Mons Popularis

Urales Cispolares; montem Popularem sagitta indicat

Mons Popularis^[1] (Russice Narodnaia, in lingua Komiensi Naroda Iz, i.e. Mons Narodae fluminis, in lingua Mansiensi Poang Ur, i.e. Mons Caput, Mons Cacumen) est mons Russiae, iugi principalis Uralium Cispolarium pars. In divortio aquarum systematum Petschorae et Obii, in confinio Europae et Asiae et in confinio rei publicae Komiensis et districtus autonomi Chanty-Mansiensis et in saepto nationali Iugyd Va (quod est pars Silvarum intactarum Komiensium) situs est.

Mons altitidinis 1895 m est montium Uralium omnium et Russiae Europaeae omnis praeter Caucasum altissimus. Quartzitibus proterozoicis et Cambricis necnon saxis metamorphicis compositus est. Taiga laricina et betulina decliviorum partem humiliorem montis Popularis operit; altius sola tundra montana et desertum Arcticum est. Naroda fluvius systematis Sosvae Septentrionalis de monte Populari ad orientem fluit et Kos'iu Ussae accola ad occidentem. Saranpaul vicus Mansiensis locus habitatus monti Populari proximus est.

Exploratio et nomina

Anno 1846 ab Antonio Reguly^(hu) linguista et exploratore Hungarico, qui linguae et moribus gentiliciis Mansiensibus studeret, tabula Uralium Cispolarium cum nominibus Mansiensibus delineata est, ubi mons ad fontes Narodae situs Poang Urr (Mons Caput vel Cacumen) nominatus est. De altitudine montis nihil Reguly dicit. Tabula eius in manuscripto restat et ignota erat usque ad annum 2016, cum Ladislaus Georgii filius Karelin^[2] explorator Uralensis eam invenit.

Anno 1927 expeditio Alexandri Alëškovii^(ru) geologi Sovietici originis Komiensis, qui et nomen Uralium Cispolatium induxit, descriptionem et dimensionem certam iugi composuit; in libro Alëškovii anno 1929 editae mons Popularis (Narodnaia) primo momtium Uralium altissimus esse dicitur (Telposiz vel Sablia diu montium Uralium altissimus putabantur). Sed sensus nominis anceps est; saepius nomen Narodnaia de vocabulo Russico narod, populus, derivatum esse intelligitur, et amici Alëškovii eum sic intellexisse affirmant^[3]; sed haud pauci de nomine fluvii Narodae nomen montis derivatum esse putant (et Latine id non Popularis, sed Narodensis vertendum est).

Notae

↑ Norae Zabinkovae et Moysis Kirpicznikov Nomina physico-geographica principalia URSS s.v. Народная.
↑ De Ladislao Karelin in situ exploratorum Uralensium (Russice)
↑ E.g., Архипова Н. П., Ястребов Е. В. Как были открыты Уральские горы. Catharinopoli 1990, p. 172 (Russice)

Nexus externi

Situs geographici et historici: Locus: 65°2′0″N 60°7′0″E • GeoNames • Peakbagger • Store norske Lexikon • Большая российская энциклопедия

De charta Antonii Reguly manu scripta, cum imagine, in situ Societatis Geographicae Russiae (Russice)
Ladislai Karelin liber Poeng Ur montium Uralium altissimus, Catharinopoli 2016 (Russice)

[1] Norae Zabinkovae et Moysis Kirpicznikov Nomina physico-geographica principalia URSS s.v. Народная.

[2] De Ladislao Karelin in situ exploratorum Uralensium (Russice)

[3] E.g., Архипова Н. П., Ястребов Е. В. Как были открыты Уральские горы. Catharinopoli 1990, p. 172 (Russice)

[1]

[2]

[3]