Maureen O'Hara

Maureen O'Hara
Vida
Nacimientu	Ranelagh, 17 d'agostu de 1920
Nacionalidá	República d'Irlanda ; Estaos Xuníos
Muerte	Boise, 24 d'ochobre de 2015 (95 años)
Sepultura	Cementeriu Nacional d'Arlington
Causa de la muerte	causes naturales
Familia
Casada con	George H. Brown (1939 – 1940); Will Price (1941 – 1952); Charles F. Blair Jr. (es) (1968 – 1978)
Fíos/es	Bronwyn FitzSimons
Hermanos/es	Charles B. Fitzsimons; James O'Hara
Estudios
Llingües falaes	inglés
Oficiu	escritora, autobiógrafa, cantante, actriz de teatru, actriz de cine, actriz de televisión, actriz
Altor	1,72 m
Premios	ver Golden Boot Awards ; Premios Bambi ; Estrella del Paséu de la Fama de Hollywood ; Great Immigrants Award (2009) ; Óscar honoríficu (2014) ;
Nominaciones	ver Óscar honoríficu ; (2014);
Xéneru artísticu	western
Instrumentu musical	voz
Creencies
Relixón	catolicismu
Partíu políticu	Partíu Republicanu de los Estaos Xuníos
IMDb	nm0000058

Maureen O'Hara (17 d'agostu de 1920, Ranelagh – 24 d'ochobre de 2015, Boise) foi una actriz de la llamada edá d'Oru del cine clásicu modernu d'Estaos Xuníos d'América, bien reconocida mesmo poles sos actuaciones de muyer fuerte en dellos clásicos de cultu y antoloxía, como pola so llexendaria guapura, y foi conocida na década de 1940 y 1950 como La Reina del Technicolor.

Maureen O'Hara, amás, foi na so mocedá una cantante d'ópera irlandesa.^[12]

Vida temprana

Maureen O'Hara nació como Maureen FitzSimons, y foi la segunda de seis hermanos. La so madre foi Marguerita Lilburn FitzSimons, una cantante d'ópera contraltu, ente que'l so padre, Charles Stewart Parnell FitzSimmons yera un axente de negocios en Dublín y copropietariu d'un equipu de fútbol llamáu The Shamrock Rovers.^[13]

Peggy, la mayor de la familia Fitzsimons, foi una sopranu que darréu tomó los hábitos y profesó como relixosa. Los hermanos menores fueron: Florrie, Charles, Margot y James, casi toos fueron cantantes d'ópera y siguieron depués el camín de la so hermana Maureen, amosando tar igualmente dotaos de bona apariencia, encantu y talentu pa les artes escéniques. Dalgunos d'ellos apaecieron como secundarios nes películes que protagonizó O'Hara.

La pequeña Maureen demostró dende neña tener los dones y talentos pal cantu y la danza, amás yera escelente nos deportes; n'especial nel fútbol, y de fechu casi convenció al so padre de formar una lliga femenina.^[12] Tamién amosaba enforma entusiasmu pola actuación, a pesar de la oposición de los sos padres. A la edá de 14 años, foi aceptada pol prestixosu Abbey Theater (Teatru de l'Abadía), onde estudió arte dramáticu y cantu.

Seya como quiera, la so madre obligóla a estudiar secretariáu contable, oficiu alternativu que nunca llegó a exercer.

Al rematar los estudios, ufiertaron-y el cargu de cantante d'ópera principal nel Abbey Theater, pero ella decidió dir a Londres a intentar una carrera como actriz, asistiendo a una seleición pa la productora de cine inglesa Elstree Studios, qu'a la fin resultó deceicionante pa ella yá que la producción nun se realizó. Sicasí, cautivó al consagráu Charles Laughton (que quedó impresionáu polos güeyos d'O'Hara), que la llamó y convencióla de que fuera actriz.

Vida como actriz

Charles Laughton, xunto col so sociu Eric Pommer, de Mayflower Pictures, llogró convencer a Maureen O'Hara y dio-y un contratu de siete años con Mayflower Pictures col consentimientu del clan familiar Fitzsimons. La so primer interpretación foi pa la película Jamaica Inn (1939), dirixida por un primerizu Alfred Hitchcock. Foi entós cuando Laughton propúnxo-y camudar l'apellíu pol de Maureen O'Hara. Laughton, al ver los resultaos de Jamaica Inn, quedó encantáu porque buscaba una compañera femenina pa un papel qu'él quería realizar nun film clásicu. Pa ello aconceyó col productor inglés George H. Brown y convenciólu pa que-y ufiertara a O'Hara un contratu cola RKO nos Estaos Xuníos. Finalmente, Maureen embarcó nel RMS Queen Mary camín d'América acompañada pola madre.

Como preparación, la RKO asitió a O'Hara en dos películes musicales de baxu presupuestu: Dance, girl, dance y They met in Argentina.

