Alfonsu XIII d'España
Alfonsu XIII de Borbón (17 de mayu de 1886, Palaciu Real de Madrid – 28 de febreru de 1941, Roma) foi rei d'España dende'l so nacimietu hasta 1931, añu nel que s'instauró la Segunda República. Foi fíu póstumu d'Alfonsu XII y María Cristina d'Habsburgu-Lorena.
Biografía
[editar | editar la fonte]Foi bautizáu «Alfonso León Fernando María Jaime Isidro Pascual Antonio de Borbón y Habsburgo-Lorena». La so ma exerció la rexencia demientres la so minoría d'edá, ente 1885 y 1902. Al final de la Rexencia y poco enantes d'entamar el so reináu propiamente dichu, España, depués de la intervención de los Estaos Xuníos en 1898 na guerra colonial, perdió les sos últimes posesiones ultramarines en Cuba, Puertu Ricu y Filipines, no que se conoció como'l Desastre del 98.
El 31 de mayu de 1906, casó cola princesa británica Victoria Oxena de Battenberg (1887–1969), fía d'Enrique de Battenberg y la princesa Beatriz del Reinu Xuníu. Victoria Oxena yera sobrina del rei Eduardu VII y nieta de la reina Victoria del Reinu Xuníu.
La crisis de la Restauración
[editar | editar la fonte]
Rexeneracionismu y revisionismu políticu
[editar | editar la fonte]El periodu, qu'entama en 1902, cola xuba al tronu d'Alfonsu XIII, y acábase en 1923, col establecimientu del réxime de Primo de Rivera, llamó l'atención por una permanente crisis política. Estremaos factores despliquen esti allugamientu:
- Intervencionismu políticu d'Alfonsu XIII ensin respetar el papel d'árbitru que teóricamente debía xugar. El so enfotu a les estayes más conservadores del exércitu encumó col enfotu a la dictadura de Primo de Rivera. Elementu clave nel desprestixu de la monarquía.
- Dixebra de los partíos de la "breda", provocada pola desapaición de los cabezaleros históricos y disensiones internes.
- Feblamintu del caciquismu, paralelu al desenrollu urbanu nel país.
- Desenrollu de la oposición política y social al réxime de la Restauración: republicanos, nacionalistes, socialistes y anarquistes.
Asina, dende 1917 asocediéronse los gobiernos de coalición, suxetos a alliancies y cambeos de cutio. Nin lliberales nin conservadores algamaron mayoríes abondes pa encadarmar gabinetes sólidos. Nesti contestu d'inestabilidá política, el país tevo qu'enfrentase a graves problemes sociales:
- Agudización de les lluches sociales. Les posiciones de patrones y trabayadores fueron enfrentandose cada vegada más.
- La "cuestión relixosa" reavivose coles medrantes protestes escontra'l poder de la Ilesia, especialmente na enseñanza. L'anticlericalismu enanchóse per bona parte la población urbana y les clases populares.
- La "cuestión militar" tornó a resurdir ante'l desconciertu d'un exércitu humildáu en 1898 que recibía medrantes crítiques de les estayes opositores (republicanos, socialistes, nacionaliegos).
- Consolidación del movimientu nacionalista en Cataluña y nes País Vascu, ensin nengún calce de negociación per parte los partíos de breda.
- El "problema de Marruecos". Na Conferencia d'Algeciras (1906) alcordóse'l repartu ente Francia y España del territoriu marroquín. A España correspondió-y la estaya norte. De magar 1909 aniciose un enfrentamientu bélicu, la guerra de Marruecos, mui impopular nel país, qu'ensanchó'l fosu que separtaba al Exércitu y el camientu público, esencialmente les clases populares.
En 1905 españó una grave crisis en Cataluña. La vitoria de la Lliga Regionalista de Cambó y Prat de la Riba nes eleiciones llariegues de 1906 alarmó al exércitu que vía en peligru la xunidá del país. Los comentarios satíricos anticastrenses en dalguna publicación barcelonesa, aportaron a que trescientos oficiales asaltaren y prendieren les imprentes. La reaición del gobiernu foi ceder ante l'Exércitu: en 1906 aprobóse la Llei de Xurisdicciones qu'identificaba les crítiques al Exércitu como crítiques a la Patria y pasaben a ser xulgaes pola xurisdición militar. La reaición pública foi de secute. Una nueva coalición, Solidaritat Catalana, algamó una nidia victoria eleutoral en 1907, amenorgado la representación de los conservadores y lliberales en Cataluña. Antonio Maura, cabezaleru del Partíu Conservador, aportó al poder en 1907 con un programa reformista: modificó la llei eleutoral, estableció l'Instituto Nacional de Previsión ya intentó ensin ésitu aprobar una autonomía pa Cataluña. El so proyeutu reformista argayó en 1909.
