Estella

Estella (Lizarra en basco) ye un monezipio de Navarra situato á una distanzia de 44 km de Pamplona. La suya poblazión ye de 13.892 abitants (2006), en una superfizie de 15,39 km² y una densidat de poblazión de 902,66 hab/km².

Istoria

La ziudat s'establió á man de lo primitibo burgo de Lizarra, reconquerito por Sancho Garzés I en l'año 914. En l'año 1090 lo rei Sancho Remíriz de Pamplona y Aragón dezidió fomentar l'asentamiento n'este lugar de francos (comerziants, omes libres de lo basallache á nobles y eclesiasticos), ya que caleba una poblazión más gran pa atender á los pelegrins de lo camín de San Chaime. Cambeó un poquet lo camín pa que pasase por Lizarra, y costruyó un castiello y creyó una nueba poblazión en la marguin dreita de lo río. Se rodeyó de murallas y lo mismo año se conzedió un fuero basato en lo de Chaca, autorizando l'establimiento de francos, pero sometendo la de los nabarros á la aprobazión reyal.

Posteriorment, en 1187, Sancho lo Saputo dezidió poblar con nabarros y atras chens una de las tierras de lo costato, clamada de San Chuan, conzedendo á los nuebos abitadors un fuero egual a lo que teneba la ziudat, redautato en 1164. En 1188 conzedió lo fuero á lo bico d'Arenal. Coesistioron, doncas, tres nuclios de poblazión diferens, que s'unioron en un unico monezipio en 1266.

Los deszendiens de los francos que se i establioron manteniron l'emplego de l'oczitán zisperinenco dica lo sieglo XVI, feito faborexito por que en los lugars d'arredol se charraba basco en la Edat Meya y no una luenga romanze como en atros lugars de Castiella, Navarra y Aragón on i abió francos.

Molimentos

• Basilica de Nuestra Señora del Pui, con nombre oczitán. L'actual basilica sustituye á atra anterior d'estilo barroco. A ilesia aculle una imachen sedent de la Birchen del Pui, patrona de la ziudat, chapeyata en plata e datable en lo sieglo XIV. Á más, son piezas escultoricas dinnas de menzionar dos imachens de Cristo cruzificato, feitas en lo sieglo XVII.

Beyer tamién

• Lista de monezipios de Navarra