suno pi toki pona
tan jan Kepe, tan jan Lakuse, tan soweli nata, tan jan Tepo
jan Lakuse: ijo ale, soweli ale, akesi ale, a... anpa ale, sewi ale, palisa ale, a... toki! ijo ale o - jan ale o toki. ni li kalama sin. taso tenpo ni la, ni li kalama sin pi ante lili tan ni: tenpo ni ala - sina ken kute e uta mi lon lipu Jutu tan ni: ni li suno pi toki pona. mi jan Lakuse.
jan Tepo: mi jan Tepo. a.
palisa jelo Natan: mi palisa jelo Natan.
j.Lakuse: lon a. sina palisa jelo li Natan.
j.Tepo: palisa Nata?
j.Lakuse/j.Tepo: a a.
j.Tepo: ken la mi kute ike -
pj.Natan: seme?
j.Tepo: taso, a! palisa Nata! wa!
pj.Natan: Nata?
j.Lakuse: a a a.
j.Lakuse: ala. palisa jelo Natan... lon! tenpo ni la mi ale li lon li kalama sin. ni li suno pi toki pona la pali mute a li lon, anu seme? a, mi ale li lukin toki e ijo sona, li lukin toki e ijo musi, li pali sitelen tawa sin... pakala ilo mute li lon anu seme...
j.Tepo: lon!
j.Lakuse: a... taso...
j.Tepo: a a a.
j.Lakuse: pona la jan mute li lon, li pilin pona tan toki pona! anu seme? ni li pona mute!
j.Tepo: ken la pakala ilo li lon la jan mute li lon li pona e pakala kepeken tenpo lili! ni li wawa mute.
j.Lakuse: a a a, lon! a... taso, suno pi toki pona la mi kama toki e ijo wawa lon tenpo kalama ni. mi kama toki e ijo pi toki pona!
j.Tepo: ni li lon. tenpo mute la, jan li toki lon kalama sin la jan li pilin e ni: "mi o toki ala e ijo pi toki pona. mi o toki e ijo ante. "tenpo mute la jan li kepeken toki pona la ona li toki e ijo pi toki pona! "li toki ala e ante. ni li nasin lon kalama sin mute. o toki ala e toki pona taso." taso, n... ni li tenpo ante. a a. suno pi toki pona la toki pona li suli la mi ale o [toki e] toki pona.
j.Lakuse: ... e ijo pi toki pona. e ijo pi toki pi pona pi.
pj.Natan: toki pona pi toki pona.
j.Lakuse: ni li lon! a...
j.Tepo: 🎵 toki pona pi toki pona! 🎵
j.Lakuse: lon la sina tu li... n. wile sona suli. sina tu li ken ala ken toki pona?
j.Tepo: mi ken.
pj.Natan: a. ken. ken lon li ken.
j.Tepo: jan Lakuse o...
j.Lakuse: ken?
j.Tepo: sina ken ala ken toki pona?
j.Lakuse: tenpo la mi ken. tenpo la mi ken ala. a a a!
j.Tepo: n. tenpo ni la sina ken ala ken?
j.Lakuse: a, mi pilin e ni: tenpo ni, a... n. ni li wile sona pona: sina [pilin] seme tawa ni: "ijo seme o toki pona ala"?
j.Tepo: a... "seme o toki pona ala"... ijo o toki pona ala tan seme?
j.Tepo: mi sona ala...
j.Lakuse: mi sona ala. ken la... n... ken la ijo li sama ni anu seme - mi pilin e ni: ijo li ike suli la sina o toki pona ala e ona, anu seme?
j.Lakuse: sama ni:
j.Tepo: n... sama ni.
j.Lakuse: ... ijo/lipu li ike suli tawa kulupu wan... ken la ni li ike tawa... n. ken la lipu li ike suli li toki e ni: "a, jan walo ale li pona mute! "ijo ante ale li ike!" sina o toki pona ala e ni, tan ni: ni li toki ike!
