Brandfort

Brandfort
Dorp
Die perseel van die NG gemeente Brandfort op ’n straatblok wat deurbrand-, Loop-, Voortrekker- en Kerkstraat gevorm word.
Brandfort  Brandfort se ligging in Vrystaat
Koördinate: 28°42′5″S 26°27′32″O
Land	Suid-Afrika
Provinsie	Vrystaat
Distrik	Lejweleputswa
Munisipaliteit	Masilonyana
Stigting	1875
Oppervlak
• Totaal	27,08 km2 (10,46 vk. myl)
Bevolking  (2011)
• Totaal	3 134
• Digtheid	116/km2 (300/vk. myl)
Rasverdeling (2011)
• Wit mense	45.1%
• Indiërs/Asiërs	0.7%
• Bruin mense	1.9%
• Swart mense	52.3%
• Ander	0.1%
Taal (2011)
• Afrikaans	49.1%
• Sotho	33.3%
• Xhosa	6.6%
• Tswana	4.1%
• Ander	6.8%
Poskode (strate)	9400
Poskode (posbusse)	9400
Skakelkode	051

Brandfort is 'n klein dorp, sentraal geleë in die Vrystaat, Suid-Afrika, naby Bloemfontein, Winburg, Theunissen en Bultfontein. Die R30-provinsiale pad en die R703-streekroete kruis in die dorp.

Geskiedenis

'n Vrouemonument is ná die Tweede Vryheidsoorlog voor Brandfort se NG moederkerk opgerig ter nagedagtenis aan die vroue en kinders wat in die konsentrasiekamp gesterf het.

Die dorp is gestig op die plaas Keerom wat vir die eerste keer in 1838 deur Jacobus van Zijl, 'n Voortrekker van Prins Albert beset is. In 1866 het hy die NG Kerk genader om 'n dorp op sy plaas uit te lê. Die eerste woonerwe is op 30 Oktober 1866 verkoop. Die dorp is eers in 1874 geproklameer en het munisipale status in 1884 gekry.

Distrik

Die distrik is 3 660 km² groot. Gemengde boerdery word beoefen en daar is verskeie stoeterye vir merino's, Afrikanerbeeste, Bonsmara's en varke in die omgewing. 'n Paar kilometer buite die dorp is daar 'n groot hoenderplaas; Môreson. In die Weste is daar ook 'n aantal panne. Brandfort spog ook met 'n uitstekende skool gestig in 1906. Vroeër jare was dit 'n volkskool, maar het gegroei tot skool wat baie kinders lok uit omliggende distrikte soos Bultfontein, Winburg, Theunissen en selfs die naby gelee hoofstad van die Vrystaat; Bloemfontein.

Om die dorp is daar ook verskeie wildsplase naamlik Amanzi wildreservaat, Stone Safari's reservaat asook Grasslands Estate na die Weste van die dorp. Grasslands is naby die Esbach-koppe gelee en hulle gebruik die koppe as natuurlike landmerk in die logo van hul Estate. Na die Suidooste groet Keeromberg jou, dis die grootste berg in die area. Aan die voet van Keerom lê die plaas van oudpresident CR Swart wat as staatspresident gedien het van 1961 tot 1967. Dié plaas se naam is De Aap. Hy was 'n groot figuur in die gemeenskap en die plaaslike skool is na hom vernoem.

Tweede Vryheidsoorlog

Die Slag van Brandfort het op 25 Maart 1900 hier plaasgevind. Daar was ook 'n konsentrasiekamp by Brandfort genaamd Dwyersdorp so genoem omrede 'n Ier, kaptein Dwyer baie simpatie met die vroue en kinders gehad het. Van hulle het 1 550 egter gesterf.

Sien ook

• Gereformeerde kerk Brandfort
• NG gemeente Brandfort
• Lys van dorpe in Suid-Afrika
• Majemasweu (sy township)

Bron

• Eric Rosenthal. Ensiklopedie van Suidelike Afrika. 1967.
• B.P.J. Erasmus. Op Pad in Suid-Afrika. 1995. ISBN 1-86842-026-4