陳日君

陳日君
出生日	1932年1月13號（92歲）
出生地	Shang-hai
國籍	中華民國、英屬香港、中華人民共和國
識嘅語言	中文
信奉	天主教會
母校	Salesian Pontifical University
職業	Latin Catholic priest、天主教嘅主教
	[改維基數據]
	睇; 傾; 改;

陳日君（1932年 1月13號—），羅馬天主教樞機，天主教香港教區主教，上海出世。佢喺上海時，曾經喺修會學校讀書，之後就讀意大利都靈慈幼大學。1949年中國共產黨上台後，唔准修會辦學；1996年 10月20號獲任命為教區助理主教，2002年 9月23號前任胡振中樞機離世後接任香港教區主教嘅職務。教廷喺2006年 3月24號冊封佢為樞機。

陳日君敢言，多次公開反對香港政府政策，故香港政府唔多鍾意佢做樞機。

出任主教之前，佢唔理中國大陸政府強烈反對，公開支持教廷封被義和團所殺嘅教士做聖，之後六年唔畀去中國大陸。

爭取民主

陳日君主教接替病死嘅胡振中樞機任天主教香港教區主教後無幾耐，加入反香港基本法第23條立法嘅運動。佢認為香港政府唔用白紙草案係愚弄市民。佢多次發動教徒上街遊行。2003年 7月1號喺維多利亞公園帶領遊行前嘅祈禱會。佢嘅呼籲下，好多天主教同基督教徒參加咗呢次遊行。

2004年 6月3號，六四事件十五週年前夕，教區舉辦咗次「民主中國」嘅活動。陳日君話，香港現正受到「無流血嘅六四鎮壓」，無槍同坦克車，但有頑固嘅保守派，誣陷民主派支持香港獨立，以釋法阻止香港市民討論普選。呢番言論遭到中共官員猛烈批評，薄熙來更指佢「不愛教不愛國」。2004年7月1號陳日君再次喺維多利亞公園主持遊行前嘅祈禱會，但無參與遊行。

2005年 11月3號喺梵蒂岡返嚟之後，陳日君指出香港市民有權決定支唔支持政改方案，政府應以仿公投嘅全民民意調查。陳日君又公開呼籲教徒參加12月4號嘅遊行。政改方案被否決後，政務司司長許仕仁批評陳日君。

教改爭議

香港教育改革中，要求全港學校要喺2009年前成立法團校董會，陳日君不但強烈反對，更控告政府，並指如果喺同政府嘅訴訟中敗訴，教區會放棄部分學校主辦權。2006年一月初兩個教師先後自殺後，陳日君指事件一定同教改有關，促請政府立即停止教改。

神秘樞機傳聞

教宗若望保祿二世去世後，美國同梵蒂岡嘅一啲分析員曾指陳日君可能係若望保祿二世喺2003年任命嘅神秘樞機，陳日君即時否認，又指該神秘樞機係李篤安，但李篤安亦否認。隨著教宗嘅遺囑發表，神秘樞機嘅身份亦成謎。

同中國關係

喺1998年出任助理主教嘅時候公開支持教廷對被義和團所殺教士封聖後，被禁止訪問中國大陸六年，中國日報、新華社、中共官員多次批評陳日君。23條立法期間，立法會議員梁富華指陳日君係「病態聖徒」。2004年5月3號，陳日君訪問上海。但陳日君同中國嘅關係仍然相當惡劣。

此外，陳日君喺中共打壓法輪功同人大釋法等問題上同北京意見相左。人大首次釋法後，時為助理主教嘅陳日君就指責政府拆散無數美好嘅家庭。陳日君又指唔可以視法輪功為邪教，並批評特區政府「遏制法輪功活動」，等於係「壓制港人嘅宗教自由」。 ﹙參閱︰2003年2月20日文匯報全國政協委員-張華峰︰「良心」與「狗吠」--- 與陳日君主教談論緘默嘅智慧﹚

世貿爭議

世界貿易組織喺香港開會時，陳日君批評警方處理示威遊行嘅方式係「香港之恥」，引起各界批評。一班退休警一度原本打算去主教座堂抗議，陳日君就喺公教報讚揚前線警員，又指香港之恥指警方高層。接著，兩個警員公會去信教宗本篤十六世投訴陳日君，而陳日君就話香港存在「向上奉承」嘅不良文化。南韓農民則發表聲明感謝陳日君嘅支援，並多謝陳日君畀各被捕人士一千蚊利是 ^{[未記出處或冇根據]}。有農民家屬亦喺法院上對陳日君鞠躬致敬。

退休傳聞

2005年 9月18號，陳日君同《蘋果日報》講自己打算喺2007年 1月退休。佢又話，希望可以到中國大陸或者非洲教書，因為非洲嘅教師短缺。同為天主教徒嘅李柱銘指出，陳日君仍身壯力健，教宗可能會挽留陳主教。但係，教會內嘅倒陳分子則認為陳日君退休有助改善中梵關係。

根據報道指陳日君現階段退休嘅機會相當低，原因主要有兩個：首先教宗本篤十六世已任命陳日君成為一個主教會議委員會嘅成員；此外，陳日君已經晉升為樞機。

任樞機

喺2006年 2月22號，教宗本篤十六世宣布，委任陳日君為樞機；3月24日舉行咗晉升冊封儀式。

而中國天主教愛國會副主席劉柏年就批評，陳日君抱反共立場，教宗晉升陳為樞機，係「敵視中國，挑戰中國政府」，又認為有鑒於梵蒂岡喺1989年推翻波蘭共產政權上，扮演著重要嘅角色，因此認為羅馬教廷晉升陳日君為樞機，亦係對中國進行類似嘅「倒共」策略。

不過，另一位中國天主教愛國會副主席房興耀就話，希望陳喺促進中梵建交上做一啲嘢。

退休

按梵蒂岡規定，陳日君需於2007年 1月年屆75歲時向教宗申請退休。陳日君話希望退休之後可以去中國大陸教。

2009年4月15號，教廷宣布天主教香港教區主教陳日君樞機以退休為由辭呈，並得到教宗本篤十六世接納，即時生效。湯漢喺2009年4月16日號接任為天主教香港教區第七任正權主教。

出面網頁