j.Tepo: a a a. ni li ijo ike!
pj.Natan: n, lon.
j.Tepo: sina ken toki pona... taso, a... suli la sina pona la o lukin ala e lipu ni. [o] toki ala e lipu ni. mi sona ala.
pj.Natan: ken la o toki ike pi toki pona... o toki pona pi toki pona ala. o toki ike pi toki pona.
j.Tepo: n.
j.Lakuse: ijo li ike suli tawa pilin mi la mi wile ala toki pona e ona, tan ni: toki pona li -
j.Tepo: a a a.
pj.Natan: a?
j.Tepo: seme?
pj.Natan: jan Lakuse li moli anu seme?
j.Tepo: aaa!!!
j.Tepo: lon... ona li moli... ken suli la ilo ona li moli. mi awen. ken suli la ona li kama sin. a toki, jan Lakuse o.
j.Lakuse: [mu mute] ... ilo li pakala! toki. mi toki e seme?
j.Tepo: a...
pj.Natan: sina kama toki e ni: mi wile ala toki pona e ijo.
j.Lakuse: lon mi wile ala toki pona e ijo ike -
j.Tepo: ilo!
j.Lakuse: a, "ilo" ala. mi pilin e ni tan ni -
j.Tepo: taso sina toki e ni kin: "ilo li ike tawa sina la sina wile ala toki pona e ona." anu seme? ken la mi kute ike.
j.Lakuse: ala. "ijo"!
j.Tepo: a! pona.
j.Lakuse: sama ni: n. ijo li ike pilin e mi la mi wile ala toki pona e ona tan ni: ni li ijo ike! ona o awen ike!
j.Tepo: a...
j.Lakuse: mi toki pona e ona la ona li kama pona anu seme?
j.Tepo: a a a! taso kin la... taso ilo li ike tawa sina la ni li lon.
j.Lakuse: n... ilo anu ijo? mi ken ala kute pona.
j.Tepo: ilo! ilo li ijo ike tawa sina la sina wile ala toki pona e ona. ni li sama.
j.Lakuse: n... mi toki ala e nimi ilo. mi sona ala e toki sina.
j.Tepo: mi sona. taso mi sona e ni: ilo li ike tawa sina. a a.
j.Lakuse: ilo li ike tawa mi... taso o sona e ni: tenpo mute la, jan Tepo o... sina pana e sona ilo tawa mi kepeken toki pona. ni li ike suli ala. tenpo mute la toki Inli li ike lon ni tan ni: mi sona ala e nimi mute pi toki Inli,
j.Tepo: a a a!
j.Lakuse: ... nasin pi toki nanpa, anu seme... anu ilo nanpa.
j.Tepo: n! ni li pona.
pj.Natan: lon tenpo pini la sina toki e palisa kalama. ni li musi.
j.Tepo: palisa kalama, a a a!
pj.Natan: lon!
j.Tepo: nasa mute.
j.Lakuse: n. Natan o. sina wile ala toki pona e seme?
pj.Natan: mi wile ala toki pona e seme? ni li wile sona pona. pilin mi la ijo ale li ken pona tan toki pona. ken la ijo ike li lon. taso sina ken toki ike e ijo kepeken toki pona. ni la... mi sona ala. ken la ale o lon toki pona tawa mi.
j.Lakuse: n. ken la... mi sona a e ni: kalama musi pi toki pona li pona a tawa sina anu seme?
pj.Natan: a, ni li lon!
j.Lakuse: a a a. ken la...
pj.Natan: mi kute e ona lon sike!
j.Lakuse: a a lon sike. mi pilin e ni: sina kute e kalama musi pi toki pona taso anu seme?
pj.Natan: a... tenpo mute la, lon. tenpo mute la ni li lon a. a...
j.Lakuse: aa!
pj.Natan: lon.
j.Lakuse: wa.
