重構詞
語言學家通過研究幾種有共同祖先嘅現代語言裏面嘅同源詞，推斷出呢個詞喺祖先語言裏面嘅可能係乜嘢形態，呢種過程叫做「重構」，而重構得出嘅結果就係「重構詞」。喺好多情況下，語言學家試圖重構嘅係一種未必存在嘅遠古語言，或者係一個未必存在嘅詞——因為無書面證據證明呢種語言或者呢個詞真係存在——所以唔同專家重構出來嘅結果可能會相差好遠。因此，喺語言學文獻裏面，重構詞一般都會用星號「*」做一個標記。
重構古詞係歷史比較語言學嘅一個重要課題。
