Izmir
- Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
| ||||||||||||||||||||||||
Izmir[1] (en turkano İzmir, achikamyento de el su antiko nombre grego Σμύρνα, Smýrna) es el sigundo mayor porto de la Turkiya tras Estambol, i la tresera sivdad del payis en tamanyo (4.130.444 abitantes en 2009). Se topa endjunto a la beira de la Mar Ejea, serka del Golfo de Izmir, entre las peninsolas de Foça i Klaksomenas, i a unos 450 km al sudoeste de Estambol. Es endemas la kapitala del vilayet de Izmir.
Izmir ez sivdad de porto i de komersio, i ez el sentro de la exposición enternasional. En la parte oeste se topa la peninsula Çeşme ke tiene playas i sentros de termal. En el tiempo del imperio romano Efes era una de las sivdades mas grandes del mundo. Aya aviya toda la rikeza de la kultura i del arte. Por esto la sivdad fue yamada la ermoza Izmir, La perla de Iyonya, i La vieja Izmir. Dospuez de anyos estoz nombres fueron un titolo de la sivdad.
Izmir ez entornada de yahtas i vapores. El aver ez ermozo no muy kaynte. En el bodre de la mar ay kalejas anchas kon arvoles de palmera. Dozpuez del porto Mersin, Izmir ez el maz grande de Turkiya. I aparte de esto a kavza de las exposiciónes enternasionales i festivales de arte tiene un posto muy emportante en el mundo.
Etimolojia
El nombre de Izmir proviene de Esmirna, antiko biervo grego ke proviene de mirra, smyrna,[2][3][4] ke era la egzportasión prinsipala de la sivdad aze muncho anyos.
En inskripsiones i pekunias, el nombre a menudo fue eskrito komo "Ζμύρνα" (Zmyrna), "Ζμυρναῖος" (Zmyrneos), «de Esmirna».[5]
En la antika Anatolia, el nombre de una lokalidad yamada Ti smurna es mensionado en algunas de las tabliyas de la kolonia asiria de Kültepe (primera mitad del sigundo milenio a. C.), kon el prefijo ti-, identifikado de un nombre propio, anke no se afinko kon serteza si se refiere a la moderna Esmirna.[6]
La rejión de Izmir fue topada en la periferia sud de la kultura yortan durante la preistoria de Anatolia, kuya konosensia se obtiene kaji en la su totalidad de sus tombas i sementerios.[7]
Istoria
En las excavaciones arqueológicas ke izyeron se supo ke en el viejo Izmir biviyan los emigrantes ke salyeron de la Gresia los Ayoles i los Iyones. En el tiempo del fierro en Izmir aviya kazas chikas i grandes de una o doz kamaretas. La maz vieja kaza ez de entre los anyos 925-900 aEK. Esta kaza se topa konservada bueno ke fue fraguada de lodo i el techo de paja. Dospuez de 875 aEK fraguadon kazas de una kamareta en el entorno de un kortijo ke era komo nalcha.
En el anyo 850 aEK fraguaron paredes de lodo para protejar la sivdad. Dospuez de este periodo el viejo Izmir se konvertyo a una sivdad de governo.
Los emigrantes i los savyos eran el puevlo adelantado. En la sivdad el puevlo mas omenos era 1000 personas. En los 750-650 aEK el puevlo de la peninsula pujo fina 1500 persona. La major parte del puevlo biviyan en los kazales del entorno. En estoz kazales aviya arvoles de azituna, vinyas e echos de seramika. Eyos se manteniyan kon peshkar i agrikultura.
El lugar mas sentro de la sivdad era el templo de Atena.
El periodo briyante 650-545 aEK
El tiempo maz riko de Izmir fue entre loz anyos 650-545 aEK. Este periodo kontinuo 100 anyos. Kon la kavesera de Miletos izyeron munchas koloniyas en Ejypto, Surya i en Levanon. Los Helenistos del este izyeron konkorensya kon la Gresia i parvinyeron a adelantar en munchas kozas. En akel tiempo Izmir, aparte de agrikultura teniya komersio en la mar Mediterranea. Estuvyeron okupandosen kon biblos chikos i grandes salidos de Kibris i statuas de fayans de Asya del Mediterranea. Esto kedo fina agora.
La forma vieja de las kazas de munchas kamaretas se topa en Izmir en el sieklo 7 aEK. Laz kazas en Izmir se topavan una allado de otra ke se yamava Megaron. Laz kalejaz i las kayes eran fraguadas del este al oeste, i laz kazas miravan al sud.