j.Tepo: n... ken la mi pilin sama palisa jelo Natan sama ni: ijo ale la mi ken toki pona. mi ken la mi wile anu seme. taso, n.
pj.Natan: lon.
j.Tepo: tenpo mute la jan ante li wile toki tawa mi kepeken toki Inli. toki pona li ike lon tenpo ni.
pj.Natan: n... ken...
j.Tepo: mi lon ma... ma mi la jan ale li toki Inli anu seme... ni la, a. jan li ken ala toki pona la mi wile ala kepeken toki pona, a a
pj.Natan: lon.
j.Tepo: ... lon poka ona. ni la, ni li ike. mi mu nasa! ni li ike tawa jan.
j.Lakuse: n.
j.Tepo: taso, jan ante li sona e toki pona la mi wile kepeken toki pona lon toki. a...
j.Lakuse: lon. ni li lon. tenpo mute la kulupu pi toki pona li toki Inli, anu seme?
j.Lakuse: li toki pona ala.
j.Tepo: ni li lon... [mu] weka... a taso ni li suli tan ni - ni li lon tenpo mute tan ni: kulupu pi toki pona la jan mute li sona wawa ala e toki pona. jan mute a li kama sona li sona suli ala. ni la mi wile toki tawa jan mute la mi o toki Inli.
pj.Natan: a, lon.
j.Tepo: toki pona taso la jan mute ala li ken sona e toki. mi wile toki pona. taso mi ken toki pona taso lon tenpo mute. jan sona li lon. taso, ni li a... mute suli ala. jan ni li mute suli ala la, n. n, sama ni: jan Lakuse li toki e ijo lipu lon tenpo pini lili kepeken toki pona. tenpo sama la sitelen li lon li toki Inli. ni la jan li sona e toki Inli taso la ona li ken sona e toki. ni li pona tawa... a a. ni li wile tan ni: jan mute ala li ken sona e toki pona tan kute! a a.
j.Lakuse: taso, lukin la...
j.Tepo: jan mute li lukin e toki li... li ken lukin pona e toki [sitelen] taso li sona pona ala e toki uta. taso, n, ni li... n, sina toki e ni kin anu seme: "ni li ken pona tawa kama sona kute."
j.Lakuse: lon!
j.Tepo: jan li lukin e toki Inli la ona li sona e ijo toki la ni li ken pona e ken kute.
j.Lakuse: a, lon. ijo ni la mi pilin e ni: nasin mute li lon li ken pona lon ni anu seme? tenpo mute la, a, Natan o... nasin ni li lon tawa sina anu seme? sina musi Manka la sina kepeken toki pona. ni li wawa e ken sina pi toki pona, anu seme, tan ni: sina ken lukin e ijo ale
pj.Natan: a, lon. lon.
j.Lakuse: ... lon poka sina li ken toki pona e ona lon poka kulupu.
pj.Natan: lon lon lon.
j.Tepo: n.
j.Lakuse: lon. mi pilin e ni: mi kepeken toki Inli lon toki sona ni la, a... ken la ni li pona tawa sona jan. taso ona li ike tawa pilin mi... mi wile ken toki kepeken toki pona taso. pilin mi... ijo pi tomo sona li ken kepeken toki pona taso. a, taso... mi sona ala.
j.Tepo: a, n...
j.Lakuse: mi kama pana e sitelen anpa pi toki Inli la mi pilin sama ni: "a, toki Inli li kama poki e uta mi li nasa mute..."
pj.Natan: [mu]
j.Lakuse: lon... mi ken ala toki e ijo wile mi! mi o toki e ijo sama toki Inli la ni li ike e toki pona mi la ni li ike. taso...
j.Tepo: ike a.
j.Lakuse: taso, ni li lon anu seme...
j.Tepo: n, ken la mi wile toki e... a mi wile toki e ijo ante. n, ante mute ala. lipu Wesi la mi lukin e ijo. ni li nasa lili. taso jan li lukin pali e ma pi toki pona, lon ma. mi sona ala e nasin...
