შპს „საქნახშირის“ და შპს „ჭიათურ მანგანეზის“ გენერალური დირექტორის მიხეილ სოცკის საქმიანი შეხვედრა ფაკულტეტის ადმინისტრაციასთან

საქართველოს ტექნიკური უნივერსიტეტის სამთო-გეოლოგიური და მთის მდგრადი განვითარების ფაკულტეტის ხელმძღვანელი, პროფესორი  ნოე ხოზრევანიძე  შპს „საქნახშირის“ და შპს „ჭიათურ მანგანეზის“ გენერალურ დირექტორს  მიხეილ სოცკის შეხვდა.  შეხვედრა  ორმხრივი თანამშრომლობის მემორანდუმის შემუშავებისა და შემდგომი თანამშრომლობის მომზადების ფარგლებში  ჩატარდა.
 
საქმიან შეხვედრას  ფაკულტეტის პროფესორები: გელა მაჩაიძე და შალვა კელაპტრიშვილი, ასევე, ფაკულტეტის დეკანის მოადგილე საერთაშორისო ურთიერთობებისა და მეცნიერების საკითხებში, ნინო მაისურაძე ესწრებოდნენ. 

მხარეებმა  უნივერსიტეტისა და სამრეწველო სექტორის, როგორც დამსაქმებლის, თანამშრომლობის განვითარების სტრატეგიული მიმართულებები განიხილეს, მათ შორის სტუდენტთა პრაქტიკული გამოცდილების გაღრმავება, ერთობლივი კვლევითი პროექტების განხორციელება და სამთო-მეტალურგიული სექტორის საჭიროებებზე მორგებული პროფესიული კადრების მომზადება.

მიხეილ სოცკიმ ფაკულტეტის ინფრასტრუქტურა დაათვლიერა, ასევე, მინერალოგიის, პალეონტოლოგიისა და სასარგებლო წიაღისეულის მუზეუმები, გაეცნო თანამედროვე ლაბორატორიულ ბაზას და ისაუბრა სამთო-მრეწველობის განვითარებისთვის უნივერსიტეტთან პარტნიორობის სასიცოცხლო მნიშვნელობაზე. 

შეხვედრის დასასრულს მონაწილეებმა აღნიშნეს, რომ ასეთი თანამშრომლობა ხელს შეუწყობს როგორც მთის მდგრადი განვითარების, ასევე, თანამედროვე ტექნოლოგიური ინოვაციების ხელშეწყობას რეგიონულ და ეროვნულ დონეზე.

მხარეები შეთანხმდენენ, რომ 2025 წლის 15 დეკემბრამდე შემუშავდება მომავალი სამუშაოთა თანმიმდევრული გეგმა, სადაც დეტალურად განისაზღვრება პროფესიულ სპეციალისტთა მომზადების მექანიზმები, კვლევითი მიმართულებები და ინფრასტრუქტურის გაუმჯობესების პრიორიტეტული მიმართულებები.

შეხვედრა კონსტრუქციულ და პარტნიორულ ატმოსფეროში გაიმართა, რაც მნიშვნელოვანია  უნივერსიტეტსა და ინდუსტრიულ კომპანიებს შორის გრძელვადიანი და შედეგზე ორიენტირებული მდგრადი თანამშრომლობის განვითარებაზე.