交響曲

2009 年喺美國北卡羅萊納州有隊交響樂團喺度演奏交響樂。

貝多芬《命運交響曲》第一樂章；呢首旋律喺廿一世紀初可以話係無人不曉咁滯。

交響曲（粵拼：gaau1 hoeng2 kuk1，英文：symphony，意大利文：sinfonia）係指作嚟預咗俾交響樂團演奏嘅樂曲，屬古典樂當中嘅大型樂曲。呢啲曲通常都會有幾段樂章咁長，當中最少一段樂章會係奏鳴曲噉嘅形式^[1]。

例如貝多芬喺 1804 年至 1808 年間作嘅《命運交響曲》就係一首好出名嘅交響曲－《命運交響曲》成首嘢有 30 至 40 分鐘咁長，分做四大樂章，當中第一樂章傳統上係奏鳴曲形式；而且首曲係預咗俾一隊有雙簧管、小號同小提琴等多件樂器嘅樂團嚟合力演奏嘅^[2]。

交響曲係古典樂上嘅重要一環：現代意義上嘅交響曲係喺 18 世紀尾嗰時成形嘅，而貝多芬响 19 世紀初嘅時候作咗多首風靡歐美樂壇嘅交響曲，確立咗交響曲喺古典樂上嘅地位^[3]；打後嘅古典樂壇仲出咗好多首出名嘅交響曲－例子有舒伯特嘅《第 8 號交響曲》同埋柴可夫斯基嘅《悲愴交響曲》呀噉。到咗廿一世紀初，交響曲具有龐大嘅影響力，係古典音樂會常見嘅部份^[4]，而且仲有影響到電子遊戲音樂等嘅大眾媒體^[5]。

特性

喺現代，交響曲係指專門攞嚟俾交響樂團（orchestra）演奏用嘅樂曲。交響樂團係一種大型嘅樂團，閒閒哋會成有 40 至 50 位演奏者一齊演奏；交響樂團會結合多種唔同音色嘅樂器，包括好似小提琴同中提琴等嘅弓弦樂器、好似笛同雙簧管等嘅木管樂器、圓號同小號等嘅銅管樂器、以至定音鼓同鈸等嘅敲擊樂器；喺音樂特性上，交響樂團會做到好多獨特嘅效果，例如「將咁多種唔同樂器嘅聲以唔同方法結合埋一齊」噉嘅效果，係寫嚟獨奏或者俾細樂隊演奏嘅曲做唔到嘅－因為噉，喺好多作曲家心目中，「作交響曲」都係一種難得嘅藝術機會^[6]。

要留意嘅係，交響曲同協奏曲（concerto）唔同，兩者都會用到樂團，但主要分別在於「有無獨奏者」：協奏曲作嚟係預咗俾若干位獨奏者，先後噉喺有隊樂團奏伴奏嘅情況下演奏嘅，即係話隊樂團負責奏嗰段聲明顯係攞嚟做獨奏者嘅陪襯；交響曲正路就無特定嘅獨奏者，而係俾成個交響樂團一齊合作奏，當中無任何一位演奏者零舍會做注意力嘅中心^[7]。

四章式

《命運交響曲》第一樂章

《命運交響曲》第二樂章

《命運交響曲》第三樂章

《命運交響曲》第四樂章

廿一世紀初有嘅經典交響曲結構（四樂章式）係喺 18 世紀尾嘅意大利歌劇院嗰度確立嘅－18 世紀嘅交響曲成日會用三樂章式嘅結構，跟住慢慢演變成四樂章式，而四樂章式呢種結構到咗廿一世紀初都仲係交響樂嘅標準^[8]。一首經典嘅四樂章式交響曲會有四段樂章^[1]^[9]：