j.Lakuse: a!
j.Tepo: ... li alasa e ma li wile awen lon ni li wile toki pona lon ni. nasa mute. taso, o sona e ni: toki ale... n. jan li toki e pali ma ni la toki ale li toki Inli taso, a a a. jan li pali e ma pi toki pona kepeken toki Inli. a, mi, mi... mi toki e wile sona tawa kulupu: "toki Inli taso li lon tan seme?" jan li toki: "a toki pona li ike... mi ken ala pali e ma kepeken toki pona."
j.Lakuse: seme?!
j.Tepo: ken la, ala. taso ni li... mi ken... kama sona e ni: "jan pali pi ma ni li sona ala e toki pona la pilin mi la ona o pali ala e ma ni..."
j.Lakuse: ken...
j.Tepo: n... jan ante li toki e ni: "jan mute li sona ala e toki pona la mi toki e pali ni kepeken toki Inli "la ni li ken kama e jan mute, anu seme?" ken... a a a.
j.Lakuse: taso... n.
j.Tepo: taso, a, jan ale li toki Inli la o pali e ma lon. o pali e kulupu lon ilo... ilo Siko anu seme?
j.Lakuse: n, sina...
j.Tepo: ni li pona.
j.Lakuse: sina wile ala a e kulupu lon ma anu seme?
j.Tepo: mi wile. lon la mi wile! mi wile e ni: mi ken lon ma li ken toki pona tawa jan lon poka kepeken uta. taso, mi wile ala e ni: ma pi toki pona la jan ala li toki pona.
j.Lakuse: aaa... ni li lon mute. a, palisa jelo Natan o. sina pilin seme tawa ma pi toki pona taso?
pj.Natan: n... pilin mi la ona li ken pona mute. a. toki pona li taso la mi - jan pi mute lili li pilin ike tawa ni. ni li lon. taso ken la nasin o sama sina pi tenpo pini. sina toki e toki pona li pana e ijo lili pi toki Inli. ni li pona tan ni: toki pona li awen suli. taso toki Inli li suli nanpa wan ala. ona li lili tawa toki pona. tenpo mute jan li suli e toki Inli a, li toki e ni: "a. ale o toki Inli. ken ante li lon. taso suli la toki Inli o lon tawa ale." taso pilin mi la nasin ante ni li pona - sina suli e toki pona. ale li lon toki pona. toki mute li lon toki pona. taso toki Inli li wile la ona li ken lon.
j.Lakuse: n. taso tan seme la toki Inli li wile? lon tenpo seme?
pj.Natan: ona li wile tawa jan sin. jan sin taso lon tenpo mute.
j.Tepo: ni li lon mute. kin la...
j.Lakuse: taso sina kama lon ma pi toki pona taso li jan sin la sina kama lon ma pi toki pona taso tan seme?
pj.Natan: n... sina wile kama sona? ken la ni li tan.
j.Lakuse: ken. taso...
j.Tepo: n. mi pilin e ni kin: mi kepeken ijo anu ilo la pali pi ilo ni li kepeken toki Inli la ken suli la ilo ni li wile e toki ni. mi wile kepeken ilo ni la mi wile toki Inli lili lon kepeken. a, taso... n. mi kepeken ilo ni la mi ken kama pali e nimi pona tawa ijo ona kepeken toki pona. n, taso, toki Inli li ken wile.
j.Lakuse: n. taso, a. n.
j.Tepo: ni li sama ni: jan li pali ilo la ona li pana e nimi tawa ijo ilo kepeken toki Inli la toki Inli li toki pi ilo ni. a...
j.Lakuse: taso ni li toki Inli la o toki Inli. jan ni li toki sitelen li kepeken selo pi toki Inli anu seme?
j.Lakuse: toki ilo.