La so siguiente película foi xunto al mesmu Laughton, nel papel de la xitana n'Esmeralda la Zíngara pa la RKO Radio Pictures, película que se llamaría n'América The Hunchback of Notre Dame. El papel de Cuasimodo interpretólu maxistralmente Laughton, mentanto que pa O'Hara significó'l trampolín pa saltar a la fama; a pesar de les crítiques de que nun taba al altor d'una muyer criada nes barriaes, sinón que paecía una muyer rica cayida en desgracia.^[14]

Daquella namái tenía 19 años y treslladóse yá a Hollywood. La so carrera taba llanzada y amosó nes sos actuaciones un temperamentu fuerte y decidíu, con un amiestu de sensatez y tresparencia mui particular. Esta carauterística de la so personalidá irlandesa, sumada a la so notable apariencia, yera una combinación enforma atrayente pal públicu.

Nesi mesmu 1939, Maureen O'Hara conoció a John Wayne nos círculos irlandeses de Hollywood; una anéudota cunta qu'O'Hara tuvo que llevar del brazu a un Wayne chumáu a la so casa, empecipiándose una bona amistá ente dambos artistes.^[15]

En 1941, John Ford escuéyela pal filme How Green Was My Valley, película ganadora de cinco Óscar de l'Academia, anque O'Hara nun taba incluyida na nómina de candidatos acreditaos por motivos tapecíos; pero que la so actuación nun cayó embaxo. Una y bones, la Fox mercó'l contratu de l'artista a la RKO. Maureen O'Hara y Wayne seríen la pareya d'artistes preferida de John Ford.

En 1942, actuó nel filme The Black Swan xunto a Tyrone Power y un emerxente Anthony Quinn y ,siguiendo na llinia de les películes de bucaneros tales como Sinbad the Sailor, xunto a Douglas Fairbanks, Jr., convirtióse nuna reconocida y talentosa actriz.^[12]

Maureen O'Hara nel filme de 1942 *The Black Swan*.

Cuando s'aplicó la teunoloxía del Technicolor nes películes, el públicu apreció la so llexendaria guapura en tola so rellumanza en qu'O'Hara exhibe la so llarga melota colorada, los sos ablucantes güeyos verdes y la so fermosa sorrisa denominándo-yla como la Reina del Technicolor.^[12]^[16]

Actuó en películes d'aventures pa la Twentieth Century-Fox tales como Buffalo Bill en 1944, The Spanish Man en 1945, Los hermanos Barbarroxa en 1951 y The Redhead from Wyoming en 1952, un filme con un guión fechu a la so midida.

En 1946 concédese-y la ciudadanía estauxunidense. Foi la primer muyer irlandesa en llograr la nacionalidá norteamericana.^[17]

En 1952, actuó xunto a Errol Flynn na Isla de los Corsarios, onde tamién actúa con Anthony Quinn.

Trabayó en delles ocasiones pal afamáu direutor y posterior amigu personal John Ford en películes tales como: How Green Was My Valley! resultando una película premiada enforma, Milagru na cai 34 dirixida por George Seaton, L'home tranquilu y Ríu Grande xunto col so amigu incondicional John Wayne col que la so química mutua trespasóse al públicu faciéndolos una pareya de cine bien valorada. A tal puntu esta pareya d'actores taba afitada, que'l públicu daba per sentáu que taben casaos na vida real.

En 1960, protagonizó la película adautada pa TV, Mrs Miniver xunto a Leo Genn. Tres años más tarde protagonizó, xunto a Henry Fonda, Fiebre nel sangre.

Tamién realizó delles interpretaciones musicales en Broadway.

Les sos últimes apaiciones formales fueron a primeros de la década de los 70, cuando decidió dedicase al matrimoniu col so maríu Charles F. Blair Jr. Apaeció nun filme de 1991 llamáu Only the Lonely. O'Hara llogró nominaciones al premiu Laurel na so vida activa y reconocencies yá na so tercer edá pola so trayeutoria.

O'Hara amás actuó en producciones televisives tales como La Caxa de Navidá (1995), Taxi a Canadá (1998) y Last Dance (2001).

En 2004, remató'l so llibru autobiográficu denomináu Ella mesma (This himself), llanzáu en marzu d'esi mesmu añu.

En 2014 recibió un premiu Óscar de l'Academia honoríficu en reconocencia pola so carrera, premiu que-y entregaron Liam Neeson y Clint Eastwood.

Reconocencies y premios

Nominación al premiu Laurel Awards en 1963 pola so actuación na comedia: Mr. Hobbs Takes a Vacation (1962), ocupó'l quintu llugar.

Nomada al premiu Laurel en 1964, ocupando'l llugar 14.

1991 gasayada col premiu Golden Boot Award.

Premiu Seattle Film Critics Awards en 2002.

Premiu IFTA Awards en 2004 pola so trayeutoria.

Reconocencia nel Paséu de la Fama en Hollywood.

Óscar honoríficu en 2014 pola so trayeutoria.

Vida personal

Na película Rio Grande (1950) xunto a John Wayne, gran amigu de tola vida de Maureen O'Hara.