第一樂章：多數都會係奏鳴曲式（sonata form；A-B-A 噉嘅形式），快板（allegro；120-156 bpm，算係 tempo 幾快），有陣時會有一個 tempo 慢嘅起始。第一樂章通常會係成件作品諗頭上嘅核心，會一開頭就表達出首曲嘅重要主題。例如貝多芬嘅《命運交響曲》噉，《命運交響曲》頭嗰四個音符係好出名嘅命運樂想（fate motif），即係好似以下噉嘅四個音符：
${\clef treble \key c \minor \tempo "Allegro con brio" 2=108 \time 2/4 {r8 g'\ff[ g' g'] | ees'2\fermata | r8 f'[ f' f'] | d'2~ | d'\fermata | } }$
- 命運樂想打後仲喺首曲入面出現咗好多次，所以第一樂章開頭用呢段樂想就起到引入嘅作用^[10]。
第二樂章：又叫做慢樂章，tempo 會明顯慢過第一樂章，例如係行板（andante；76-108 bpm），復三部曲式或者係變奏曲。
第三樂章：小步舞曲（minuet）或者詼諧曲（scherzo）樂章，有「令人想跳舞嘅特徵」；交響曲嘅第三樂章興用三拍子，例如《命運交響曲》第三樂章就係用咗 3/4 拍號（相對於例如第一樂章嘅 2/4 拍號），一般就係三段體，tempo 上中至偏快。
第四樂章：又叫做最終樂章，奏鳴曲或者係迴旋曲（rondo）嘅形式，快板。响早期嘅交響曲作品裡頭，第四樂章多數都係短，而且係份量較之為輕嘅一段樂章；之不過有啲作曲家後來開始發覺，成首樂曲最後應該要同第一樂章攞個平衡，所以就幫第四樂章加一啲實質嘅內容，同第一樂章攞個平衡，例如《命運交響曲》第四樂章就有成超過 11 分鐘咁長，相對於第一樂章嘅 7 分零鐘左右。

名家

以下呢啲作曲家都係喺交響樂方面有返咁上下出名嘅：

海頓（Haydn；1732-1809 年），一世人作咗最少 106 首交響曲^[11]。
莫札特（Mozart；1756-1791 年），一世人作咗最少 47 首交響曲^[12]。
貝多芬（Beethoven，1770-1827 年），一般俾人覺得係成功將交響曲搞成一隻獨立曲種嘅作曲家。
舒伯特（Schubert，1797 - 1828 年），作咗出名未完成嘅《第 8 號交響曲》。
菲歷士·門德爾松（Felix Mendelssohn，1809 - 1847 年）
舒曼（Schumann，1810 - 1856 年）
布魯克納（Bruckner，1824 - 1896 年）
布拉姆斯（Brahms，1833 - 1897 年）
柴可夫斯基（Tchaikovsky，1840 - 1893 年）
德伏札克（Dvořák，1841- 1904 年）
馬勒（Mahler，1860 - 1911 年）
蕭斯達高維契（Shostakovich，1906 - 1975 年）
拉赫曼尼諾夫（Rachmaninoff，1873 - 1943 年）

... 呀噉。

詞源同史

Symphony 呢隻英文字歷史好悠久：呢隻字最早可以追溯到去希臘文嘅 συμφωνία（羅馬字：symphonia），即係希臘文入面「聲嘅互相配合」噉解^[13]；不過呢隻字喺公元後頭嗰兩千年嘅大部份時間都唔係指「作嚟俾交響樂團演奏嘅樂曲」－喺中世紀嗰陣，symphony 或者類似嘅字喺音樂上係指緊協和嘅意思，協和係樂理上講嘅「幾個同時出現嘅音符係咪好聽順耳」呢個概念，又或者係攞嚟指某幾種樂器^[14]；而喺 16 至 17 世紀，一路都有西人音樂家用 symphony 或者類似嘅字嚟做樂曲嘅名，通常都係指緊「若干隻唔同嘅聲一齊出現」呢類嘅意思或者泛指首曲係寫嚟預一班人合唱或者合奏嘅^[15]。