j.Tepo: a, n. toki ilo. n. a, mi toki ala e toki ilo ni: "pali ilo li sitelen e toki -" ni li sama ni: sina kepeken ilo la ilo li toki tawa sina. [mu]. ni li toki ilo.
j.Lakuse: n.
pj.Natan: a!
j.Lakuse: taso -
j.Tepo: ni li toki Inli la, ken la sina wile toki Inli e ijo ilo lili ni.
j.Lakuse: ken. taso, n. mi sona ala. tenpo poka la jan mute li kama pali e ilo pi toki pona taso. ma Seka... anu seme.
j.Tepo: n, n. ni ken. lon.
j.Lakuse: jan Kita li pali wawa lon ni lon tenpo poka. mi toki e wile tawa lipu la ni li kama e pali ona lon tenpo lili a.
j.Tepo: lon, lon! mi wile toki e ni! lipu, n - ilo sin li lon! ni li ilo lipu. sina pali e lipu kepeken toki pona la sina ken pana e ona lon lipu ni, kepeken ilo ni... [ni] li pona mute! sina ken pana e lipu... ni li wile ala e pali suli nasa - [mu ilo]
j.Lakuse: a... ilo li pakala ala pakala?
j.Tepo: ilo li pakala. taso ona li kama pona, a a a.
j.Lakuse: a! ni li pona.
j.Lakuse/j.Tepo: a a.
j.Tepo: tenpo kamalala... [mu mu mu] tenpo kama[mu]... [mu mu]
pj.Natan: kamalawala?
j.Tepo: [muuuu]
j.Lakuse: [mu nasa]
j.Tepo: tenpo [mu] la...
j.Lakuse: kala li kama kamalawa ala la kala li ken kama lawa tawa ma kala li ken kalama tawa kala lawa!
j.Tepo: a. ... la ... a a a!
j.Lakuse: a a a!
j.Tepo: a, jan pali pi suno pi toki pona li ken pona e... li ken wan e kipisi...
jan Kepe: jan pali pi suno pi toki pona o pali e ale anu seme? a a. ona li kama pona.
j.Lakuse/pj.Natan: a a.
j.Lakuse: toki, jan Kepe o!
j.Lakuse/pj.Natan: toki!
j.Lakuse: kalama sina li kama pona.
j.Kepe: mi kama tan ni: mi wile toki e ni: ilo mi li pakala. taso ilo li kama pona.
pj.Natan: a.
j.Tepo: pona. [mu ilo]
j.Tepo: a mi toki e seme lon tenpo pini poka...
pj.Natan: o awen pona, lon moli sina.
j.Lakuse: sina toki e wawa pi toki Inli e ken lon ma...
j.Tepo: ni! ni...
j.Lakuse: ... pi toki pona. a.
j.Tepo: mi wile toki pona lon ma. [kalama li pakala tan ilo]
j.Tepo: n... mu! a a a. jan Ke Tami li kama e tenpo kulupu lon ma Elopa lon ma Win
pj.Natan: a, lon!
j.Tepo: li kama toki lon suno pi toki pona tan ma Win lon tenpo pini. ni li wawa pilin tawa mi tawa jan Lakuse kin!
pj.Natan: a, lon!
j.Lakuse: lon!
j.Tepo: sama ni: ma pi toki pona li lon lon! jan mute, lon poka, lon ma,
j.Lakuse/j.Tepo: ... li toki pona!
j.Tepo: sama ni a.
j.Lakuse: nasa mute!
j.Tepo: mi wile kama e tenpo kulupu sama ni lon ma Mewika. mi lon ma Mewika la ma Elopa li weka mute. mi ken ala tawa ona! mi ken ala lon tenpo kulupu [pi jan] Ke Tami. taso, n. mi wile ken kulupu lon ma mi!
pj.Natan: lon a.
j.Lakuse/j.Tepo: a.
j.Tepo: jan mute li toki pona lon ma Mewika anu seme? ma Kanata kin anu seme?
pj.Natan: n. taso ma Mewika li suli mute.
