Bariloche
San Carlos de Bariloche Bariloche | |
|---|---|
Alpynse landskap en argitektuur in Bariloche | |
San Carlos de Bariloche | |
| Koördinate: 41°09′0″S 71°18′0″W / 41.15000°S 71.30000°W | |
| Land | |
| Provinsie | Río Negro |
| Stigting | 3 Mei 1902 |
| Regering | |
| • Burgemeester | Omar Goye |
| Hoogte | 893 m (2 930 ft) |
| Bevolking | |
| • Totaal | 108 250 |
| Tydsone | UTC-3 (ART) |
| Poskode | 8400 |
| Skakelkodes | 0294 |
| Webwerf | bariloche.gov.ar |
Bariloche (amptelik: San Carlos de Bariloche) is 'n gewilde vakansieoord met 108 000 inwoners in die provinsie Río Negro (Argentinië), in die hart van die Nasionale Nahuel Huapi-park en aan die oewer van die Nahuel Huapi-meer.
Die stad het 'n sterk Sentraal-Europese voorkoms, aangesien die voorvaders van baie inwoners van Duitsland, Switserland en Noord-Italië afkomstig is. Sowel die stedelike argitektuur met sy Switserse chalets asook die ekonomie, wat sterk op die toerisme, sjokolade- en keramieknywerheid steun, getuig van hierdie invloed. Die sjokoladebedryf is nog steeds in die hande van 'n aantal Italiaanse families; hul ondernemings in die binnestad van Bariloche staan oop vir besoekers.
Geskiedenis
[wysig | wysig bron]Die gebied van die Nahuel Huapi-meer is ná die woestynveldtog van generaal Julio A. Roca teen die einde van die 19de eeu deur setlaars gekoloniseer. Die Texaanse cowboy Jarred Jones en die Duitse immigrant Carlos Wiederholt het onafhanklik van mekar twee nedersettings gestig.
San Carlos de Bariloche is amptelik in 1902 gestig en het aanvanklik as 'n sentrum vir die handel met Suid-Chili gedien. Die gebied het reeds in hierdie periode buitelandse toeriste gelok soos onder meer die Amerikaanse president Theodore Roosevelt en die Prins van Wallis.
Danksy die bou van 'n spoorwegverbinding in 1932 het Bariloche se gewildheid as 'n toeristebestemming vinnig toegeneem, veral ná die Tweede Wêreldoorlog.
Besienswaardighede
[wysig | wysig bron]- Die Patagonia-museum in die Burgersentrum is - naas die sjokoladefabrieke - die belangrikste besienswaardigheid in die stad self. Dit behandel die geologiese geskiedenis van die omgewing en sy fauna. Daarbenewens word ook Indiaanse kuns en artefakte vertoon.
- Die natuurskoon van die reusagtige Nahuel Huapi-meer en die gebergtes in sy omgewing is een van die mooiste in Argentinië.
- El Bolsón, sowat 80 myl van Bariloche, is 'n klein dorp in 'n rustige vallei. In die sestigerjare is dit die hoofstad van die Argentynse hippie-beweging, en daar is nog enkeles wat hier steeds 'n alternatiewe lewensstyl soek.
Sport en ekskursies
[wysig | wysig bron]Bootvaarte, allerlei soorte watersport, jag, perdry, gholf, bergklim en skisport in die winter is beskikbaar. Die Catedral Skisentrum sowat 11 myl van Bariloche is een van die grootstes in die Suidelike Halfrond.
Kookkuns en hotelle
[wysig | wysig bron]Die plaaslike kookkuns sluit natuurlik Switserse fondue in; maar ook forelle, wildsvleis en wildevark staan bo-op die spyskaart. Die hotelle is soos die restourante eersterangs; Bariloche is 'n gewilde Argentynse bestemming vir wittebroodsvakansies en skooltoere. Buitelandse toeriste moet besprekings vooraf maak. Die nuwe vyfsterhotel Panamericano Bariloche maak van Bariloche nou ook 'n geskikte plek vir sakevergaderings in Suid-Amerika.
Plaaslike produkte
[wysig | wysig bron]Sjokolade, keramiek, konfyt en truie, wat plaaslik vervaardig word, is van hoë gehalte en gewilde aandenkings.
| Wikimedia Commons bevat media in verband met San Carlos de Bariloche. |