Les crisis de 1909 y 1917
[editar | editar la fonte]La Selmana Tráxica de Barcelona (1909)
[editar | editar la fonte]Barcelona, coral n'aquella dómina de la industrialización española, viviera dende entamos de sieglu un gran auxe de les movilizaciones obreres qu'encuminare en 1907 cola creación de Solidaritat Obrera, organización anarquista que nació como rempuesta a la burguesa y nacionaliega Solidaritat Catalana. Alejandro Lerroux y el so Partido Republicano Radical tamién desenrollárense na Ciudá Condal con un programa demagóxicu y anticlerical. La Llei de Xurisdiciones de 1906 trexo un refuerzamientu del anticlericalismu y antimilitarismu na ciudá. La política autoritaria del gobiernu de Maura nun arimó a aselar los ánimos. Sicasí, foi la guerra de Marruecos la que determinó l'españíu de la Selmana Tráxica: Los ataques de los habitantes del Rif escontra los trabayadores españoles d'una compañía minera aportó a la movilización de reservistes. Les protestes obreres pronto aprucieron en Barcelona y Madrid. Los primeros choques militares saldáronse col Llaceria del Fortacán del Llobu con más de mil doscientes baxes españolas. El día 26 de xunetu españó la fuelga xeneral en Barcelona, convocada por Solidaridad Obrera y la UGT. Aniciáronse tres díes de protestes, buriaes de conventos, enfrentamientos col exércitu. La Selmana Tráxica tevo un brutal coste humanu: un centenar de muertos, firíos, destruiciones... La refrontada foi muy dura y encumó col xuiciu ensin garantíes y la execución de Francisco Ferrer y Guardia, pedagogu anarquista y fundador de la Escuela Moderna. La Selmana Tráxica llevóse per delantre'l programa reformista de Maura. Mientres el PSOE conseguía que Pablo Iglesias fuera escoyío diputáu en 1910, el lliberal José Canalejas llevó a cabu'l caberu intentu rexeneracionista dientro del sistema de la Restauración. La so aición reformista (serviciu militar obligatoriu en tiempos de guerra, llei del "candáu", Llei de Mancomunidaes que viose finalmente frustrada nel Senáu) finó brutalmente col so asesinatu por un anarquista en 1912. N'alantre, podemos falar d'una crisis permanente de los partíos de la breda. La Primer Guerra Mundial dixebró al país ente aliadófilos (lliberales y izquierda) y xermanófilos (dreches conservadores), pero trexo una estada de prosperidá económica. España, neutral, foi a convertise n'abastidora de munchos productos pa los países contendientes.
La crisis de 1917
El mal repartu social de los beneficios del boom económicu y la medrante inflación llevaron al españíu social y una profunda y enguedeyada crisis en 1917. N'ella podemos distinguir estremaos aspeutos:
- Crisis militar.
El descontentu ente los oficiales "peninsulares" ante los celerinos y, a vegaes inmerecíos, ascensos de los "africanistes" encumó cola creación de les Xuntes de Defensa. El gabinete conservador d'Eduardo Dato abangóse a la imposición de los militares y aceutó unes xuntes que diben escontra la disciplina militar y la subordinación del exércitu al poder civil.
- Crisis parllamentaria.
Setenta diputados y senadores de la Lliga Regionalista, republicanos, socialistes ya inclusive dalgún miembru del partíu lliberal constituyeron en Barcelona una Asamblea Nacional de Parllamentarios que demandó un cambéu de gobiernu y la convocatoria de Cortes Constituyentes.
- Crisis social: la fuelga xeneral de 1917
Convocada n'agostu por CNT y UGT tevo un aducíu siguimientu nes ciudaes y saldose con un centenar de muertos y miles de deteníos. La fuelga xeneral, sicasí, trexo consecuencies de secute. Ante l'amenaza de revolución obrera, les Xuntes de Defensa abandonaron los sos pidimientos y afitaron la refrontada escontra los fuelguistes. Per otru llau, la dimisión d'Eduardo Dato y la formación d'un gobiernu de coalición cola participación de la Lliga Regionalista trexo la inmediata desactivación de l'Asamblea de Parllamentarios. La llucha social de clases tornárase nel gran problema del país.