j.Lakuse/j.Tepo: ni li lon.
j.Tepo: ni la... a a. mi o... mi wile e tenpo kulupu pi ma Mewika la mi o kama sona e ni: mi wile kulupu lon ma seme?
j.Kepe: kulupu lon ma Masu, jan wan taso li kama. ona li mi. a a. pilin mi la jan wan li toki pona lon ma Masu.
j.Tepo: aaa... a a a.
pj.Natan: a... sina taso a!
j.Tepo: a, sina taso.
j.Lakuse: ni la tenpo kulupu tu o lon anu seme...
j.Kepe: ma mute la, jan wan taso li toki pona, anu seme?
j.Tepo: n...
j.Lakuse: ni li lon a! taso ma Mewika la ken la sina o pana e tenpo kulupu lon poka wan... a a.
j.Tepo: ni li lon. ni li lon.
j.Lakuse: [e ante] lon poka ante.
j.Tepo: [mu] lon insa pi ma Mewika...
j.Lakuse: lon! [jan tu li toki lon tenpo sama]
j.Tepo: a a a! ona o - ma Teka li lon ala! mi wile ala tawa.
j.Lakuse/pj.Natan: a!
j.Tepo: ona li lon ala. a! musi taso. a...
j.Lakuse: a jan Deni li wile e sona. jan pi mute seme li lon ma Win? a, toki pi jan Ke Tami la jan luka luka li lon!
pj.Natan: n, lon.
j.Lakuse: ni li mute!
pj.Natan: ona li toki e ni. taso ona li toki e ni kin: tenpo kama la jan ante li kama. ona li kama tawa toki uta pi suno pi toki pona la ona li toki e ni: "luka luka li lon". taso ken la jan ante li kama lon pini.
j.Tepo: jan ante li kama? seme?
pj.Natan: a, pona!
j.Tepo: wawa mute.
j.Lakuse: lon.
j.Lakuse: ni li jan mute a! o sona e ni: mi kama sona e tenpo kulupu lon ma Win la mi pilin e ni: "a ken suli la jan tu wan li kama anu seme?" taso jan luka luka!
pj.Natan: lon a!
j.Lakuse: ni li mute suli! wawa mute tawa mi. mi sona ala.
j.Tepo: jan Olipija li kama toki e ni: "jan tu tu li toki pona lon ma Kinla." ni li mute!
pj.Natan: ona li tu ala la ona li mute! lon.
j.Lakuse: ni li mute!
j.Tepo: a! ma Kinla li lili anu seme? mi ken pilin e ni: "a ken la jan Olipija taso li toki pona lon ma Kinla!" taso, ala!
j.Lakuse: lon. taso, n. kin la mi toki pona lon ma la ni li wawa pilin anu seme?
pj.Natan: lon.
j.Lakuse: mi en jan Tepo - sina en mi li kama toki pona lon ma lon poka.
j.Tepo: ni li lon. mi pali e sitelen tawa!
j.Lakuse: lon. mi pali e stielen tawa tawa suno pi toki pona! sina ale o kama lukin e ona. nimi ona li meli [mu].
j.Tepo: sitelen meli.
j.Lakuse: sitelen meli. lon. mi pali wawa lon ni. taso mi toki pona lon ma la tenpo la mi en jan Tepo li moku kepeken toki pona... a, li tawa noka lon ma kepeken toki pona.
j.Kepe: a a, jan ale li lukin anu seme?
j.Lakuse/j.Tepo: ken!
j.Tepo: jan ala li sona e toki anu seme. taso, n... jan li ken lukin... "n jan tu li toki nasa." taso, n. lon la, ma mi la toki ante mute li lon. toki Inli taso [ala]. toki Epanja en toki Losi en toki Sonko. mi kute e ni lon tenpo mute. ni la jan li kute e toki nasa la ni li nasa suli ala tawa ona anu seme?
