Parroquia eclesiastica
Una parroquia, como entidat eclesiastica, ye l'elemento esencial que conforma as diocesis, que s'aplica a cuantas ilesias: a Ilesia Catolica Romana, a Ilesia Anglicana, a Ilesia Ortodoxa, a Ilesia d'Escocia, a Ilesia de Suecia y atras. A parroquia relichiosa designa alavez una aria cheografica precisa, o territorio d'a parroquia, y un grupo de creyents d'ixa fe que habitan iste territorio y constituyen a comunidat parroquial.
A ilesia parroquial ye o puesto de reunión d'a comunidat debant d'a cual o pastor y os suyos asistents fan diferents cerimonias relichiosas tals como a misa dominical.
A palabra proviene d'o latín parochia y iste d'o griego παροικία, termin utilizau por as primeras comunidaz cristianas pa designar o territorio d'una ciudat episcopal. En o sieglo V ya teneba un sentiu pareixiu a l'actual y designaba a os territorios y comunidaz existents en a redolada d'una seu episcopal.
En a Ilesia Catolica
[editar | modificar o codigo]En a Ilesia Catolica a parroquia[1] ye a comunidat de fidels catolicos, perteneixient a una ilesia particular (por un regular a una diocesi) que ye baixo a dirección espritual d'un mosén, que se designa como rector, nombrau por o bispe diocesano. Dende a perspectiva churidica a parroquia y o rector[2] se richen por o Dreito Canonico.
De forma parellana a la resta d'ilesias cristianas por un regular as parroquias catolicas se definen por un territorio. Ye decir, perteixen a la parroquia toz os fidels que habiten adinto d'as mugas territorials d'a parroquia. Encara que ye posible establir parroquias personals en función d'o rito, luenga u nacionalidat d'os fidels d'un territorio "u mesmo por un atra determinada ragón". Asinas o canon 813 d'o Dreito Canonico permite a erección d'una parroquia ta estudiants universitarios y bellas diocesis han erechiu parroquias ta personas ixordas.[3]
O canon 374 estableixe que as parroquias amanadas pueden agrupar-se entre sí, ta formar, por eixemplo, arcipestraus.
Orichinariament as parroquias se creyoron por a Ilesia Catolica y yeran formadas por un chicot territorio (cuantos lugars u lugarons) que s'asignaban a un capellán.
O presbíter u capellán como rector u vicario s'encargaba de fer misas, funerals, baptismos, matrimonios, confesions, confirmacions mas que mas a os que yeran en periglo de muerte, a unción de malautos y toz os sacramentos fueras d'a orden sacerdotal; amás d'ufrir consuelo a os suyos habitants y feligreses, tamién estendeba os suyos servicios a os diferents templos y capiellas d'os lugars que feban parti d'a parroquia. A función d'o rector plegó a estar muit important, actuando como consellero ta las familias, de mediador en os pleitos, y mesmo exercindo funcions de chuez de paz y de notario.
A parroquia y a división administrativa
[editar | modificar o codigo]En muitas ocasions os districtos parroquials han estau o punto de partida ta a creyación de nuevos municipios a causa d'a consciencia comunitaria d'os suyos habitants empentaus por os suyos consellos parroquials, u vicarials seguntes o caso, que en gosaban estar os impulsors.
En atros puestos a on a población dispersa ye, u ha estau, a norma d'asentamiento poblacional, as parroquias s'han constituyiu en divisions administrativas, a partir d'un proceso pareixiu a l'anterior que no plegará a adquirir dimensions poblacionals suficients. Casos bien conoixius son as Pitiusas, o Prencipau d'Andorra, Asturias u Galicia.
Referencias
[editar | modificar o codigo]- ↑ (es) J. A. Estrada, Article "Parroquia" en o "Diccionario básico de pastoral" Editorial Verbo Divino Estella 1988 pachs. 335 y 336
- ↑ (es) José Maria Reyes Vizcaino "El parroco en el derecho canónico"
- ↑ (es) Pedro María Reyes Vizcaino "Naturaleza de la parroquia en el derecho canonico"
Bibliografía
[editar | modificar o codigo]- (es) Diccionario básico de pastoral Editorial Verbo Divino Estella (Navarra) 1988.
- (es) Conceptos fundamentales de pastoral Editorial Cristiandad Madrid 1983.
- (es) Floristán, Carlos La parroquia, comunidad eucarística Madrid 1961.