai, hai welle iischränke. So isch d Unterstützig für d Monarchii immer chliiner worde und das het schliesslig 1793 zum Louis siiner Hiirichtig gfüehrt. Churz noch ihm het mä au si Frau, d Marie Antoinette, gchöpft.
Er isch z erst uf em Friidhof de la Madeleine z Paris begrabe worde, wo mä alli Hiigrichtete vom Place de la Révolution begrabe het. Noch em Fall vom Napoleon Bonaparte isch si Liiche 1815 in d Basilika Saint-Denis überfüehrt worde.
Lueg
[ändere | Quälltäxt bearbeite]Literatur
[ändere | Quälltäxt bearbeite]- Vincent Cronin: Ludwig XVI. und Marie-Antoinette - Eine Biographie. Claassen, Düsseldorf 1974.
- Bernard Fay: Ludwig XVI. - Der Sturz der französischen Monarchie. Wilhelm Heyne, München 1989
- Peter Klaus Hartmann: Ludwig XVI. 1774-1789/92 in: Ders. (Hg.): Französische Könige und Kaiser der Neuzeit. Von Ludwig XII. bis Napoleon III. 1498-1870, 2. Aufl. Beck, München 2006, S. 272-307, ISBN 3-406-54740-0
- Evelyne Lever: Ludwig XVI. Klett-Cotta, Stuttgart 1988.
- Angela Taeger: Ludwig XVI. (1754-1793), Kohlhammer, ISBN 9783170184756.