j.Lakuse: lon... "a, jan li toki e toki nasa pi nasa ala... toki ma ante." a, taso a... mi toki pona kepeken sijelo mi la ni li ante lili pilin. tenpo mute la mi toki pona kepeken ilo, anu seme. a, taso, sijelo li ante. ni li ante a. mi wile a e ni: jan - sina wile toki pona lon poka pi sijelo ante jan la sina o ken.
j.Lakuse: a. mi sona ala.
j.Tepo: ken la tenpo sike - tenpo sike kama la kulupu lon ma Elopa la pilin mi la mi wile tawa ni, a a a. jan luka luka li lon, anu seme? ni li wawa!
pj.Natan: ona li tawa suli a.
j.Tepo: kin la ma Moleja - ma Monka la (mi sona ala e nimi pona, taso...) ma ni la tenpo kulupu pi toki Epelanto li kama.
j.Lakuse: lon! ona li kama.
j.Tepo: ken la jan mute li toki pona lon ni.
j.Lakuse: ken.
j.Tepo: ken a!
j.Tepo: jan Lakuse li tawa ni. jan Sonja kin. jan ante mute. a...
j.Lakuse: lon. mi pilin e ni: tenpo mute la mi kama toki kepeken Epelanto la, mi pilin e ni - a, mi pilin monsuta lili tan ni: ken mi pi toki Epelanto li wawa suli ala. taso jan mute pi toki pona li lon kin la ni li ken wawa mute. taso jan tu taso pi toki pona li lon, la awen la mi pilin pona tan ni: mi ken toki pona, anu seme, lon poka ma!
j.Tepo: lon! jan Sonja en sina la tu!
j.Lakuse: lon. la tu! lon. jan Deni li wile kama e tenpo kulupu lon ma Nujo. jan Deni o. sina kama e ni la mi tawa ni! o kama e ni!
j.Kepe: mi wile tawa tenpo kulupu. taso mama mi li wile ala esun e lipu pu la ona li wile ala tawa ma Mewika...
j.Kepe/j.Tepo: a a a.
j.Lakuse: a.
j.Lakuse: ni li lon. jan mute pi toki pona li kepeken ilo Siko. ni la jan mute pi toki pona li lili, anu seme? ni la jan mute pi toki pona li jo ala e mani mute.
j.Tepo: a, pilin mi la jan ale pi toki pona li lili tan ni: sina lili la sina lon tomo sona lon tenpo mute li wile ala pali ante lon tenpo mute la sina ken pana e tenpo mute tawa sona toki nasa, a a. ni li pilin mi.
j.Kepe: a a. jan majuna li lukin e toki nasa li toki e ni a: "mi kama sona e ni tan seme?"
j.Tepo: a, lon mute.
j.Kepe: jan lili li ken musi.
j.Kepe: jan suli li jo ala e musi lon kon ona.
j.Tepo: ni li... a a. pakala! mi kama jan suli. ike a. a, mi lukin e lipu tenpo. mi pilin e ni: tenpo pi kalama sin li pini.
j.Lakuse: lon.
pj.Natan: a, lon.
j.Tepo: taso ni li musi. mi mute li toki e ijo pona! e... tok, e ijo toki, e ijo toki, pi pona, pi toki, e pona, pi.
pj.Natan: n, lon mi mute li toki pona pi toki pona.
j.Lakuse: ken la sina kin li wile pana e uta sina tawa jan ale la o kama lon ma pona pi toki pona o kalama tawa jan ale! taso, a! mi jan Lakuse.
j.Tepo: mi jan Tepo!
pj.Natan: mi palisa jelo Natan.
j.Kepe: mi jan Kepe, anu seme, a a.
pj.Natan: a a.
j.Lakuse: a, ni li kalama sin. sina ale o pona. o awen pona a.
pj.Natan: o awen pona, lon kute sina.
This work is licensed under the Creative Commons Attribution-ShareAlike 4.0 International (CC BY-SA 4.0) license.
| |