Maureen O'Hara foi amiga íntima y de tola vida de John Wayne y John Ford y tamién de l'actriz Anna Lee. O'Hara siempres tuvo al actor Wayne na so más alta estima, ella opinó:

Wayne foi realmente un verdaderu paisanu...[] daime un home como Wayne.

Maureen O'Hara nuna entrevista de 1950

^[18]

Tuvi'l privilexu de conocer a trés grandes homes na mio vida: Al mio padre, a John Wayne y a Charles Blair

Maureen O'Hara nel Congresu (1979)

.

En 1957, la revista Confidential Magazine publicó que Maureen O'Hara y un amante llatín ficieren l'amor nun teatru y que fueren espulsaos por indecentes. Maureen probó con pasaporte en mano y testigos (ente ellos a Liberace) qu'ella taba n'España na fecha de los supuestos fechos y que too resultó a la fin una farsa montada pola citada revista, Confidential, a la que ganó en xuiciu. Foi la primer actriz en ganar a un tabloide un casu de bilordiu.^[19]

Casóse en trés ocasiones:

Col productor de cine, l'inglés George H. Brown a bordu del Queen Mary cuando tenía 19 años en 1938 y anulóse en 1940 a los 21, esti matrimoniu nunca peracabáu anulóse yá que fízose por obligación y amenaces del productor a bordu del SS Queen Mary.^[20]
Col direutor de cine Will Price, un matrimoniu qu'a la llarga resultó bien desventuráu y que duró dende'l 29 d'avientu de 1941 cuando Price taba sirviendo na Marina, hasta'l 4 d'agostu de 1952, añu en que se divorció convencida pola so familia; Maureen terminó tarreciendo a Price por cuenta de los problemes d'alcoholismu del direutor, que finó en 1962 con tan solo 49 años. Price algamó a dirixir a O´Hara dos vegaes, nes películes Tripoli y Pianole.

Tuvo con Price la so única fía llamada Bronwyn Brigid Price nacida'l 30 de xunu de 1944, qu'heredó los dones artísticos de la so madre (anque non la so guapura) actuando en dellos cameos nos años 60. Amás ye una modista d'alta costura bien reconocida nos ámbitos de Hollywood. Tuvo una fía llamada Connor Beau Fitzsimmons. Bronwyn llanzó una coleición de ropa llamada The Red Collection n'honor a la so madre y amás camudó llegalmente l'apellíu Price paternu al orixinal de la madre.^[21]

En 1962 foi novia ensin da-y publicidá del millonariu mexicanu Enrique Parra (al que conociera en 1952), del que llegó a dicir qu'hasta esi momentu yera'l meyor home que conociera. Nunca llegaron al altar.
En 1968, casó col aviador, pilotu comercial y fundador d'una empresa d'hidroaviones llamada Antilles Air Boats, el xeneral brigadier Charles F. Blair, Jr. hasta la muerte d'esti en 1978 que sería'l gran amor de la so vida y que la fixo retirase del cine pa dedicase dafechu a él y a la empresa de tresporte aereu con hidroaviones ente St. Thomas y St. Croix, nes Antilles.

Al morrer el so maríu, víctima d'un accidente nun Grumann Goose, el 2 de setiembre de 1978, ella quedó d'alministradora (foi, con esti fechu, la primer muyer alministradora d'una llinia aerea nos Estaos Xuníos^[22]) con una flota de 25 hidroaviones que siguió operando hasta la so venta, cola aprobación de los accionistes, en 1982. Más tarde donó un aparatu perteneciente al so difuntu maríu denomináu La Reina de los Cielos al Muséu Foynes Flying Boat del que foi favorecedora.

En 1979, O'Hara solicitó al Congresu emitir una medaya conmemorativa de John Wayne, que finara esi añu, pidimientu que-y foi concedíu.^[23] Maureen O'Hara careció de cáncer en tres oportunidaes, amás de diabetes, enfermedaes que llogró controlar.

Maureen O'Hara realizó 55 películes nos sos 60 años de carrera activa y, yá retirada, pasó a morar en St. Croix nes Islles Vírxenes. Dacuando moraba en Los Ángeles, California ya Irlanda, onde se fixo aficionada al fútbol irlandés. Los sos dos hermanos varones Charles y James, igual que la so hermana Florrie, yá finaren años antes de qu'ella morriera en Boise, Idaho, mientres dormía, na nueche del 24 d'ochobre de 2015 por causes naturales.^[24]

Entemez

Dale, la compañera de siempre de Flash Gordon nel cómic de 1958 ta basada nes facciones de Maureen O'Hara.^[25]
Huw, el rapazu qu'apaez nel filme How Green Was My Valley ye l'actor Roddy McDowall que tenía 12 años cuando interpretó esi destacáu papel xunto a O'Hara. <Mc Dowall ye tamién el qu'interpretó al camareru Acres en L'aventura del Poseidón en 1972 xunto con Gene Hackman, y al chimpancé líder Cornelius na saga Planet of the Apes.