Telecinesia

Concepción artística da telecinesia espontánea da revista francesa La Vie Mysterieuse (1911).

A telecinesia é o movemento ou distorsión de obxectos co poder da mente, un feito considerado un engano pola maioría da comunidade científica pero que é defendido polos estudosos da parapsicoloxía. A primeira mención ao termo data dun escrito de 1890 de Alexander N. Aksakof. Orixinalmente, facía mención a movementos causados por seres sobrenaturais (anxos, demos ou espíritos) pero máis adiante pasou a significar a modificación consciente de corpos físicos sen tocalos, só coa enerxía saída do cerebro.

Non hai ningún experimento aceptado universalmente que probe a existencia deste fenómeno, posto que as probas e observacións ou ben non eran replicábeis ou tiñan carencias metodolóxicas que invalidaban as súas conclusións. Os psicólogos explican a crenza na telecinesia pola tendencia a buscar patróns explicativos de sucesos anormais (clustering illusion) ou polo que rodea o espectáculo da maxia, que causa unha suspensión da credulidade. James Randi Educational Foundation ofrece un premio dun millón de dólares a quen poida demostrar sen dúbidas a existencia da telecinesia ou outras actividades similares, até o momento sen outorgar.

A telecinesia na ficción

Os poltergeist e outros sucesos parecidos poden incluírse dentro da telecinesia, amplamente presente na ficción, incluíndo por exemplo:

• Carrie (1976), de Stephen King
• A guerra das galaxias
• Yumi en Código Lyoko
• Varios Pokémon
• Magos mitolóxicos, como Merlín, ou modernos, como Lord Voldemort
• Akira
• Looper (2012), de Rian Johnson
• Matilda de Roald Dahl
• O anel de The Crazy Haaks 2
• Jean Grey dos X-Men e Scarlet Witch dos Avengers nos cómics de Marvel.