Kontrato pri Libera Komerco di Nord-Amerika
La Kontrato pri libera Komerco di Nord-Amerika (en Angliana North American Free Trade Agreement - NAFTA; en Hispaniana Tratado de Libre Comercio de América del Norte - TLCAN o TLC; en Franciana Accord de libre-échange nord-américain - ALÉNA) esas kontrato signatita da guverni di Usa, Kanada e Mexikia por krear komercala uniono en Nord-Amerika. Ol sucedis pakto inter Kanada ek Usa por libera komerco inter la du landi.
La kontrato signatesis en l'urbo di San Antonio, Texas en 17 di decembro 1992 da Usana prezidanto George H. W. Bush, Kanadana chefministro Brian Mulroney e Mexikiana prezidanto Carlos Salinas de Gortari, por funcionar pos 1 di januaro 1994. La kontrato pri libera komerco kreis komercal uniono kun plu kam 21 milioni km² di surfaco, e plu kam 450 milioni habitanti en 2010. En 2009 lua TNP esis $ 16 792 miliardi.
La skopo di NAFTA/TLC/ALÉNA esis eliminar barili por komerco e kolokado inter la 3 landi. Kande ol efikeskis ye la 1ma di januaro 1994, dogano-taxi desaparis en duima di Mexikiana produkti exportacita ad Usa, ed en 1/3 di Usana produkti exportacita a Mexikia. Pos 10 yari, tota dogano-taxi inter la 3 membri mustus eliminesar, ecepte por kelka agrokultivala produkti, qui demandis 15 yari por eliminar tote lua barili.
L'oficala lingui por publikigar la dokumenti pri la kontrato esas 3: Angliana, Hispaniana e Franciana.