技術決定論

技術決定論（粵拼：gei6 seot6 kyut3 ding6 leon2/6）係個社會學假說，呢門理論認爲，成個社會嘅技術發展會促進到社會嘅構築發展以及影響各類文化、價値觀。呢門理論係由美國社會學家范伯倫提出。喺美國二十世紀最急進嘅技術決定論者係Clarence Ayres，佢係范伯倫同杜威嘅追隨者，而William Ogburn亦係有名嘅急進技術決定論者。

技術決定論嘅根本鋪設源自德國經濟學家、哲學家馬克思，喺馬克思嘅學說入面，技術、生產力（productive forces）嘅改變，會從根本上決定社會嘅上層組織，諸如社會關係、文化等，而好似政治、文化呢啲社會上層建築又反作用返作爲社會基礎嘅經濟、技術。馬克思嘅呢種主張影響咗啲人對當代社會嘅睇法，即係話而家呢個時代啲科技日新月異，最終會全方位改變人類嘅生存方式。