გარემოს დაცვისა და სოფლის მეურნეობის სამინისტრო ტრადიციულად ნიადაგის მსოფლიო დღის აღნიშვნას შეუერთდა

„ჯანსაღი ნიადაგი - ჯანსაღი ქალაქებისთვის“ - 2025 წლის გზავნილი განსაკუთრებულ ყურადღებას ამახვილებს ურბანულ გარემოში ნიადაგის დაცვისა და მართვის მნიშვნელოვან როლზე.

ღონისძიება, რომელიც გარემოსდაცვითი ინფორმაციისა და განათლების ცენტრის ორგანიზებით ჩატარდა, მიზნად ისახავდა საქართველოში ნიადაგმცოდნეობის მიმართულების განვითარებას, ახალგაზრდა სპეციალისტების მხარდაჭერას და მოტივაციის გაზრდას.

აგრარულ და სამეცნიერო სფეროში მოღვაწე მკვლევარებსა და ახალგაზრდა პროფესიონალებს გადაეცათ ნიადაგმცოდნეობის ქართული სკოლის ერთ-ერთი ფუძემდებლის, აკადემიკოს თენგიზ (გიზო) ურუშაძის სახელობის საპატიო სიგელები.

მნიშვნელოვანია, რომ გადასაცემ საპატიო სიგელებს შორის ერთ-ერთი მიენიჭა საქართველოს ტექნიკური უნივერსიტეტის სამთო გეოლოგიური და მთის მდგრადი განვითარების ფაკულტეტის ასოცირებულ პროფესორს, შორენა კუპრეიშვილს.

მისი პროფესიული საქმიანობა, მეცნიერების პოპულარიზაციაში შეტანილი წვლილი და სტუდენტებთან მუშაობის მაღალი ხარისხი განსაკუთრებულად იქნა აღიარებული.

სტუ-ის წარმომადგენლის დაჯილდოება კიდევ ერთხელ უსვამს ხაზს უნივერსიტეტის აქტიურ ჩართულობას გარემოს დაცვის, მდგრადი განვითარების და ნიადაგმცოდნეობის პოპულარიზაციის პროცესში.

განსაკუთრებული მადლობა გარემოს დაცვისა და სოფლის მეურნეობის სამინისტროს, ღონისძიების ორგანიზატორებსა და ყველა იმ ადამიანს, ვინც სტუ-ის ჩართულობა მაღალი შეფასებით გამოეხმაურა.

ნიადაგის მსოფლიო დღე 5 დეკემბერს, გაეროს გენერალური ასამბლეის ინიციატივით, 2014 წლიდან ყოველწლიურად აღინიშნება და საქართველოსთვის  მნიშვნელოვანი პლატფორმაა გარემოსდაცვითი ცნობიერების ზრდის მიმართულებით.