Tellgau

Die blanti Ufdeilig vo dr Eidgenosseschaft 1798: dr Tellgau isch malvefarbig.

Dr Tellgau, französisch Tellgovie, (s Land vom Wilhelm Tell) isch dr Name gsi vo einere vo de drei Dochderrepublike, wo s revolutionäre Frankriich 1798 blant het, uf em Gebiet vo dr ehemolige Eidgenosseschaft z errichde. Er hätt us de Waldstette und de drei graubündnerische Bünd bestande. Si politischi Struktur wär, im Gegesatz zu de beide andere blante Republike, dr Helvetische und dr Rhodanische Republik, wo as zentralistischi Eiheitsstaate blant gsi si, föderalistich gsi, und Schwyz wär si Hauptort worde.

Dr Kommandeur vo de französische Druppe in dr Schwiiz, dr General Guillaume Brune, het am 16. und 19. Merz 1798 d Deilig und d Neuornig vo dr Eidgenosseschaft proklamiert. Das het aber e Sturm vo Entrüstig brovoziert, ass scho am 22. Merz dr Widerruef cho isch. Am 12. April 1798 isch denn die zentralistischi Helvetischi Republik usgrüeft worde, wo braktisch alli Deil vo dr Alte Eidgenosseschaft umfasst het.