Robinia

A robinia
Robinia pseudoacacia
Classifica scientifica
Regnu	Plantae
Divisione	Magnoliophyta
Classa	Magnoliopsida
Ordine	Fabales
Famiglia	Fabaceae
Generu	Robinias
Nomu binuminale
Robinia pseudoacacia Linnaeus, 1753

A robinia (Robinia pseudoacacia) hè una spezia d'arburu di a famiglia di e Fabacee.

Descrizzione

A robinia hè un arburu chì pò ghjunghje sin'à 20 o ancu 30 metri per 1 metru di diamitru. Face à spessu e calature è forma i buschetti qualchì volta invadenti. U fustu grisgiu brunu hè à spessu doppiu incù una curteccia spessa prufundamente caravunata in u sensu longitudinale. E calature è ghjovani rami sò zimbrunute.

E casce, chì sò cadente, appariscenu tardi di veranu. Sò opposte à duie à duie, incù un grande numeru (da 9 à 23) di piccule fugliole ovale.

I fiori chì sbuccianu trà maghju è ghjugnu sò bianche, in gaspe pindente profumate è melifere, è longhe da 10 à 25 cm. A robinia hè un'impurtante pianta melifera ma a secrezione di nettaru ùn hè abundante ch'è da una timperatura superiore à 20 C è hè arristata da e timperature basse è da a piova.

I frutti sò guaine sciacciate, longhe da 7 à 12 cm, chì cuntenenu 4 à 12 granelli bruni da sei à sette millimetri di longu incù un tegumentu assai duru. Fermanu fissati à l'arburu bellu dopu a caduta di e casce.

I ghjovani arburi sò à spessu zimbrunuti, ma accade suvente ch'è l'arburi maturi ùn aghjenu micca spine.

Distribuzione è ambiente

A robinia hè nativa di u livante di i Stati Uniti, ma l'aria di ripartizione d'origine esatta ùn hè micca cunnisciuta incù accuratezza chì l'arburu hè statu cultivatu è si trova à i ghjorni d'oghje annantu à tuttu u cuntinente, in i 48 stati inferiori, u livante di u Canada è a Colombia Britannica. L'aria di ripartizione nativa seria cumposta di duie pupulazione distinte, una cintrata annantu à l'Appalache, da a Pennsilvania à u nordu di a Georgia, è l'altra, à punente, intornu à l'altupianu d'Ozark è di i monti Ouachita in Arkansas, Oklahoma è Missouri.

L'aria di ripartizione attuale di a robinia hè stata stesa da l'omu, l'arburu essendu statu distribuitu per l'accunciamentu lucale è cumprende avà u Pacchistanu, l'India, l'Australia, u Canada, a China, l'Europa, l'India, l'Africa Suttana è Suprana, e rigione timperate d'Asia, di Nova Zelanda è d'America Suttana.

A robinia hè un esempiu interessante di a manera chì una spezia vegetale pò esse cunsiderata cum'è invadente, ancu annantu à u cuntinente chì ne hè originaria. Per indettu, in u punente di i Stati Uniti, a rigione di a Nuvella Ingliterra, u nordu di a California è u Midwest, a robinia hè cunsiderata cum'è una spezia invadente.