Damsche Voart

De Damsche Voart es e voart in Belgie, die lopt van Brugge toet in Sluus, juste over d’Ollandsche grenze. J'is omtrent dertien kilometers lank. An de twè kantn stoat ie vul me popeliern (Marilandicapopulier), die om de zoveel tyd ommegezaagd moetn wordn omda ze t'oekd zyn (de latste kêe in 2006 langs 't êeste stik oe je van Brugge komt). Iedere kêe zettn ze nieuwe.

De voart is ôok gekend as 't Napoleongkanoal. Ze zyn in 1810 begost met 't te graven ip bevel van Napoleong en 't werk wierd gedoan deur Spoansche krygsgevangnen. Je wilde 't ie azô z'n legers kunn foerazeern buutn geschut van d'Iengelsche marine. 't En is em nie gelukt, want j'ee verloorn in Waterloo vo da die voart gereed was.

Wa was de bedoelienge?

Eigentlik was 't de bedoelienge van Brugge met de Schelde te verbiendn in Breskens, mo dadde en is 't er noois nie va gekommn. Deurda Napoleong den orlôoge verloren ad, en ze 't noois nie kunn afwerkn. 't Latste stikstje toe an Sluus 'n zoudn ze moa in 1818 begunn te graavn en, de bronn ierover zyn nie echt dudelik. Den ênen zegt da 't in 1858 was, den anderen 1856. Vor e lange istorie kort te maakn, gaan me mynder zeggen dat e 't woarstn tusschn 1818 en 1858 gegraavn wierd toe in 't middn van Sluus. 't Was Sluus zalve da 't latste stik liet graavn vo de commercie in Zeeuwsche terwe, suukrbêetn, ... me Brugge, Gent en Ostende te doen groein.

Scheepvoart

Vroegere wierd er wal degelik ip den Damschen voart gevaarn. Der woarn scheepn die derup roundvaardn me kooln, mo d'r giengn ôok mensn van Brugge noa Sluus (en omgekêerd) met de "barze". Mor in 1940 èn de Fransche legers de sifong in Oeke van den Stienker en den Blienker gedynamiteerd en 't was ton gedoan me 't voarn, wan achter den orloge was 't er gin geld nie mêe en voundn ze t'ôok nie mêe nodig vo die sifong te vermaken, want 't gieng ton zidder met den oto vo na Sluus te goan smokkeln. Daarachter en de Belgen en d'Ollanders akkôorden gesloten (en te lange latste ôok d'Europeoanders) zodat da in 't g'êel nie interessant mer was vo te smokkeln.

Vandage den dag

Buutn d'êeste vuufhounderd meters die nog dienden vo de betongfabrieke die oundertusschen ôok ol nie mer 'n bestoat, is 't allene nog vo de toeristn, de schilders en de visschers. Je kun nu tussen Brugge en Damme nog voarn up e roaderbôot Lamme Goedzak.

At in de wienter art genoeg vriest, ku j'ôok schatsen en wordt de Zwinsteedntocht Brugge - Sluus - Brugge g'organiseerd.

In de zomer is 't er 'n zwemwedstryd Damme - Brugge.

Gerelateerde artikels

Ofbeeldiengn die ier by passn ku je vien in de categorie Damse Vaart van Wikimedia Commons.