Sandra Schmirler
| Sandra Schmirler | |
|---|---|
| Vida | |
| Nacimientu | Biggar, 11 de xunu de 1963[1] |
| Nacionalidá |
|
| Muerte | Regina, 2 de marzu de 2000[1] (36 años) |
| Causa de la muerte | causes naturales |
| Estudios | |
| Estudios | Universidá de Saskatchewan |
| Oficiu | |
| Oficiu | curler |
|
| |
| Pesu | 72 kg |
| Altor | 184 cm |
| Premios | |
Sandra Marie Schmirler (11 de xunu de 1963, Biggar – 2 de marzu de 2000, Regina) foi una xugadora profesional canadiana de curling. Considerada una de les meyores curlers de la hestoria, a lo llargo de la so trayeutoria ganó tres campeonatos mundiales y foi capitana de la seleición de Canadá que llogró la medaya d'oru nos Xuegos Olímpicos de Nagano 1998.[2][3] Amás collaboraba nes retresmisiones de la televisión pública canadiana, onde yera moteyada «Schmirler the Curler». Tres la so prematura muerte foi incluyida nel Salón de la Fama del Deporte Canadianu, y la Federación Mundial de Curling dio-y la so máxima distinción a títulu póstumu.
Biografía
[editar | editar la fonte]Sandra Schmirler nació en Biggar, un pequeñu pueblu de Saskatchewan (Canadá). A lo llargo de la so infancia prauticara dellos deportes, hasta que nel institutu decidióse pol curling. Dempués de graduase pola Universidá de Saskatchewan, mudóse a Regina y compaxinó'l so desempeñu atléticu con un emplegu nel Centru d'Ociu North West.[4]
En 1987 llogró'l so primer campeonatu provincial y pudo debutar a nivel nacional. Al otru añu conoció a quien sería la so principal aliada sobre'l xelu, la llanzadora Jan Betker, y de magar 1990 convirtióse na capitana (skipper) de la seleición de Saskatchewan a la cual xuniéronse Joan McCusker y Marcia Gudereit. L'equipu Schmirler ganó tres campeonatos nacionales (1993, 1994 y 1997) y en representación de Canadá llogró dos Campeonatos Mundiales de Curling en modalidá femenina.
El curling nun foi aceptáu nel programa olímpicu hasta los XX.OO. de Nagano 1998, polo que l'equipu representante de Canadá saldría d'un tornéu celebráu en payares de 1997. Les curlers de Saskatchewan ganaron na final por 9:6 al equipu d'Alberta, lideráu por Shannon Kleibrink, con un llanzamientu de Schmirler nel que fizo una carambola pa mover la piedra rival del centru de la diana ensin tocar dos sos que taben alredor. Yá na cita olímpica, la selección de Canadá ganó la medaya d'oru na prórroga frente a Dinamarca. En tornando al so llar Schmirler siguió compitiendo nos torneos nacionales, y cuando quedaba esaniciada exercía como comentarista pa la televisión pública CBC/Radio-Canada.
Nel planu personal, Schmirler tuvo casada con Shannon England y tuvo dos fíos. Los sos herederos crearon en 2001 la Fundación Sandra Schmirler pal cuidu de naciellos.
Enfermedá y muerte
[editar | editar la fonte]Dempués de dar a lluz a la so segunda fía nun partu complicáu, n'agostu de 1999 los médicos detectáron-y un tumor malinu detrás del corazón. La deportista tuvo a puntu de morrer na sala d'operaciones cuando trataben de extirpárselo, siendo necesaria la reanimación cardiopulmonar. Y dempués de meses de recuperación y sesiones de quimioterapia, Schmirler dio una rueda de prensa en xineru del 2000 pa esplicar la so llucha contra la enfermedá. Cuando los médicos detectáron-y metástasis nos pulmones, arrenunció a la quimioterapia y caltuvo una terapia ortomolecular.[5]
Schmirler finó'l 2 de marzu del 2000 na unidá de cuidaos paliativos del hospital de Regina, a los 36 años. La so muerte causó conmoción tantu en Saskatchewan como nel restu de Canadá, y el funeral aportó a retresmitíu en direutu pola CBC. El gobiernu de la provincia concedería-y la Orde al Méritu a títulu póstumu. Nueve años dempués del óbito, la so familia recoyó la máxima distinción dada pola Federación Mundial de Curling.
Referencies
[editar | editar la fonte]- ↑ 1,0 1,1 Afirmao en: Find a Grave. Identificador Find a Grave: 11859461. Apaez como: Sandra Schmirler. Data de consulta: 9 ochobre 2017. Llingua de la obra o nome: inglés.
- ↑ «Olympic anniversary: "Schmirler the Curler" wins gold in curling’s Olympic return» Archiváu 2018-02-15 en Wayback Machine. NBC Olympics (en inglés). Consultáu'l 15 de febreru de 2018. (n'inglés) Olympic anniversary: "Schmirler the Curler" wins gold in curling’s Olympic return. Archivado del original el 2018-02-15. https://web.archive.org/web/20180215204656/https://www.nbcolympics.com/news/olympic-anniversary-schmirler-curler-wins-gold-curlings-olympic-return. Consultáu'l 15 de febreru de 2018.
- ↑ McElroy, Kathleen (4 de marzu de 2000) (n'inglés). Sandra Schmirler, 36, Dies; Olympic Curling Champion. ISSN 0362-4331. https://www.nytimes.com/2000/03/04/sports/sandra-schmirler-36-dies-olympic-curling-champion.html. Consultáu'l 12 de febreru de 2018.
- ↑ «Sandra Schmirler: Larger than life». Consultáu'l 15 de febreru de 2018.
- ↑ «Joan McCusker». The Globe and Mail. Consultáu'l 15 de febreru de 2018. Joan McCusker. https://www.theglobeandmail.com/sports/joan-mccusker/article1199557/. Consultáu'l 15 de febreru de 2018.
Enllaces esternos
[editar | editar la fonte]- «Sandra Schmirler». en Find a Grave. (n'inglés)
Datos: Q444980