Swjatopolk II van Kiëf

Swjatopolk II
Grootprins van Kiëf
Mosaik van Swjatopolk II van Kiëf
Periode	1093 tot 1113
Voorganger	Wsewolod I
Opvolger	Wladimir Monomach
Huis	Rjoerik
Kinders	Zbislawa Predslawa Jaroslaf Maria
Vader	Isjaslaf I
Gebore	1050
Oorlede	16 April 1113

Swjatopolk II van Kiëf (Russies: Святополк II Ізяславич; 1056 – 16 April 1113) het van 1093 tot 1113 as grootprins oor Kiëf-Roes regeer. Hy was nie baie gewild nie en sy bewind is gekenmerk deur ’n voortdurende stryd teen sy neef Wladimir Monomach. Met sy dood het die burgers van Kiëf gerebelleer teen Joodse handelaars en Warangiese amptenare wat in graan en sout handel gedryf het.

Swjatopolk was die buite-egtelike seun van Isjaslaf I by sy minnares. Sy doopnaam was Michail. Terwyl sy broer, Jaropolk, geleef het, is hy nie beskou as ’n moontlike troonopvolger nie. In 1069 is hy na Polotsk gestuur, ’n stad wat vir ’n rukkie deur sy pa van die plaaslike leier, Wseslaf, afgeneem is. Daarna het hy tien jaar lank oor Nowgorod regeer (1078-'88). Met sy broer se dood het hy hom in Toerof opgevolg.

Toe Wsewolod in 1093 sterf, is Swjatopolk deur ander prinse erken as die grootprins se senior seun en het hy die troon bestyg. Hoewel hy deelgeneem het aan die prinslike kongresse wat deur Wladimir Monomach gereël is, het hy soms oorlog tussen die Rjoerikid-prinse aangevuur.

Swjatopolk was twee keer getroud; met ’n Boheemse prinses en in 1094 met die dogter van Tugor Khan. By sy eerste vrou het hy twee dogters gehad: Zbislawa, wat getrou het met koning Boleslaw III van Pole, en Predslawa, wat getrou het met Prins Álmos van Kroasië. Sy seun, Jaroslaf, het in Wolinië regeer. Weens Jaroslaf se vroeë dood het sy afstammelinge alle reg op die troon van Kiëf verbeur. Swjatopolk het nog ’n dogter, Maria, gehad.

Verwysings

Hierdie artikel is merendeels vertaal vanaf die Engelse Wikipedia-artikel en:Sviatopolk II

Eksterne skakels

• Biografie Geargiveer 4 Junie 2007 op Wayback Machine