El tiempo del Imperio Romano 133 aEK – 395 dEK
El grande Aleksander gano en la guerra al rey de Persia Daryus en el anyo 333 aEK. I dozpues ke se apatrono de todo el este el puevlo Heleniko empeso adelantar. Las sivdades empesaron a empuevlarsen. En akeya epoka en las sivdades Iskenderiya, Rodos, Bergama i Efes el puevlo arivo fina maz de 100,000 personas. En el viejo Izmir ke estava en un monte chikitiko, lo ke biviyan era solo unas kuantas mil personas. I dospuez de esto lo maz tadre en el anyo 300 aEK se fondo en Kadife Kale una sivdad mueva i grande.
En el tiempo de los Romanos entre las fraguas ke uvo en Izmir aviya un teatro stadyum, ma de esto kedo muy pokos rekuerdos. En lugar de esto Agora de Smyrna fue konservada bueno i se yamo Agora. La grandor ez 120 X 80 de largor, i tiene una ancha entrada. Por las doz partes teniya doz fraguas de doz etajes.
En el II syeklo aEK, Izmir paso a las manos de los Romanos, i por segunda vez estuvyeron bivyendo el tiempo de oro. En el anyo 88 aEK el rey de Pontus VI Mithridates, se apatrono de la sivdad. Dospuez de doz anyos la sivdad paso de muevo a las manos de los Romanos.
Asigun la Biblia una de las siyete Iglisiyas ke se topavan en Smyrna, fue my emportante para el adelantamyento del Cristianizmo. El primer obispo Aziz Polikarp i uno ke eskrivyo la Biblia St. John eran unoz de los primeros kreyedores. Este nasyo en el anyo 70 dEK en Anadol, i por modo ke kreyo al Crisianizmo fue matado de parte de loz Romanos en la data 23 Febrero 155. Lo kemaron en el stadyum de la sivdad Izmir. En el anyo 395 dEK el Imperio Romano se aparto en doz. Izmir fue parte del Imperio Bizansiano del este.
El periodo de la Imperia Romana del este
En el tiempo de la Imperia Romana del Este lor Arabos, los Selchukes, los Genevizoz, i los Kruseros se kijeron apatronar de la sivdad i uvo peleaz entre eyoz. En primero en el anyo 672 loz araboz atakaron de parte de la mar i lo uzaron komo us en loz atakoz ke izieron a Estanbol. Loz turkoz en el anyo 1076 por primera vez lo tomaron Izmir de las manos de loz Selchukes,i kon tiempo kon la ayuda de Chaka Bey ke era el primer i grande marinero Turko se apatronaron de la sivdad. Kon loz atakoz ke izo de Izmir para laz izlaz de Ege i a loz Dardaneles izo teror a lo Bizantinos. Dospuez de su muerte loz Bizantinos en el anyo 1098 se apatronaron de la sivdad. En el anyo 1204 la parte de la mar de la sivdad paso alaz manos de loz Shevalyes de Rodos.
En el anyo 1310 Aydinoglu Umur Bey se apatrono de la sivdad entera . En el 1344 los Cenovezoz apanyaron la sivdad del sud. Se apatronaron de la kale St Peter. Loz Aydinogullari Beyligi tomaron la parte norte de la sivdad ke se yomo Kadifekale. De akeya epoka kedo la nombradiya de Gavur Izmir, i esto se uzo para ke se konoska la sivdad del sid ke kedo en laz manoz de los Cenovezoz.
En medio del 14 sieklo la kale de st. peter I la sivdad del sud esta vez paso alas manos de los shovalyes de Rodos. Entre mientrez en el anyo 1398 el governo Osmanli izo un governo en Izmir. En el 1403 la armada Mogol se apatrono de la sivdad, i en la komanda de Timur dospues de venser al governo Osmanli derroko la kale de St. peter.
Esta vensa de Timur fue la unika batalya kontra los hrisianos I por esto ez enteresante.Dospuez ke el governo Otomano se empeso a enreziar en el 1422 Murat 2. atako la sivdad. Despuez de esto Izmir se izo parte del Emperio Otomano.
La keila djudia de Izmir
La keila djudia de Izmir se topa en la kosta de la mar Aege de Turkiya. Era kla keila maz grande i adelantada en el tiempo de loz Otomanos. La keila empeso a emplumar en el 17 sieclo . Era el sentro para los djudios ke vinieron de la Espanya i era el sentro de komersio i endustriya. Uno de los moradores de la sivdad era el mintirozo mashiah Shabtai Zvi . El teniya munchos hasidim en la keila. En medio del 19 sieklo empeso a amenguar el puevlo en la keila. I esto fue a kavza ke uvo discusionez kon el puevlo Grego. La Emperia Otomana empeso a atrazar a kavza de la batalya kon los Gregos. Kuando se fondo el Governo Israel munchos djudioz moradorez en Izmir emigraron a Israel kaji 10.000 personaz. En los anyos 1950 -1960 en el 20 sieklo se serraron munchos mosdot. Agora en Izmir biven kaji 2000 personaz, la sigunda de grandor en la Turkiya. Entre Estanbol i Izmir ay muncha diferensia en la quantudad en el puevlo.
