武漢肺炎冰島疫情

武漢肺炎冰島各地疫情

  ＜5單個案

  5～49單個案

  50～499單個案

  ≥500單個案

武漢肺炎冰島疫情係講武漢肺炎喺冰島爆發嘅情況。截至2020年8月28號爲止，有2,092單感染個案，死咗10個人。

境內疫情同反應

經常排喺世界幸福指數三甲嘅冰島，2020年2月28號喺雷克雅維克發現咗第一單感染武漢肺炎個案，嗰時嘅感染案例都啱喺意大利同奧地利滑完雪返嚟。事發之後，當地啲差館同衛生署緊急召開咗同疫情有關嘅第一次新聞會議，第二日，當地大量報紙即刻將COVID-19病毒上嗮頭條。據調查，病發嗰位患者都搭同一航班飛機嗰400位乘客都要集中隔離14日。同年3月2號開始，當地得好少藥房有口罩賣，甚至三日後冚唪唥口罩都賣嗮。當地政府開會都建議民眾最緊要係洗手；千祈冇同有感冒或咳嗽啲人接觸；若果自己有感冒咳嗽症狀，必須要搵手擋住；但係冇提到要各位民眾戴口罩嘅事（除非係近距離同第啲人接觸嘅工作）。到同年3月5號挨晚（UTC-1），確診COVID-19個案嘅人數已經上升到35人。島入面大多數聚眾集會嘅活動同慶典都一窩蜂噉取消嗮，公共場所都要必配酒精同消毒液。九日後，由於累積確診個案破百，當地政府雖然發佈消息建議國民唔好離開冰島，重呼籲家下離開咗冰島啲公民都要提早返冰島避難。但係佢哋考慮到病毒冇乜可能接觸到當地啲老坑同體弱人士而冇採取到封島措施。從2020年3月16號開始，由於感染個案接近二百單，國內冚唪唥大中小學都要停課兼唔畀出現超過100人嘅聚集活動。不過嗰時一直未出現死亡個案，直到3月17號出現第一單感染武漢肺炎嘅死亡個案，嗰時有位40歲澳洲籍嘅市民同心抱嚟冰島玩時感染武漢肺炎直接瓜佬嚫。兩日後，總感染個案去到409單，死亡個案又出一單，嗰位仁兄係當日感染咗武漢肺炎之後，身體組織好快出現有非典型變化而加重病情，最後直接死咗。

2020年3月21號，感染個案繼續上升，直接破咗五百大關。喺韋斯特曼納群島，規定咗聚集活動最多限制喺10人以內；喺西北區甚至有個鎮仔規定除咗出街買緊急必需品理由之外都唔畀出街。

2020年3月24號，感染案例破咗七百大關，死亡案例一直冇變化。冰島政府實行咗更加嚴格嘅出行禁令：每間公眾場所最多限制廿人入場；國內冚唪唥泳場、博物館同酒吧、圖書館都要閂檔；冚唪唥商業活動都要至少保持超過2m嘅距離。國內嘅deCODE做病毒檢測時，發現武漢肺炎病毒重出現有40種變種。