ATKV-Universiteitedebat
| Tipe | Studente Debatskompetisie |
|---|---|
| Vind plaas | Jaarliks |
| Webwerf | www.atkv.org.za/af/taal/atkv-universiteitedebat |
| Huidige Wenners | Noordwes-Universiteit |
| Sedert | 2007 |
Die ATKV-Universiteitedebatskompetisie word sedert 2007 deur die ATKV aangebied. Elke jaar speel een van die deelnemende universiteite gasheer vir die debatskompetisie. Elke deelnemende universiteit word deur twee debatspanne verteenwoordig. Die wenners van die kompetisie word deur 'n uitklopronde bepaal. Die wenspan in die finaal word dan as algehele wenner gekroon. Die kampuswenner word aangewys op grond van die groottotaalpunte wat die twee spanne tydens die kompetisie behaal het.
Geskiedenis
[wysig | wysig bron]Nadat die debatskompetisie vir hoërskoolleerders goed gevestig was as een van die ATKV se projekte op nasionale vlak is die besluit geneem om ook 'n universiteitedebatskom-petisie van stapel te stuur. ln 2006 het daar verteenwoordigers van verskeie universiteite by die ATKV-hoofkantoor in Randburg byeengekom.
Daar is toe besluit om die kompetisie slegs in Afrikaans te laat plaasvind alhoewel daar versoeke was dat die kompetisie ook in Engels aangebied moes word. Die studentedebat is gegrond op die Britse parlementêre stelsel. Dit val binne die missie en visie van die ATKV om Afrikaans onder die jeug in sy totaliteit met al sy verskeidenheid so te bevorder dat dit studente sal bemagtig om 'n leidende rol te speel in die toekoms van Suid-Afrika. Ook om deur 'n gestruktureerde, georganiseerde kompetisie aan studente die geleentheid te bied om die vaardigheid van openbare redevoering en debattering te ontwikkel, kommunikasievaardighede op te skerp en 'n platform daar te stel om teoretiese kennis in praktyk te omskep.
Hierdeur word openbare sprekers ontwikkel wat weldeurdagte standpunte kan lewer, handhaaf en verdedig as leiers op vele gebiede in Suid-Afrika. Die universiteite wat aan die kompetisie deelgeneem het van 2007 af was Noordwes-Universiteit, Universiteit van Johannesburg, Universiteit van Pretoria, Universiteit Stellenbosch en Universiteit van die Vrystaat. Vanaf 2012 het Universiteit Wes-Kaapland ook aan die kompetisie begin deelneem.
Die kompetisie het met verloop van tyd baie positief gegroei. Daar is ook kursusse by die verskillende universiteite aangebied. Die insette van deelnemende spanne het deurentyd die standaard van die kompetisie verhoog.
Kompetisie
[wysig | wysig bron]Die kompetisie vind plaas deur elke span wat geloot word om teen drie spanne in die eerste ronde te praat.
Hierna dring die top agt spanne deur na die uitkloprondes wat bestaan uit 'n kwarteind-, halfeind en finaleronde.
Daar is vir die vier oorblywende spanne 'n platefinaal wat plaasvind wat bestaan uit 'n halfeind- en finaleronde.
Samestelling van debatte
[wysig | wysig bron]Die ATKV-Universiteitsdebatsfinaal is gegrond op die Britse parlementêre styl. Die debat word gevoer deur twee spanne wat elk uit vier persone bestaan. Die twee spanne bestaan uit die regering en die opposisie.
Die regering bestaan uit:
- Die eerste minister
- Die adjunk eerste minister
- Die derde regeringspreker
- Die regering se hoofsweep
Die opposisie bestaan uit:
- Die leier van die opposisie
- Die adjunkleier van die opposisie
- Die derde opposisiespreker
- Die opposisie se hoofsweep