El empesijo del djudaismo en Izmir
La existensia de loz djudio en Izmir ez del tiempo de la biblia. Parese ke los djudios tenian influensa en el puevlo ke kreyiya en loz idolos. Unos kuantos de eyoz se konvertieron al djudaizmo. Pero los christianos parvinieron a amenguar la fuersa del puevlo djudio. En el tiempo de loz Bizantinos kaji no se nombrava djudios en Smirna. En los kazales del entorno kontinuaron a bivir djudios.
En el anyo 1424 la sivdad ke era dainda un kazal chiko fue konkistada de parte de loz Otomanoz, ke estava en laz manoz de loz Bizantinos i fue parte de la Imperia Otomana. En el sieklo 16 ay dizientez de parte de loz djudios ke vinieron a Izmir de la Espanya, i ke eran djudioz romantiotes. La mas parte de loz primeroz djudioz vinieron en el anyo 30 del sieklo 16. Ay provaz ke en el sieklo 16 uvo djudyoz en la sivdad en el anyo 1521 ke fueron aroncados de parte de los Otomanos de Belgrad i Serbia. I en el anyo 1524 fueron aroncados de Ungaria ibuda. Aviya tombas de los anyos 1540-1565 en Izmir i aviya enriva de las tombas sinyales djudyos. Maz despues se fondo keila sefaradit i portugezit ke emigraron de Asya, Afrika i del norte de Venezia. Pero en las eskrituryas de los Otomanos no ay dinguna prova de la existensia de alguna keila organizada. La emigrasion de loz djudios de Sefarad ala Imperia Otomana paso por Izmir en el sieklo XVI. Eyoz empesaron a bivir aya kuando Izmir se izo un porto santral de los Otomanos.
El periodo del Imperio Otomano
En el anyo 1620 el emperio Otomano lez dio a los ajenos permision para ke se okupen kon merkanseria i ansi ke la sivdad se izo un sentro muy emportante.
En el anyo 1619 se avyo konsolato Fransez i en el anyo 1620 Inglez. En este tiempo empeso a trokar la existensia del puevlo. En el 16. sieklo en Izmir aviya 19 meskitas, 18 sinagogas i una sola eglisia, en las 9 maales de Izmir solo en la una biviyan hristiyanos.
En akel tyempo en el sentro de la sivdad la mayorita del puevlo eran Turkos Muslumanos; buen kadad de djudios, i la menoriya eran hristyanos. En el 17. sieklo Sabetay Sevi era uno del puevlo djudyo de Izmir. En el 1672 kuando Evliya Celebi vizito la sivdad i vido ke en la maale Alsancak estava pujando el puevlo no muslumano, i en su livro eskrivio ke pujaron los merkaderes Levantenes i los del oeste.
El tiempo de oro del 17. sieklo
Las primeras keilas ke se fondaron en Izmir en el 17. sieklo fueron yamadas ets a hayim, Portugal i girush. Loz amigos parese eran los ijos de los ke biviyan aya del sieklo 16. La mas parte de los moradodes djudyos eran Otomanos. Los djudios tenian posibilitad de orasyonar liberamente, teniyan eskolas i djuzgos apartados. La keila pagava dasios para los aktos. Kon los dasios ke tomavan de los miembros eran protegidas sus vidas. Este dasio se yamava jezia. La keila pagava para todos los miembros.
En la sivdad biviyan los frankos, merkadedes djudios de Portugal entre eyos aviya konvertidos ke tornaron al djudaismo. Antes de vinir ala Imperia Ottomana bivieron en Italia i en otros lugares. Eyos eran apartados de los djudios.
El primer Rav de Izmir en el anyo 1606 era Yitzhak Meir Alevi. Muryo en el anyo 1634 era de Konstantinopoli. En el anyo 20 del 17 sieklo vinieron muncho puevlo de Saloniki. En el anyo 1620 eskojeron a Yosef Iskapa de Salonik por el primer rabino de Izmir, el era djudio ke vino de Salonik i muryo en el anyo 1662 Del anyo 1631 en Izmir el primer rabino era el rav de todas las keilas. En el anyo 1644 en la sivdad aviya sej edas de djudios. Lo mas eran vinidos de la Espanya . Aviya i una chika eda de eshkenazis. Despues ke murya el Rav Alevi metieron otro primer rav aparte del Rav Ispaka, ke se yamava Azarya Yeushua Eshkenazi de Salonik i el muryo en el anyo 1647. Entre los dos rabinos aviya konflikto ke se apartaron a dos keilas. El konflikto era por el kashrut, avelim, i sfirat a Omer, degoyido, tisha be av i mas otras kozas. Los djudios de Salonik i los de Estanbol tenian pensamientos diferentes. Dospues ke muryo el rav eshkenazi i kon el entrevenir del primer rav de Konstantinopoli akseptaron todas las edas a los dichos del rav Ispaka. En el anyo 1657 se fondo una emprimeriya djudia en la sivdad ke ayudo a su engrandesimiento.
