Elfriede Jelinek

Elfriede Jelinek (1946 nî 10 goe̍h 20 ji̍t chhut-sì ) sī 1-ūi Ò-tē-lī ê cha-bó·-chú-gī hì-ke̍k-ka kiam siáu-soat-ka. I tit-tio̍h 2004 nî ê Nobel Bûn-ha̍k Chióng. Sím-cha tan-ūi phêng-lūn kóng: "i ê siáu-soat kah hì-ke̍k thàu-kòe im-ga̍k-sèng ê siaⁿ-im/hoán-siaⁿ-im, po̍k-chhut siā-hōe ê chhàu-phú-ōe jōa-ni̍h-á hàm koh án-choáⁿ khì chi-phoè lâng".

Jelinek tī Ò-tē-lī Styria ê Mürzzuschlag-tìn chhut-sì. I tī kok-gōa sī siū lâng chun-kèng ê chok-ka, tī kok-lāi khiok-sī bô lâng-iân koh siū tio̍h chē-chē phoe-phêng.

I tiāⁿ-tiāⁿ tī i ê tù-chok lāi-bīn thàm-thó cha-bó·-lâng ê sèng, te̍k-pia̍t sī hông chau-that, khó·-to̍k ê hit bīn. I iōng bô kám-chêng ê gí-giân biô-siá lâng kah lâng chi-kan châm-jím, chhau-chok koân-le̍k ê hō·-tōng koan-hē. I ê chhiú-toāⁿ tùi tho̍k-chiá ū chin tōa ê chìn-hām-sèng. Tùi i lâi kóng, koân-le̍k, chhim-lio̍k-sèng sī lâng ê koan-hē ê tōng-le̍k. I ê sàn-bûn kah hì-ke̍k ū bē-chió cheng-gī-sèng.

I kīn-kî ê chok-phín khai-sí thàm-thó cha-bó·-chú-gī í-gōa ê gī-tê, ǹg it-poaⁿ-sèng ê siā-hōe phêng-lūn kiâⁿ. I ê hì-ke̍k hm̍h-hm̍h, m̄-koh bú-tâi siat-kè hôa-chhái, kiông-tiāu bú-tō-su̍t. I ê Sportstück thàm-thó thé-io̍k ê po̍k-le̍k kah fascio-chú-gī.

Chèng-tī siōng, i hoán-tùi Ò-tē-lī Wolfgang Schüssel ín-chhoā ê iù-phài chèng-hú. I tùi 1974 nî chham-ka Ò-tē-lī Kiōng-sán-tóng, kàu-kah 1991 nî.

Jelinek's ê siáu-soat Die Klavierspielerin ū kái chò tiān-iáⁿ (Kǹg-khîm-ka, 2001).

I bô ài hong-sîn, mā kóng i kiaⁿ chheⁿ-hūn. I bô àn-sǹg chhin-sin chham-ka Nobel Chióng ê pan-chióng tián-lé. I ū kóng i hoaⁿ-hí tio̍h-chióng, m̄-koh i mā kám-kak ut-chut, in-ūi i taⁿ chiâⁿ-chò kong-kiōng jîn-bu̍t. I mā hoai-gî sī in-ūi i sī cha-bó·--ê chiah ē tio̍h-chióng.

Chok-phín

Siáu-soat

bukolit. hörroman 1979
wir sind lockvögel baby! 1970
Michael. Ein Jugendbuch für die Infantilgesellschaft 1972
Die Liebhaberinnen 1975
Die Ausgesperrten 1980
Die Klavierspielerin (Kǹg-khîm-ka) 1983
Oh Wildnis, oh Schutz vor ihr 1985
Lust 1989
Die Kinder der Toten 1997
Gier 2000

Hì-kek

Was geschah, nachdem Nora ihren Mann verlassen hatte; 1977
Clara S.; 1981
Burgtheater; 1983
Krankheit oder Moderne Frauen; 1984
Präsident Abendwind; 1987
Wolken.Heim; 1988
Totenauberg; 1991
Raststätte; 1994
Stecken, Stab und Stangl; 1996
Ein Sportstück; 1998
er nicht als er; 1998
In den Alpen
Das Werk
Prinzessinnendramen
Bambiland; 2003

Hoan-e̍k

Die Enden der Parabel Thomas Pynchon ê siáu-soat; 1976
Herrenjagd Georges Feydeau ê hì-kek; 1983
Floh im Ohr Georges Feydeau ê hì-kek; 1986
Der Gockel Georges Feydeau ê hì-kek; 1986
Die Affaire Rue de Lourcine Eugène Labiche ê hì-kek; 1988
Die Dame vom Maxim Georges Feydeau ê hì-kek; 1990
Der Jude von Malta Christopher Marlowe ê hì-kek; 2001
Ernst sein ist alles Oscar Wilde ê hì-kek; 2004
Lyrik und Kurzgeschichten (latein-)amerikanischer AutorInnen

Gōa-pō͘ liân-kiat

I ê bāng-chām (Tek-gí)
Nobel Chióng ê siāu-kài-bûn