一般認為，現代意義上嘅交響曲係要去到中世紀後嗰兩三個世紀，先至開始正式噉定形嘅：喺巴洛克時期早期（1600 - 1630），歐洲嘅音樂家開始大舉噉作啲純器樂嘅曲嚟俾樂團演奏，呢啲曲好多時都係攞嚟做啲歌劇嘅配樂，會有多位演奏者分別噉用樂器嚟演奏；而喺呢個時代，symphony 呢隻英文字仲未有清晰嘅定義－就算到咗 1771 年，啲英文文獻都仲係好興將隻字當係「協和」嘅同義詞；打後喺 18 世紀尾至 19 世紀初（浪漫主義時期），海頓、莫札特同貝多芬等嘅音樂家大舉噉作交響曲，正式奠定交響樂嘅地位－主流嘅現代古典樂學者認為，都係要多得呢三位作曲家，交響曲先至會由「歌劇嘅陪襯品」提升到去「能夠獨立噉存在嘅音樂作品」嘅層次，而呢個時期嘅歐美樂壇亦都開始確立 symphony 呢隻字係專指「寫嚟俾交響樂團演奏嘅樂曲」嘅意思^[16]^[17]。

睇埋

文獻

Brown, Howard Mayer (2001). "Symphonia". The New Grove Dictionary of Music and Musicians, second edition, edited by Stanley Sadie and John Tyrrell. London: Macmillan Publishers.
LaRue, Jan, Mark Evan Bonds, Stephen Walsh, and Charles Wilson (2001). "Symphony". The New Grove Dictionary of Music and Musicians, second edition, edited by Stanley Sadie and John Tyrrell. London: Macmillan Publishers.
Kennedy, Michael (2006). "Sinfonietta". The Oxford Dictionary of Music, second edition, revised, Joyce Bourne, associate editor. Oxford and New York: Oxford University Press.
Marcuse, Sybil (1975). Musical Instruments: A Comprehensive Dictionary. Revised edition. The Norton Library. New York: W. W. Norton. ISBN 0-393-00758-8.
Tawa, N. E. (2001). From psalm to symphony: A history of music in New England. UPNE.
Temperley, Nicholas (2001). "Sinfonietta." The New Grove Dictionary of Music and Musician, second edition, edited by Stanley Sadie and John Tyrrell. London: Macmillan Publishers.
Vande Moortele, Steven (2013). "'Two-dimensional' Symphonic Forms: Schoenberg's Chamber Symphony, Before and After". In The Cambridge Companion to the Symphony, edited by Julian Horton, 268-84. Cambridge Companions to Music. Cambridge and New York: Cambridge University Press. ISBN 9781107469709.

攷

↑ ^1.0 ^1.1 Stein, Leon. (1979). Structure & Style: The Study and Analysis of Musical Forms, Expanded edition. Princeton, New Jersey: Summy-Birchard Music. p. 106.
↑ Schauffler, Robert Haven (1933). Beethoven: The Man Who Freed Music. Garden City, New York: Doubleday, Doran, & Company. p. 211.
↑ Dahlhaus, Carl. (1989). Nineteenth-Century Music, translated by J. Bradford Robinson. Berkeley, Los Angeles, and London: University of California Press. p. 265.
↑ Battisti, Frank L. (2002). The Winds of Change: The Evolution of the Contemporary American Wind Band/Ensemble and Its Conductor. Galesville, Maryland: Meredith Music Publications. p. 42.
↑ Musgrove, Mike (2006-08-03). "Mario's New World: Symphonies". Washington Post.
↑ Brunner, Lance W. (1986). "The orchestra and recorded sound". In Peyser, Joan (ed.). The Orchestra: Origins and transformations. New York, NY: Scribner's Sons.
↑ Hill, Ralph, Ed. (1952). The Concerto. Penguin Books.
↑ Hepokoski, James; Darcy, Warren (2006). Elements of Sonata Theory : Norms, Types, and Deformations in the Late-Eighteenth-Century Sonata. Oxford University Press. p. 320.
↑ Jackson, Timothy L. (1999). Tchaikovsky, Symphony no. 6 (Pathétique). Cambridge Music Handbooks. Cambridge and New York: Cambridge University Press. p. 26.
↑ Beethoven's Fifth Symphony: The Analysis. Medium.
↑ Webster, James, and Georg Feder. 2001. "Haydn, (Franz) Joseph". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
↑ Eisen, Cliff, and Stanley Sadie. 2001. "Mozart (3): (Johann Chrysostum) Wolfgang Amadeus Mozart". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
↑ "Symphony", Oxford English Dictionary (online version ed.)
↑ Brown, Howard Mayer. 2001. "Symphonia". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
↑ Bowman, Carl Byron. (1971). "The Ecclesiastiche Sinfonie (Opus 16) of Adriano Banchieri (1568-1634)". Ph.D. diss. New York: New York University.
↑ LaRue, Jan, Mark Evan Bonds, Stephen Walsh, and Charles Wilson. (2001). "Symphony". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.
↑ Symphony. Encyclopedia Britannica.

