Edwin Moses

Edwin Moses
Vida
Nacimientu	Dayton, 31 d'agostu de 1955 (69 años)
Nacionalidá	Estaos Xuníos
Estudios
Estudios	Universidad Comunitaria Morehouse (es)
Oficiu
Oficiu	atleta, pilotu de bobsleigh
	Participante Xuegos Olímpicos de Seúl 1988 ; Xuegos Olímpicos de Los Ánxeles 1984 ; Xuegos Olímpicos de Montreal 1976 ;
Pesu	72 kg
Altor	186 cm
	edwinmoses.com

Edwin Corley Moses (31 d'agostu de 1955, Dayton) ye un atleta d'Estaos Xuníos d'América retiráu especialista en 400 metros valles. Foi dos veces campeón olímpicu (en 1976 y 1984) y batió en cuatro causes el récor mundial hasta dexalo en 47,02 en 1983.

Amás de destacar nel deporte yera un gran estudiante. Llogró una beca pa dir al Morehouse College n'Atlanta, onde estudió física ya inxeniería, compaxinándolo coles competiciones atlétiques.

Antes de dedicase de llenu a los 400 m valles, Moses compitió n'otres pruebes, como los 110 m valles o los 400 m llisos. En realidá compitiera bien pocu en carreres sobre 400 m valles enantes de dase a conocer al mundu nos Xuegos Olímpicos de Montreal 1976.

Na ciudá canadiense sorprendió a propios y a estraños, apoderando la final celebrada'l 25 de xunetu de 1976 con una superioridá insultante y batiendo el récor mundial de la distancia, qu'ostentaba'l ugandés John Akii-Bua dende los Xuegos de Múnich 1972. Con un tiempu de 47,64, sacólu más d'un segundu al medayista de plata, el so compatriota Mike Shine (48,69), y cuasi dos segundos al terceru, el soviéticu Gavrilenko (49,45) Foi l'únicu atleta d'Estaos Xuníos que ganó una prueba individual n'atletismu nestos xuegos.

Mientres más de diez años foi'l dominador absolutu d'esta prueba. El 11 de xunu de 1977 batió de nuevu'l so propiu récor mundial en Westwood, California, dexándolo en 47,45.

Poco dempués, el 26 d'agostu, sufrió una derrota nuna competición celebrada en Berlín ante l'alemán Harald Schmidt. A la selmana siguiente tomóse la revancha sobre Schmidt ganándo-y na ciudá de Düsseldorf por una amplia ventaya. Esto foi l'entamu d'una de les raches victorioses más impresionantes na historia del atletismu y del deporte polo xeneral, pos mientres los siguientes 10 años permaneció imbatíu, sumando 122 victories consecutives hasta que foi ganáu'l 4 de xunu de 1987 nel estadiu Vallehermoso de Madrid por Danny Harris.

Moses perdió la oportunidá de ganar la medaya d'oru nos Xuegos Olímpicos de Moscú 1980 pola mor del boicó políticu decidíu pel so país. La suya fuera quiciabes la medaya más segura de los Xuegos, pos por esa dómina la so superioridá sobre'l restu yera apolmonante. El so tercer récor del mundu establecer precisamente en 1980, en Milán, con 47,13.

Moses ganó con facilidá l'oru nos I Campeonatos del Mundu d'Atletismu, celebraos en Ḥélsinki, Finlandia, en 1983. Poco dempués d'esta competición, el 31 d'agostu estableció na ciudá de Koblenz, Alemaña, el so cuartu y definitivu récor del mundu, con 47,02, precisamente nel día del so cumpleaños. Esti récor permanecería vixente hasta que foi batíu pol tamién atleta d'Estaos Xuníos Kevin Young nos Xuegos Olímpicos de Barcelona 1992.

Al añu siguiente nos Xuegos Olímpicos de Los Angeles 1984 ganó'l so segundu títulu de campeón olímpicu, con una discreta marca pa él de 47,75, pero inalcanzable pa los sos adversarios. Danny Harris foi plata (48,13), y Harald Schmidt bronce (48,19).

De los Xuegos de Los Angeles merez destacar tamién que foi'l deportista escoyíu pa emprestar el xuramentu olímpicu na ceremonia inaugural. Fízose popular la so imaxe nuna comprometida situación cuando víctima del nerviosismu nun recordaba les pallabres que tenía de pronunciar, anque finalmente arregló la situación.

Magar la so derrota en Madrid en 4 de xunu de 1987, esi branu siguió siendo'l meyor del mundu y revalidó en Roma el so títulu de campeón del mundu con 47,46

El so últimu añu nes pistes foi 1988. Magar ser un veteranu de 33 años siguía siendo'l favoritu pa ganar l'oru nos Xuegos Olímpicos de Seúl 1988. Sicasí nun pudo aguantar l'emburrie del so compatriota Andre Phillips que fizo la carrera de la so vida y con 47,19 llevóse la medaya d'oru, y tampoco col senegalés Amadou Día Ba, segundu con 47,23. Edwin Moses túvose que conformar cola medaya de bronce (47,56) lo que pa él suponía un fracasu en toa regla. Esto llevólu a poner fin a la so estraordinaria carrera deportiva, na que lo ganó absolutamente tou.

Ganó los 400 m valles en tres ediciones de la Copa del Mundu (1977, 1979 y 1981)

Nel so país foi reconocíu col prestixosu Jesse Owens Award en 1981 y col Sullivan Award en 1983.

Moses tamién s'estremó na llucha contra'l dopaxe nel deporte.

En 1985 foi protagonista d'un desagradable incidente cuando foi deteníu en Los Angeles por solicitar los servicios d'una prostituta que resultó ser una policía tapada.

Dempués de retirase del atletismu probó suerte nel deporte del bobsleigh y en 1990 llegó a ganar una medaya de bronce na Copa del Mundu celebrada en Winterburg, Alemaña, al pie del so compatriota Brian Shimer.

Anguaño vive n'Atlanta.

Referencies

↑ Afirmao en: Enciclopedia Brockhaus. Identificador de Brockhaus Enzyklopädie en línea: moses-edwin. Apaez como: Edwin Moses. Llingua de la obra o nome: alemán.

Enllaces esternos

[4a71dba10d7b9a9b6e8cfd58b83bb78cad0ada99-1] Afirmao en: Enciclopedia Brockhaus. Identificador de Brockhaus Enzyklopädie en línea: moses-edwin. Apaez como: Edwin Moses. Llingua de la obra o nome: alemán.

[1]