Josefina Salgado
| Biografía | |
|---|---|
| Nacemento | 16 de marzo de 1946 Ourense, España |
| Morte | 4 de xuño de 1989 Madrid, España |
| Altura | 1,66 m |
| Peso | 57 kg |
| Actividade | |
| Ocupación | atleta |
| Nacionalidade deportiva | España |
| Deporte | atletismo |
| Disciplina deportiva | 400 metros lisos |
Josefina Salgado, nada en Ourense o 16 de marzo de 1946 e finada en Madrid o 4 de xuño de 1989, foi unha atleta galega especializada en carreiras de velocidade e salto de lonxitude. Foi a primeira muller española que participou nun Campionato de Europa de Atletismo, ademais de ser catorce veces campioa de España e bater vinte e nove récords de España.
Traxectoria
[editar | editar a fonte]Naceu en Ourense o 16 de marzo de 1946, a máis vella de tres irmáns. Comezou a practicar o atletismo en 1965, seguindo a súa irmá máis nova, Aurora, quen tamén acabou logrando medallas nacionais. A finais dese ano xa conseguira entrar na clasificación nacional de salto de lonxitude e 800 metros.[1]
En 1966 obtivo o seu primeiro título de campioa de España, nos 400 metros, proba que foi a súa preferida.
En xullo de 1967 bateu por primeira vez o récord de España nesa distancia cunha marca de 59.1, fronte aos 59.7 que tiña María José Álvarez. Unha semana despois debutou como internacional nun encontro contra Bélxica, volvendo bater o récord de España (58.5). A finais dese ano a RFEA ofreceulle adestrar con José Manuel Ballesteros, polo que se trasladou a vivir a Madrid, cidade en que residiu até a súa morte.[1] Ademais dos 400, Salgado competía con éxito nos 800 metros, dos que tamén bateu o récord de España en 1968 (2:12.9).
En 1970, tras un período de certo estancamento, deixou a Ballesteros e comezou a adestrar con Manuel Pascua. Isto levouna a preparar tamén os 200 metros, distancia en que tamén se converteu na mellor atleta de España.
En 1971 acudiu ao Campionato de Europa, converténdose na primeira muller española que participaba nel.[2] Salgado acabou última da súa serie cunha marca de 56.3. Non obstante, en outubro do mesmo ano conseguiu a medalla de bronce nos Xogos Mediterráneos.
En 1973 bateu por novena e última vez o récord de España dos 400 m, deixándoo en 54.1, 5.6 segundos por baixo de onde estaba cando o conseguiu por primeira vez. Tamén bateu o dos 200 metros (24.6) e o de 400 metros valados (1:04.7), distancia que non adoitaba disputarse en categoría feminina. Ese ano foi a única muller española no Campionato de Europa en pista cuberta. Acabou terceira da súa serie cunha marca de 56.04.[1]
En 1974 participou por última vez no campionato de España, gañando o ouro en 200 m e en salto de lonxitude. A partir de entón, debido ás súas obrigas laborais e aos seus enfrontamentos coa federación, a súa carreira deportiva entrou en declive e retirouse pouco despois.[1]
Josefina Salgado morreu o 4 de xuño de 1989, vítima dun cancro de mama.[3] Trala súa morte púxose o seu nome ás pistas de atletismo de Monterrei (O Pereiro de Aguiar)[4] e en 2014 a Xunta de Galicia outorgoulle a distinción ao Mérito Deportivo, a título póstumo.[1]
Competicións
[editar | editar a fonte]Internacionais
[editar | editar a fonte]| Ano | Competición | Sede | Posto | Proba | Marca |
|---|---|---|---|---|---|
| 1971 | Campionato Europeo | Helsinqui | 27ª (s..) | 400 m | 56.27 |
| Xogos Mediterráneos | Esmirna | 400 m | 56.0 | ||
| 1973 | Campionato de Europa de Atletismo | Rotterdam | 13ª (s..) | 400 m | 56.04 |
Campionatos de España
[editar | editar a fonte]Josefina Salgado foi doce veces campioa de España ao aire libre e dúas en pista cuberta:
Ao aire libre
[editar | editar a fonte]- 200 metros: 1970, 1971, 1974
- 400 metros: 1966, 1967, 1968, 1970, 1971, 1973
- 800 metros: 1967, 1973
- Salto de lonxitude: 1974
En pista cuberta
[editar | editar a fonte]- 400 metros: 1968
- 800 metros: 1973
Marcas persoais
[editar | editar a fonte]| Proba | Marca | Lugar | Data |
|---|---|---|---|
| 100 metros | 12.3 | Madrid | 29 de xuño de 1971 |
| 200 metros | 24.6 | Madrid | 24 de xuño de 1973 |
| 400 metros | 54.1 | Barcelona | 15 de xullo de 1973 |
| 800 metros | 2:09.96 | Londres | 5 de agosto de 1972 |
| Salto de lonxitude | 5.81 | Madrid | 13 de xuño de 1973 |
Récords
[editar | editar a fonte]Josefina Salgado conseguiu bater o récord de España de diversas probas atléticas en polo menos vinte e nove ocasións.[5] Entre elas, as seguintes:
Ao aire libre
[editar | editar a fonte]- 200 metros: 24.6 (1973)
- 400 metros: Nove veces, até 54.1 (1973), dúas máis con cronometraxe eléctrica
- 800 metros: 2:12.9 (1968)
- 400 metros valados: 1:04.7 (1973)
- 4×400 metros: Cinco veces, até 3:43.2 (1973)
En pista cuberta
[editar | editar a fonte]- 400 metros: Cinco veces, até 55.9 (1973), unha máis con cronometraxe eléctrica (56.04, tamén en 1973)
Notas
[editar | editar a fonte]- ↑ Barberarena, Chema (19 de xuño de 2018). "Los mejores momentos de España en los Campeonatos de Europa (IV): Las primeras participaciones españolas. Quienes lo cambiaron todo". RFEA. Arquivado dende o orixinal o 16 de xullo de 2020. Consultado o 16 de xullo de 2020.
- ↑ "La céltica Loli Garcia, primera campeona española de 800 m. en pista cubierta, en 1968 : “Me acuerdo como si fuera hoy”, nos dice". Celta Atletismo. Consultado o 16 de xullo de 2020.
- ↑ Pista de Atletismo Josefina Salgado – O Pereiro de Aguiar
- ↑ Ten algunhas marcas mellores que o récord vixente nese momento, mais non constan como récord de España e ignórase o motivo.
Véxase tamén
[editar | editar a fonte]| A Galipedia ten un portal sobre: Ourense |
Ligazóns externas
[editar | editar a fonte]- Ficha de Josefina Salgado Arquivado 17 de maio de 2021 en Wayback Machine. na RFEA.
- Vida Atlética de Galicia
- Josefina Salgado, la atleta versátil