Tabletrekenaar
- Nota: Hierdie artikel handel oor die elektroniese apparaat. Vir die medisynedoseervorm, sien: Tablet (medisyne).
’n Tabletrekenaar, of tablet, is ’n persoonlike draagbare eendelige (in een stuk) rekenaar. Toestelle het gewoonlik ’n raakskerm waarvan die primêre manier van beheer met vinger- of skryf-tipe gebare is. Dit word dikwels aangevul deur die gebruik van een of meer fisiese kontaksensitiewe knoppies of die invoer van een of meer versnellingsmeters; ’n virtuele sleutelbord (wat verskuil kan word) op die skerm word oor die algemeen gebruik as die vernaamste metode om data in te voer. Tablette is beskikbaar in verskillende groottes maar bied gewoonlik ’n skerm van groter as 18 cm (oorhoeks gemeet) aan. Die grootte onderskei dus die tablette van slimfone of persoonlike digitale assistente wat funksioneel soortgelyk is.[1][2][3]
’n Tabletrekenaar is groter as ’n selfoon, maar kleiner as ’n persoonlike rekenaar. Die hoofdoel van ’n tabletrekenaar is om boeke te lees, speletjies te speel, die Internet te deurkruis, of om video’s en musiek te speel. Mobiele weergawes van kantoorpakkette soos Microsoft Office is eweneens beskikbaar. Van die bekende vervaardigers van tabletrekenaars is Samsung met hulle Galaxy Tab-reeks en Apple Inc. met hulle iPad. Naas Apple se mobiele bedryfstelsel iOS gebruik die meeste tabletrekenaars Google Android as bedryfstelsel, maar sommige gebruik ook weergawes van Windows of Ubuntu. Die Amerikaanse aanlynreus Amazon, Inc. voorsien sy Fire-tabletrekenaarreeks van 'n aangepaste weergawe van die Android-bedryfstelsel - Fire OS.
Markaandele in 2017, 2018 en 2019
[wysig | wysig bron]| Vervaardiger | Markaandeel 2017[4] | 2de kwartaal 2018[5] | 4de kwartaal 2019[6] |
|---|---|---|---|
| Apple, Inc. | 26,8% | 34,1% | 36,5% |
| Samsung Electronics Co., Ltd. | 15,2% | 14,9% | 16,1% |
| Amazon, Inc. | 10,2% | 4,8% | 7,6% |
Volgens marknavorsing wat deur die Hamburgse onderneming Statista gedoen is, sal daar in 2019 sowat 180 miljoen tabletrekenaars wêreldwyd verkoop word. Europa is reeds sedert 2013 die belangrikste mark, met verkope van sowat 102 miljoen eenhede in 2017. Asiatiese markte in die Stille Oseaangebied toon vinnige groei met 'n beraamde verkoopsyfer van 108,6 miljoen in 2018 (sonder Japan) en sal Europa na verwagting in 2019 verbysteek.[7]
Die Amerikaanse vervaardiger Apple, Inc. is sedert die tweede kwartaal van 2011 die markleier op die tabletmark, al het sy destydse markaandeel van meer as 60 persent in die volgende jare bestendig afgeneem. In die eerste kwartaal van 2018 is dit op 28,8 persent beraam. Die belangrikste mededinger is die Suid-Koreaanse Samsung Electronics Co., Ltd., met 'n markaandeel wat van slegs 7,3 persent in die tweede kwartaal van 2011 tot 15,2 persent in 2018 gegroei het. Intussen het - naas Acer, Asus en Hewlett-Packard - ook Chinese vervaardigers soos Huawei en Lenovo tot die mark toegetree.
Verwysings
[wysig | wysig bron]- ↑ (en) Redakteurs van PC Magazine. "Definisie van: tabletrekenaar". PC Magazine. Geargiveer vanaf die oorspronklike op 16 Julie 2010. Besoek op 17 April 2010.
- ↑ Dictionary.com. "Tabletrekenaar – 1 woordeboekresultaat". Dictionary.com (in Engels). Geargiveer vanaf die oorspronklike op 10 September 2015. Besoek op 17 April 2010.
- ↑ (en) Ogg, Erica (28 Mei 2010). "Wat maak 'n tablet 'n tablet? (gereelde vrae)". CNET.com. Besoek op 23 Maart 2013.[dooie skakel]
- ↑ Die Welt, 11 Julie 2018: Microsoft fordert mit dem „Surface Go“ das iPad heraus. Besoek op 11 Julie 2018
- ↑ statista.com, 2 Maart 2020: Tablet shipments market share by vendor worldwide from 2nd quarter 2011 to 4th quarter 2019. Besoek op 27 Mei 2020
- ↑ statista.com, 2 Maart 2020: Tablet shipments market share by vendor worldwide from 2nd quarter 2011 to 4th quarter 2019. Besoek op 27 Mei 2020
- ↑ Statista.com: Global tablet market share held by tablet vendors from 2nd quarter 2011 to 1st quarter 2018. Besoek op 11 Julie 2018