Catherine, Prinses van Wallis
| Catherine, Prinses van Wallis | |
|---|---|
Catherine in 2023.
| |
| Volle naam | Catherine Elizabeth Mountbatten-Windsor, gebore Middleton |
| Eggenoot | William, Prins van Wallis |
| Titels | Catherine, Hertogin van Cornwall Catherine, Prinses van Wallis |
| Huis | Windsor |
| Vader | Michael Francis Middleton |
| Moeder | Carole Elizabeth Middleton, gebore Goldsmith |
| Gebore | 9 Januarie 1982, Reading, Berkshire |
Catherine, Prinses van Wallis GCVO (gebore Catherine Elizabeth (Kate) Middleton op 9 Januarie 1982 in Reading, graafskap Berkshire) is die eggenote van William, Prins van Wallis, wat die eerste aanspraakmaker op die Britse troon is.
Lewensloop
Die Prinses van Wallis het in Bucklebury in die graafskap Berkshire grootgeword. Sy het die St. Andrew-skool in Pangbourne in die graafskap Berkshire en die Marlborough-kollege in die graafskap Wiltshire bygewoon, en daarna kunsgeskiedenis aan die Skotse Universiteit van St. Andrews gestudeer. Van November 2006 tot Oktober 2007 het sy by die klerefirma Jigsaw gewerk, en sedert einde 2008 by Party Pieces, 'n posbestellingsonderneming vir feesbenodigdhede en -versierings wat aan haar ouers behoort.
Sy is nie van adellike afkoms nie en is 'n lid van die Anglikaanse Kerk. Sy het 'n jonger suster (Pippa, gebore 1983) en broer (James, gebore 1987).
Kate en William het mekaar in 2001 aan die Universiteit van St. Andrews leer ken. Hulle het sedert 2002 'n verhouding gehad en het in Oktober 2010 verloof geraak. Die paartjie is op 29 April 2011 getroud. Sir Thomas Fairfax (c. 1475–1520), voorvader van die 17de-eeuse Engelse generaal sir Thomas Fairfax (1612–1671), is hul gemeenskaplike voorouer.[1] Tussen 2010 en 2013, toe William 'n RAF-lugreddingvlieënier was, het die egpaar by Anglesey, 'n eiland in die noordweste van Wallis gewoon.
Op 22 Julie 2013 het sy die lewe geskenk aan 'n babaseuntjie in 'n Londense hospitaal. Die Britse koningshuis het 'n paar dae later bekend gemaak die nuweling se naam is George Alexander Louis, nou prins George van Wallis. Die naam George, van ses konings, is ook die naam van wyle koningin Elizabeth II se pa, George VI, wat die Britte tydens die Tweede Wêreldoorlog verenig het.[2] Hul tweede kind, prinses Charlotte Elizabeth Diana, is op 2 Mei 2015 in Londen gebore. Die naam Charlotte is die vroulike vorm van Charles, vader van William en ook een van Catherine se suster, Pippa, se name; die naam Elizabeth is die tweede naam van Catherine en ook van haar moeder, Carole Middleton, en die eerste naam van koningin Elizabeth II, grootmoeder van William. Die naam Diana is die naam van Diana, Prinses van Wallis, William se moeder.[3] Hul derde kind, Louis Arthur Charles, is op 23 April 2018 gebore. Agttien konings in Frankryk het Louis geheet; dit is ook William se vierde naam. Louis is 'n familienaam van die Mountbatten-familie. Dit was die naam van prins Philip se oom en prins Charles se “ere-oupa”, die graaf Mountbatten van Birma, en van prins Philip se oupa, prins Louis van Battenberg (later Mountbatten en die eerste Markies van Milford Haven). Arthur is een van William én sy pa, Charles, se name. Sy naam Charles is ook sy oupa se naam, sowel as een van William se broer, Harry, s'n.
Aanspreekvorm
- 9 Januarie 1982 - 29 April 2011: mej. Catherine Middleton
- 29 April 2011 - 8 September 2022: HKH die Hertogin van Cambridge[4]
- in Skotland: HKH die Gravin van Strathearn
- 8 September 2022 - 9 September 2022: HKH die Hertogin van Cornwall en Cambridge[5]
- Sedert 9 September 2022: HKH die Prinses van Wallis
- in Skotland: HKH die Hertogin van Rothesay
Verwysings
- ↑ Reitwiesner, William Addams; Steward, Scott Campbell (2011). Child, Christopher Challender (red.). The Ancestry of Catherine Middleton (in Engels). Boston, Massachusetts: New England Historic Genealogical Society. pp. 9, 16. ISBN 978-0-88082-252-7.
- ↑ En die klein prins se naam is..., Nuus24, 25 Julie 2013
- ↑ Low, Valentine (5 Mei 2015). "Charlotte Elizabeth Diana: a name to honour the women in William's life". The Times (in Engels): 1, 4.
- ↑ Newton, Jennifer (8 September 2022). "Prince William and Kate Middleton's new titles and roles as Charles becomes King". Daily Mirror. Londen. Besoek op 8 September 2022.
{{cite news}}: AS1-onderhoud: url-status (link) - ↑ Juneau, Jen (8 September 2022). "Prince William and Kate Middleton Change Social Media to Duke and Duchess of Cornwall Titles". People. Londen. Besoek op 8 September 2022.
{{cite news}}: AS1-onderhoud: url-status (link)
Bronne
- Duitse, Engelse en Nederlandse Wikipedias.
Eksterne skakels
Wikimedia Commons het meer media in die kategorie Catherine, Prinses van Wallis.
- (en) Profiel, BBC
- (en) Stamboom, BBC
| Normdata |
|
|---|