龐會

龐會
曹魏 武將
活躍時期	219年～263年
遞啲名

龐會（粵拼：pong4 wui6；？—？），南安狟道人（而家甘肅武山），係三國時曹魏嘅將領，係曹魏名將龐德嘅仔。佢同佢老豆一樣咁勇烈，有佢老豆嘅風采。龐會做官到中尉將軍，封爵列侯。

219年，佢老豆龐德喺樊城之戰中畀關羽殺咗，因爲老豆嘅功勞，龐會封得爵位關內侯。

257年，諸葛誕造反，當時龐會係平寇將軍、臨渭亭侯，佢無參加到叛亂，反而同路蕃一齊鎮壓咗諸葛誕，因爲呢啲功績，加爵爲鄉侯。

263年，鍾會統軍攻滅蜀漢，龐會係鍾會嘅部下。佢受命鍾會，同胡烈、田續一齊攻陷綿竹，然後追擊姜維。據王隱《蜀記》，攻破蜀漢後，龐會爲父尋仇，將關羽嘅家族滅門。而且仲將佢老豆嘅屍首搬返去鄴城度安葬，條屍重好似生前噉。但對於後者，裴松之攷據話，龐德死喺樊城，魏文帝即位後就派人去掃墓，所以屍首唔應該喺蜀漢，所以安葬呢件事可能係假嘅。

參攷資料

• 陳壽（著），裴松之（注）。〈魏書：二李臧文呂許典二龐閻傳 — 龐德傳〉. 《《三國志》》。｢遂為羽所殺。……又賜子會等四人爵關內侯，邑各百戶。會勇烈有父風，官至中尉將軍，封列侯。〈王隱蜀記曰：鍾會平蜀，前後鼓吹，迎德屍喪還葬鄴，冢中身首如生。臣松之案德死於樊城，文帝即位，又遣使至德墓所，則其屍喪不應在蜀。此王隱之虛說也。〉｣
• 陳壽（著），裴松之（注）。〈蜀書：關張馬黃趙傳 — 關羽傳〉. 《《三國志》》。｢〈蜀記曰：龐德子會，隨鍾、鄧伐蜀，蜀破，盡滅關氏家。〉｣
• 陳壽。〈魏書：三少帝紀 — 高貴鄉公記〉. 《《三國志》》。｢己卯，詔曰：『諸葛誕造構逆亂，迫脅忠義，平寇將軍臨渭亭侯龐會、騎督偏將軍路蕃，各將左右，斬門突出，忠壯勇烈，所宜嘉異。其進會爵鄉侯，蕃封亭侯。』｣
• 陳壽。〈魏書：王毌丘諸葛鄧鍾傳 — 鍾會傳〉. 《《三國志》》。｢會乃進軍至涪，遣胡烈、田續、龐會等追維。｣