Henning

Die naam Henning is inheems tot die Noord-Duitse gebiede Mecklenburg, Hannover, Hamburg, Holstein en Pommere. Veral die stede Stralsund en Greifswald, in Mecklenburg, naby die Baltiese See staan bekend as plekke waar die naam ontstaan het. Albei stede was tot en met die Dertigjarige Oorlog (1618 — 1648) deel van Denemarke. Tussen die jare 1300 en 1500 is die naam Henning as 'n gewilde bynaam aan Johannes se seun gegee. In die ou Baltiese dialek is 'n hoenderhaan 'n “hen” genoem (hen = manlik, henne = vroulik). Die Baltiese (of Noord-Duitse) “ing” is bygevoeg om aan te dui dat dit 'n naam is wat afgelei is van 'n vader of voorsaat se naam. In moderne Afrikaans sou ons hom Haantjie genoem het. Dit was dus ’n vriendelike manier om so ’n persoon aan te spreek.

Die naam het ontstaan onder edelmanne en ridders, soos

• Henning = Johannes Older, wat in 1290 in die omgewing van Stralsund gewoon het.
• Henning = Johannes Brunswick, wat in 1305 te Kolberg gewoon het. Kolberg val vandag binne die grondgebied van Pole, maar was gedurende 1305 deel van die Staat wat vandag Duitsland genoem word.
• Henning = Johannes Dotenberg (Ridder), wat in 1326 in die omgewing van Greifswald woonagtig was. Daar word vermoed dat hy 'n nasaat van Johannes Older was.
• Graaf Henning van Irkesleve wat in 1330 in Haldslohe gewoon het.

Gedurende die 13/14e eeue het nasate van hierdie eerste Hennings versprei oor die gebiede wat vandag as Duitsland, Denemarke en Noorweë bekend is. Alle rekords uit hierdie tyd het egter met verloop van tyd verlore gegaan.

Gedurende die 17e en 18e eeu het verskeie Hennings begin om elders heen te verhuis — ook na die nuwe wêreld. So vind ons vandag een van die grootste Henning stamme in Suid-Afrika. Henning gesinne word vandag egter in bykans al die beskaafde lande van die Westerse wêreld gevind.

'n Paar Henning nasate het egter in die omgewing van Stralsund en Greifswald agtergebly. Dit is bekend dat Jacob Henning (die oue), gedurende 1635 te Demmin (naby Greiffswald) gebore is. Jacob Henning en sy nasate het as die Henning familie van Karnin bekend geword. Karnin is ongeveer 25 km vanaf Stralsund. Jacob Henning en sy nasate was groot en welgestelde grondeienaars wat in 'n kasteel gewoon het. Hierdie kasteel is gedurende 1945, tydens die Tweede Wêreldoorlog deur die Kommunistiese regering, wat Oos-Duitsland oorgeneem het, gekonfiskeer. Die familie het hierna oor Wes-Duitsland versprei.

Mense

Suidelike Afrika

• Andries Gerhardus Henning (1859–1932), Oranje-Vrystaatse politikus
• Francois Henning, Suid-Afrikaanse musikant wat onder die verhoognaam Snotkop optree
• Nan Henning (1910–2003), Afrikaanse skryfster
• Pieter Hendrik Henning (1886–1975), Argentynse en Suid-Afrikaanse outeur

Verenigde State

• Pat Henning (1908–1973), Amerikaanse akteur

Boeke

• Die Henning-familiekroniek, ISBN 0620203005

Eksterne skakels

• Henningfamilies Wêreldwyd