Fado
El fado (na idioma portugués, «destino») es un estilo musical de Portugal, o mas bien, el expresion mas conocido del musica de Portugal. Ta expresa el fado con el maga experiencia del vida a traves del canto. Generalmente ta canta este un solo persona, acompañao por el «viola» (español guitarra) y el portugues guitarra. El maga tema mas cantao na el fado ay el melancolia, el nostalgia o maga chico cuento del diario vida del maga humilde barrio, pero especialmente el fatalismo y el frustracion.
Na cuanto al maga documento, ta incuntra kita con el primero mencion del fado na 1838, maskin tiene quien ta identifica el suyo origen con el maga canto del maga gente del mar, inspirado na el soledad, el nostalgia y el maga balanceo del maga barco sobre el agua. A pesar del maga numeroso investigador —Gonçalo Sampaio, Mascarenhas Barreto, Pinto de Carvalho o Rodney Gallop— queda pa un misterio el suyo maga orígen. Ta cree cuanto maga gente que ya nace el fado na maga barrio alrededor del puerto de Lisboa, entre maga clase muy mixto: el maga pobre, marinero, obrero, rufian, chamicera, gente bohemia de Alfama, Bairro Alto y maga otro.
El deste maga origen, no comprobao, ta conecta con el fado con el maga «Cantiga d'Amigo» siguro con el maga influencia de Africa o el maga portugues colonia.
Ta ofrece uno del maga mejor definicion del fado si Amália Rodrigues (1920–1999), considerao el artistico embajadora de Portugal, «el fado es un cosa muy misterioso, debe con este senti, debe nace con el angustioso lado del maga gente, debe senti como quien no tene ni con maga ambicion, ni con maga deseo. Un persona ... como si no ta existe pa. Aquel persona ay yo y por eso ya nace para canta con el fado». Ya pone si Amália con el emocion y voz del fado al maga grande portugues poeta, tal como O`Neill, Manuel Alegre, Homem de Melo y Camoens. Na uno del suyo mas celebre cancion «Todo esto es fado» (Plantilla:Lang-pt} ta canta ele:
| Portugues | Chavacano |
|---|---|
| Amor ciúme Cinzas e lume Dor e pecado Tudo isto existe Tudo isto é triste Tudo isto é fado |
Amor y celos Ceniza y fuego Dolor y pecao Todo este existe Todo este es triste Todo esto es fado |
Tamen ya escribe el portugues escritor si Fernando Pessoa: «El fado no es alegre ni triste [...] Ya forma con el portugues alma cuando este no ya existe y ya desea todo sin tene fuerza para desear este [...] El fado es el fatiga del fuerte alma, el mira de desprecio de Portugal al Dios na que ya cree y que tamen ya abandona con ele [con Portugal]».
El suyo origen es sin duda popular y tiene alguno maga paralelismo con otro maga estilo relevante del mismo epoca, como el tango, el rebetiko y el flamenco. Aunque protegio por el maga oficial institucion durante el salazarista dictadura, ya sigui el maga amante de este canto con el preservacion de este durante el segundo mitad del siglo XX. Hoy el popularidad del fado es cada vez mayor, principalmente entre el maga nuevo generacion de maga portugues cantante
El portugues guitarra que pirmi ta acompaña con el fado ta conta con doce cuerda. Puede kita traza con el suyo origen al Media Edad y a un instrumento llamao «cítula». Ya aparece este instrumento na Portugal na el segundo mitad del siglo XVIII, a traves del ingles colonia na Oporto. A finales del siglo ya empeza el suyo uso na el maga salon del burguesia. Su timbre es especial e inconfundible y ya tene un tal vinculo con el lisboeta fado desde 1870. Ya varia ligeramente el maga guitarra de Lisboa y Coímbra na el suyo tamaño, afinacion y construccion. Ta conta con tres seccion el estructura del fado. Na cada uno, a veces ta suena solo el guitarra, y a veces ta acompaña con el voz del fadista.
El maga casa del fado son el maga restaurante del maga antiguo barrio de Lisboa (Bairro Alto, Alfama, Lapa o Alcântara), que muchas veces ta abre solamente por el maga noche. Despues de cena y toma con un buen vino, ta cae el intensidad del luz y tiene absoluto silencio. Despues ta sucumbi el oyente al intimo ambiente y al maga dulce voz del maga fadista. Maskin tiene maga alegre fado, que son el maga mas demandao, ta conta con mas maga portugues admirador el maga melancolico. Son maga clasico el maga musical composicion de Alfredo Marceneiro y Severa.
Na noviembre del 2011, ya inscribi el UNESCO con El fado, popular urbano canto de Portugal como integrante del Representativo Lista del Cultural Inmaterial Patrimonio del Humanidad.