الصليبيين
الصليبيين ، حركه و جيوش اوروبيه مسيحيه لاتينيه ( كاتوليكيه ) هاجمت الشرق الأوسط من اواخر القرن الحداشر لغاية حوالى القرن الستاشر. اسس الحركه اوربان التانى بابا الكاتوليك اللاتين سنة 1095 و روج ليها قسسه و رهبان كاتوليك زى بيير الناسك ( بطرس الناسك ) بحجة تحرير الأراضى المقدسه فى فلسطين من المسلمين و محاربة العلمانيين و الخارجين عن الكنيسه اللاتينيه فى اوروبا.
الصليبيين كانو لاتين تابعين للكنيسه الكاتوليكيه فى غرب اوروبا فى فترة العصور الوسطى بس ، و ما لهمش علاقه بالمسيحيين البيزنطيين ( اليونانيين ) او الشرقيين فى مصر و الشام و غيرهم اللى كان الصليبيين بيعتبروهم هما والعلمانيين الاوروبيين من ضمن اعدائهم.
الحركه الصليبيه كانت مزيج من الهوس الدينى و الخرافات الممزوجه بمطامع دنيويه و سياسيه.
فى الاصل ما كانش اسمهم صليبيين لكن فى العاده كانو بيتسمو حجاج. فى فترات لاحقه اتسمو صليبيين لإنهم كانو بيشيلو صلبان و بيحطو بادجات الصليب على هدومهم بعد تأدية قسم فى الكنايس كان اسمه " أخد الصليب ". باباوات الكنيسه الكاتوليكيه وعدوا المشاركين فى الحروب الصليبيه بالغفران وفى فتره معينه مع انتشار الفساد بقت بتتباع صكوك اسمها " صكوك الغفران ".
فى الشرق اتسمو " فرنج " او " فرنجه " من ناحيه لإن معظم الحملات الصليبيه كان بيطغى عليها الطابع الفرنساوى و من ناحيه تانيه لتميزهم عن المسيحيين الشرقيين اللى ما كانش ليهم دخل فى الموضوع و عانو مع المسلمين هما و اليهود.
من اشهر فرقهم فرسان المعبد و الاسبتاريه و التيوتون الألمان .
اول ضحايا الصليبيين كانو يهود اوروبا اللى هاجم الصليبيين مجتمعاتهم فى فرنسا و المانيا و غيرها قبل ما يروحو الشرق و خيروهم بين القتل او إعتناق المسيحيه و اتقتلت منهم اعداد كبيره اكمنهم رفضو و فضلو الموت عن انهم يبقو مسيحيين. المدابح الفظيعه دى اتسمت الهولوكوست الأولانى و " مدابح اليهود فى الراين ". فى العاده اليهود كانو بيتعرضو لمدابح فى اوروبا على ايد المسيحيين قبل كل حمله صليبيه. مدبحة يورك اللى اتعملت فى 6 يوليه سنة 1189 بعد تتويج ريتشارد قلب الأسد ملك على انجلترا بتعتبر من المدابح المشهوره.
الحروب الصليبيه ماكانتش ضد المسلمين بس لكن كانت كمان ضد المعاديين للكنيسه الكاتوليكيه فى اوروبا اللى سمتهم الكنيسه الكاتوليكيه " مهرطقين ". حروب حركة الاسترداد فى ايبيريا بتعتبر كمان ضمن الحروب الصليبيه و اللى كانو بيشاركو فيها كان البابا بيديهم نفس ميزات الصليبيين اللى بيحاربوا فى الشرق.
اشتهر الصليبيين بالقسوه و العنف المخلوطين بالطمع المادى و الهوس الدينى و اتسببو فى مآسى كتيره و فى قتل حوالى 6 مليون شخص فى الحروب و الحملات اللى شنوها بإسم المسيح و الدين المسيحى و ده رقم ضخم جداً لإن الحروب دى كانت بتتحارب بمجرد سيوف و نبال.
انتهت حروبهم على الشرق بهزيمتهم على ايد مصر اللى اتحملت بجيوشها و اقتصادها العبء الاكبر و اتعرضت لحملتين ضخمين ، الحمله الصليبيه الخامسه و الحمله الصليبيه السابعه ، لكن كلفو الامبراطوريه البيزنطيه و مصر الكتير و اتسببو فى رده حضاريه و ثقافيه كبيره اذا اتاخد فى الإعتبار ان مصر كانت متقدمه ثقافى و عمرانى عن اوروبا لما ابتدت الحروب الصليبيه و لحد فى عصر نهضتها. و بالنسبه للبيزنطيين هاجم الصليبيين اراضيهم و استولوا عليها فى الحمله الصليبيه الرابعه و اسسوا الامبراطوريه اللاتينيه فى قسطنطينيه و اضعفوها لغاية ما الأتراك استولوا عليها.
مصادر
- (انا كومنينا) Anna Komnene, The Alexiad, Penguins Books 2003
- (ستيفين رونسيمان)Runciman, Steven, A history of the Crusades (3 parts). Penguin Books, 1987
- Solmon ben Simson, The Slaughter of the Jews, in The First Crusae, Edited by E.Peters,University of Pennsylvania Press, USA 1998