Joseff I, Ymerawdwr Glân Rhufeinig

Joseff I, Ymerawdwr Glân Rhufeinig
Ganwyd	26 Gorffennaf 1678  Fienna
Bedyddiwyd	27 Gorffennaf 1678
Bu farw	17 Ebrill 1711  Fienna
Dinasyddiaeth	y Frenhiniaeth Hapsbwrgaidd
Galwedigaeth	cyfansoddwr, teyrn
Swydd	Ymerawdwr Glân Rhufeinig, Prince-Elector, brenin Bohemia, brenin Hwngari
Tad	Leopold I
Mam	Eleonor Magdalene o Neuburg
Priod	Wilhelmine Amalia o Brunswick-Lüneburg
Plant	Maria Josepha o Awstria, Archduke Leopold Joseph of Austria, Maria Amalia o Awstria
Llinach	Habsburg
Gwobr/au	Marchog Urdd y Cnu Aur, Urdd y Cnu Aur
llofnod

Uchelwr o Dŷ Hapsbwrg oedd Joseff I (26 Gorffennaf 1678 – 17 Ebrill 1711) a fu'n Ymerawdwr Glân Rhufeinig o 1705 i 1711.

Ganed yn Fienna, yn fab hynaf i'r Ymerawdwr Leopold I. Coronwyd Joseff yn Frenin Hwngari yn 1687 ac yn Frenin y Rhufeiniaid yn 1690. Yn ystod Rhyfel Olyniaeth Sbaen (1701–14) cefnogodd Joseff hawl ei frawd iau, Siarl, i goron Sbaen, mewn ymgais i'w chadw dan reolaeth y Hapsbwrgiaid. Bu farw yr Ymerawdwr Leopold yn 1705, a fe'i olynwyd gan Joseff. Aeth ati i ad-drefnu cyllid y Frenhiniaeth Hapsbwrgaidd ac i wladoli banc Fienna. Enillodd lluoedd Awstria sawl buddugoliaeth, dan arweiniad Eugene, Tywysog Safwy, yn yr Eidal, yr Almaen, a'r Iseldiroedd, ond ni chafodd gwrthryfel Ferenc II Rákóczi yn Hwngari ei ostegu nes ar ôl marwolaeth Joseff. Yn 1707, bu ar fin brwydro'n erbyn Sweden wedi i luoedd y Brenin Siarl XII heidio i dir Awstria yn ystod y rhyfel yn erbyn Frederick Augustus I, Etholydd Sachsen. Bu ymgecru rhwng Joseff a'r Babaeth ar ei anterth yn 1708 pan cydnabuwyd Philip V yn frenin Sbaen gan y Pab Clement XI. Ymosododd lluoedd Awstria ar diroedd y Babaeth nes i'r Pab ail-ymuno ag achos y Hapsbwrgiaid yn 1709. Bu farw Joseff yn Fienna o'r frech wen yn 32 oed, a fe'i olynwyd yn Ymerawdwr Glân Rhufeinig gan ei frawd Siarl VI.