拎

香港管弦樂團嘅官方網站（繁體中文）
Ben Sir 的童話交響：天鵝湖（繁體中文）
Symphony（英文），不列顛百科全書講交響曲

[stein1979-1] 1.0 ^1.1 Stein, Leon. (1979). Structure & Style: The Study and Analysis of Musical Forms, Expanded edition. Princeton, New Jersey: Summy-Birchard Music. p. 106.

[2] Schauffler, Robert Haven (1933). Beethoven: The Man Who Freed Music. Garden City, New York: Doubleday, Doran, & Company. p. 211.

[3] Dahlhaus, Carl. (1989). Nineteenth-Century Music, translated by J. Bradford Robinson. Berkeley, Los Angeles, and London: University of California Press. p. 265.

[4] Battisti, Frank L. (2002). The Winds of Change: The Evolution of the Contemporary American Wind Band/Ensemble and Its Conductor. Galesville, Maryland: Meredith Music Publications. p. 42.

[5] Musgrove, Mike (2006-08-03). "Mario's New World: Symphonies". Washington Post.

[6] Brunner, Lance W. (1986). "The orchestra and recorded sound". In Peyser, Joan (ed.). The Orchestra: Origins and transformations. New York, NY: Scribner's Sons.

[7] Hill, Ralph, Ed. (1952). The Concerto. Penguin Books.

[8] Hepokoski, James; Darcy, Warren (2006). Elements of Sonata Theory : Norms, Types, and Deformations in the Late-Eighteenth-Century Sonata. Oxford University Press. p. 320.

[9] Jackson, Timothy L. (1999). Tchaikovsky, Symphony no. 6 (Pathétique). Cambridge Music Handbooks. Cambridge and New York: Cambridge University Press. p. 26.

[10] Beethoven's Fifth Symphony: The Analysis. Medium.

[11] Webster, James, and Georg Feder. 2001. "Haydn, (Franz) Joseph". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.

[12] Eisen, Cliff, and Stanley Sadie. 2001. "Mozart (3): (Johann Chrysostum) Wolfgang Amadeus Mozart". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.

[13] "Symphony", Oxford English Dictionary (online version ed.)

[14] Brown, Howard Mayer. 2001. "Symphonia". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.

[15] Bowman, Carl Byron. (1971). "The Ecclesiastiche Sinfonie (Opus 16) of Adriano Banchieri (1568-1634)". Ph.D. diss. New York: New York University.

[16] LaRue, Jan, Mark Evan Bonds, Stephen Walsh, and Charles Wilson. (2001). "Symphony". The New Grove Dictionary of Music and Musicians, 2nd edition, edited by Stanley Sadie and John Tyrrell. London: Macmillan.

[17] Symphony. Encyclopedia Britannica.

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]