The Mist
|
C'l artìcul chè 'l è scrit in
Miranduléś |
Chris Owen in na figùra dal film | ||
| Al fumanèṅ 2007 | ||
|---|---|---|
| Regìa: Frank Darabont | ||
| Scritōr: Stephen King • Frank Darabont | ||
| Atōr: Thomas Jane • Laurie Holden • Andre Braugher Marcia Gay Harden • Toby Jones • William Sadler Jeffrey DeMunn • Frances Sternhagen • Chris Owen | ||
| Müsica: Mark Isham | ||
| Léngua: Ingléś | ||
| Dürä dal film: 126 minüt | ||
| Nasiōṅ: Stat Unî | ||
The Mist (Al fumanèṅ) 'l è 'n film ad scarésa dal 2007 ad Frank Darabont trat da 'l racònt „La fumàna“ ch'al s cata in dla racòlta “Schéltar” ad Stephen King.
Al film, girâ in Luiśiàna, 'l è custâ daśdòt migliòṅ ad dòlar ma al 'n à fat sù da piò ad sinquànta-sèt.
Sunt
A séguit dna nòt ad timpèsta, ch'l'iva tirâ śò soquànt àrbui faghénd di dan a la sò cà, al pitōr ad manifèst p'r al cìnema David Drayton (Thomas Jane), insém a sò fiōl pìcul Billy (Nathan Gamble) e a 'l sò vśèṅ 'd cà Brent Norton (Andre Braugher), ch'al s quistiòna da spés sèg, al decìd 'd andàr in dal supermarcâ dal paéś „La cà dal magnàr“ par cumpràr di quèi par giustàr la fnèstra. Lung la strada 'l óm 'l incróśa dimóndi mèś militàr dirèt a la sò baś darènt a 'n lâg in du di siensiâ federài i pòrt'n avànti un prugèt misterióś ciamâ Arrowhead.
Rivâ in negòsi, David al salùta subìt la caséra Sally (Alexa Davalos), ch'l'iva fat da babysitter na quàlc vòlta a 'l sò putèṅ, ma pò a 'l impruvìś a riva dèntar sigànd 'n óm ch'al dmanda ajùt, Dan Miller (Jeffrey DeMunn). Chi lò al cònta ch'in mèś a la fumàna fisa, ch'l'è drē a 'lvàr-as, a gh'è un quèl ad periculóś parchè 'l à vdû dla gint sparìr-ag dèntar. Quànd di tentàcui magna-carna d'n insèt gigànt al traśa via al śōvan Norm (Chris Owen), al grup al capìs 'd ès'r in di guàj grôs.
La sgnōra Carmody (Marcia Gay Harden), na dóna dimóndi religióśa ma anc ciucàda in dla suca, la diś ch'l'è la fiṅ dal mónd e la s mét a far di predicòs a tut, litgànd-as cun l'insgnànta Amanda Dumfries (Laurie Holden). Par difénd'r al supermarcâ, al vice-diretōr Ollie Weeks (Toby Jones) al tira fóra na pistòla che però la n è minga abàsta cóntar gl'insèt ch'i s insfìlsan dènt'r ad nòt śbuśénd i vēdar dla vadrìna.