Musiyum Tani Jawa Indonésia
Koordhinat: 7°55′28″S 110°22′17″E / 7.9244744°S 110.3714677°E
Musiyum Tani Jawa utawi Musiyum Tani Jawa Indonésia punika satunggaling musiyum ingkang mapan wonten ing kampung wisata Candran, Désa Kebon Agung, Imagiri, Bantul, Yogyakarta [1][2]. Musiyum punika jumeneng ing tanggal 27 Mèi 2007, ,mliginipun sasampunipun wonten bencana lindhu ageng wonten ing kutha Jogja. Musiyum Tani Jawa punika dipunyasa awit saking inisiatif warga Désa Kebon Agung piyambak ing lemah kagunganipun Ki Candra inggih punika sesepuh ingkang dados wiwitaning nama désa Candran punika.
Wontenipun musiyum punika gadhah ancas supados para génerasi enèm saged marisi budaya tetanen saéngga saged ngregani perjuanganipun para wong tani anggènipun tetanen. Kajawi punika musiyum punika sampun kagabung dhateng organisasi musiyum-musiyum Indonésia inggih punika BARASMUS (Badan Musyawarah Museum) lan anggènipun nglampahi fungsinipun musiyum punika dipunawasi déning departemen saking pamaréntah kados Dinas Pariwisata, Dinas Pendidikan, lan Dinas Kebudayaan [2].
Kolèksi
[besut | besut sumber]Ing Musiyum Tani Jawa Indonésia punika dipunpajang sadaya pirantos tetanan ingkang tradhisional ugi ingkang modhèren. Kajawi punika wonten ugi budi daya tuwuhan tetanen kanthi tradhisional saha kanthi cara modhèren. Ing musiyum punika nyuguhaken wahana kanggé para wisatawan supados ngraosaken lan mangertos sarta saged marisi aji perjuangan, budaya, lan tradisi tetanen kanthi maringi informasi lan praktek langsung [3].
Kolèksi ing musiyum punika ing antawisipun pirantos tetanèn para wong tani kala rumiyin nalika jaman Mataram kuna, saking kayu, watu, lan wesi. Kolèksi mau inggih punika luku, garu, grobak, pacul, keranjang, lesung, lumping, arit, ani-ani, caping, wajan, lan genthong [3].
Kajawi kolèksi pirantos tetanèn ugi wonten pirantos kanggé masak kanthi tradhisional kados ta anglo, pipisan, talenan, ungkal, gancu, munthu, cething, kukusan, wajan, parangon, lan kendhil. Wonten ugi pirantos ingkang taksih wonten gegayutanipun kaliyan tetanèn inggih punika lesung minangka pirantos kanggé numbuk pari, égrang, lan nini thowong. Sedaya koleksi ing Musiyum Tani Jawa Indonésia punika kirang langkung sampun dumugi 260 kolèksi. Barang-barang kolèksi musiyum punika gadhah yuswa rata-rata 50 taun lan pikantuk saking warganipun piyambak sarta warisan leluhur. Wonten ugi ingkang asalipun saking njawi kabupatèn Bantul.
Cathetan suku
[besut | besut sumber]- ↑ [1], Museum Tani Jawa (dipun-akses tanggal 01 Januari 2013)
- ↑ a b [2][pranala mati permanèn], Museum Tani Jawa Indonésia (dipun-akses tanggal 01 Januari 2013)
- ↑ a b [3][pranala mati permanèn], Museum Tani (dipun-akses tanggal 01 Januari 2013)