La crisis social y la llucha de clases en Barcelona
[editar | editar la fonte]El fin de la I Guerra Mundial trexo una profunda crisis económica y social que desencadenó darréu un gran enfrentamientu social en Barcelona (1919-1921); les fuelgues y protestes alentaes polos anarquistes alcontráronse con una dura refrontada del nuevu gobiernu de Maura, que cuntaba col dafechu enfotu de la burguesía catalana. Pa contrarrestar la "aición direuta" de los anarquistes, la estaya más dura de la patronal creó'l nomáu Sindicato Libre, grupu de pistoleros qu'actuó col enfotu policial. L'aplicación de la "Ley de Fugas", pura y simple execución ensin xuiciu de los deteníos exacerbó inda más l'enfrentamientu. La rempuesta anarquista llegó en 1921 col asesinatu d'Eduardo Dato, presidente del gobiernu. Dos años dempués, el cabezaleru anarquista Salvador Seguí morrió asesináu.
Referencies
[editar | editar la fonte]- ↑ 1,0 1,1 «La Ilustración Española y Americana» (castellanu) páxs. 331.
- ↑ Afirmao en: Ficheru d'Autoridaes Virtual Internacional. Identificador VIAF: 120694546. Data de consulta: 4 payares 2018. Editorial: Online Computer Library Center. Llingua de la obra o nome: distintes llingües.
- ↑ Afirmao en: Gemeinsame Normdatei. Data de consulta: 30 avientu 2014. Llingua de la obra o nome: alemán. Autor: Biblioteca Nacional d'Alemaña.
- ↑ Afirmao en: Gemeinsame Normdatei. Data de consulta: 9 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ URL de la referencia: https://www.huffingtonpost.es/entry/quien-esta-enterrado-en-el-panteon-de-los-reyes-de-el-escorial_es_5e316d23c5b693878a896eec. Data de consulta: 23 mayu 2020.
- ↑ Afirmao en: Diccionario biográfico español. Identificador DBE: 6415/alfonso-xiii. Apaez como: Alfonso XIII. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.
- ↑ URL de la referencia: https://www.abc.es/espana/casa-real/abci-no-quiero-derrame-gota-sangre-201602281105_noticia.html. Data de consulta: 23 mayu 2020.
- ↑ Afirmao en: Diccionario biográfico español. Identificador DBE: 6415/alfonso-xiii. Data de consulta: 23 mayu 2020. Editorial: Real Academia de la Historia. Llingua de la obra o nome: castellanu. Data d'espublización: 2011.
- ↑ 9,00 9,01 9,02 9,03 9,04 9,05 9,06 9,07 9,08 9,09 9,10 9,11 Afirmao en: The Peerage. Identificador de persona en The Peerage: p10106.htm#i101056. Data de consulta: 23 mayu 2020. Autor: Darryl Lundy. Llingua de la obra o nome: inglés.
- ↑ 10,0 10,1 Afirmao en: Portal d'Archivos Españoles. Identificador PARES: 46845. Data de consulta: 23 mayu 2020.
- ↑ 11,0 11,1 11,2 11,3 URL de la referencia: https://www.gabinetedeprotocolo.com/que-idiomas-hablan-los-royals/. Data de consulta: 24 mayu 2020.
- ↑ URL de la referencia: https://tufas.palma.cat/system/documents/attachments/000/000/027/original/51ef57c395415b6dc808842654d4327368bbc4c4.pdf. Data de consulta: 20 payares 2020.
- ↑ URL de la referencia: https://www.nationaalarchief.nl/onderzoeken/index/nt00435.
- ↑ URL de la referencia: http://hemerotecadigital.bne.es/issue.vm?id=0001000046&page=2&search=%22Boyac%C3%A1%22++%22Gran+Cruz%22&lang=es.
- ↑ URL de la referencia: http://www.prazskyhradarchiv.cz/archivKPR/upload/8117-rbl.pdf.
- ↑ Afirmao en: nobelprize.org. Identificador de nominación de persona al Premio Nobel: 367. Editorial: Fundación Nobel. Llingua de la obra o nome: inglés.
- ↑ Afirmao en: nobelprize.org. Identificador de nominación de persona al Premio Nobel: 2194. Editorial: Fundación Nobel. Llingua de la obra o nome: inglés.
Enllaces esternos
[editar | editar la fonte]Wikimedia Commons acueye conteníu multimedia sobre Alfonsu XIII d'España.
- Alfonsu XIII d'España na Internet Movie Database (n'inglés)
- Alfonsu XIII d'España en FilmAffinity (castellán)
- «Alfonsu XIII d'España». en Find a Grave. (n'inglés)
| Predecesor: Alfonsu XII |
Rei d'España 1886 - 1931 |
Socesor: Xuan Carlos I |
| Control d'autoridaes |
|
|---|
Datos: Q18363