طابلو دوري

لجدول دّوري ؤلا طّابلو دّوري ديال لعناصر لكيماوية هوّا طريقة ديال تمتيل لعناصر لكيماوية على شكل جدول ب ليعتيماد علا نّمرة دّرية، تّوزيع ديال ليليكترونات، ؤ لخاصيات لكيماوية ديال لعنصر. طّابلو دّوري كيتخدّم بزاف ف شّيمي ؤ لفيزيك، ؤ عولوم خرة، ؤ كيتّعتابر من بين أشهر رّموز ديال شّيمي. طّابلو مقسوم ل ربعة د لبلوكات لي عندهوم شكل موستاطيلي تقريبان. سّطورا ديال طّابلو كيتسماو پيريودات ؤلا دورات، ؤ لكولونات كيتسماو ݣروپات ؤلا مجموعات. لعناصر لي من نفس لݣروپ كيكونو عندهوم خاصيات كيماوية متشابهين.

تصويرة ب تلاتة د لأبعاد ديال لوربيطالات دّرية ديال درة بحال لهيدروجين

أول طابلو دوري ولّا مقبول بشكل عام ف لمجتمع لعيلمي كان ديال دميتري مينديلييڤ ف 1869.^[1] حيت بزاف د لعناصر لكيماوية ماكانوش معروفين ديك سّاع، مينديلييڤ ستعمل طّابلو باش يتوقّع لخاصيات ديال لعناصر لي ناقصين. طّابلو دّوري كيتّعتابر من لكتيشافات لأساسية ديال لقرن 19، ؤ تّفسير ديالو غادي يبان معا تّطور ديال ميكانيك د لكوانطا ف لبدية د لقرن 20. طّابلو دّوري باقي كيتطور معا تّطور د صّيونص، حيت عناصر جديدة غادين ؤ كيتّكتاشفو ف لّابو. ف طّبيعة كانلقاو غير 94 عنصر لي كيبانو تلقائيان ب فيعل تّفاعلات نّووية ف نّجوم ب لإضافة ل لهيدروجين لي هوّا أبسط عنصر ؤ أول واحد بان ف لكون. ولاكين لعولاما قدرو يصاوبو عناصر جداد لي ماكيبانوش بشكل طابيعي ف لكون، واصلين دابا حتال لعنصر لي عندو نّمرة دّرية 118 (ؤݣانيصون). ماشي معروف تالاين هاد لپروصي يقدر يستامر، ؤ لخاصيات ديال بعض لعناصر صّطيناعية باقين مامعروفينش مزيان.^[1]