Sabetay Sevi era un mintirozo mashiah ke enganyo alos djudios de toda las partes del mundo. El era nasido en Izmir, era elevo del Rav Yosef Ispaka. En septembre 1655 torno a Izmir dospues de entornarse entre todos los djudios de la Imperia Otomana. I disho ke el era mashiah, en la keila todos estavan muy empresionados. Lo mas de los djudios entre eyos el primer rav Hayim Benveniste kreyeron en el i lo apoyaron, de mas teniya i 150 navis.Entro los ke lo kontradisieron fue el Rav Aaron lepapa.El sigundo rav fue aroncado de Izmirpor ke vino kontra. I el Rav Benveniste kero el uniko rav en la keila. En los kuatro mezes ke estuvo Sabetay Sevi en Izmir en otomno 1665 en la sivdad fue el sentro de los Mashiah. La vida i la merkansia en la sivdad se troko kon fiestas, bayles el puevlo empeso a tornar en teshua. Los ke no akseptaron a esta situasion fueron aroncados, i munchos fuyeron de la sivdad. Entre eyos el Rabi Shlomo Algazi ke era savio i alavado de parte de todos. Era el eshuegro del Rabi Aaron Lapapa, i fue ovligado de demandar un lugar para bivir en la keila de Genesia. Estas peleas sureyaron en Izmir fina dospues ke se konvertio Sabetay Sevi a ser muslumano.
Los sieklos 18-19
La keila djudia de Izmir kontinuo a enrekeserse mientres el sieklo 18-19. Loz djudios empesaron a okuparsen kon lana de kavras, i tapetes. El komersio kon la Evropa adelanto dez del anyo 1774. Munchos se okupron kon exportasion de igos, azeyte, pasas, tapetes i lugumbre. Aviya i transladodes para los merkadodes de Evropa bankas i konsulyas etranjeras. En akeya epoka las persona emportante Era Moshe Sonsino ke se okupava de la duana en el anyo 1718. I Moshe Arditi gizbar del governo en el anyo 1812. En el 19. sieklo pujaron los djudios ke lavoravan en la munisipalidad, i en la djustisia.
En medio del 18. sieklo lod djudios sufriyeron de munchas desgrasias fuertes. Fuegos grandes en los anyos 1743-1772 1841-1881. Mas de 10 kavsos de epidemiyas de kolera entre los anyos 1770-1892. I unos kuantos terremotos muy fuertes. En el fuego ke uvo en el anyo 1772 fue muy danjeroso. Se derroko la sinagoga ke se fraguo de muevo dospues de 28 anyos. En este tyempo los djudios fueron ovligados de orasionas en unas kazaz ke se konvertieron a kaza de orasion. En el 18. sieklo Izmir se izo el sentro de la empresa ebraika treseda de grandos enla emperia otomana, Dospues de Konstantinopoli i Saloniki.
Fina el empesijo del 20. sieklo se empreso mas de 400 titolos lo mas livros de rabis. Munchos de estos livros fueron eskritos en Izmir. En los anyos 1913-1922 . La empresa Ben Sinior fue la empresa de alkavo ke uvo 12 empresas. Unos kuantos de rabinos de Izmir emigraron a Israel. Hayim Ben Yaakov Abulafia murio en el anyo 1744. Nasio en Tiberia, fue el gran rabino de Izmir En los anyos 1720-1740. El torno a Tiberia kon sus elevos I renuvo la keila djudia en la sivdad kon el ayudo de las keilas de Estambol i de Israel.
En el 19. sieklo la situasion entre los djudios I el puevlo grego empeso a ennegreser en Izmir.En el 18. sieklo uvo unas akuzasiones kontra los djudios de parte de los gregos i en los anyos 1864-1901 uvo sej kavzos de matansinas. La polisia Otomana se mesklo en el kavzo en la parte de los djudios, i de mas kuando en el 1872 fueron assasinados doz djudios. I en el anyo 1901 munchos gregos amenasaron a atakar una keila djudia.
En el 19. sieklo una parte de djudios fueron protejados de parte de las komunitas Evropeas en la sivdad. Munchos tomaron suditansia Italyana, otros franseza I otros komo la famiya Palachi I Leon tomaron protejo Hollandezo. En el empesijo del sieklo 20. se fraguo Bet El, una sinagoga grande i empresionante de Izmir. Esta sinagoga se fraguo de parte de artistos Italianos ke fueron envitados particularmente . Ay enfluensa Evropea moderna, i de mas el lugar de la teva es serka del Kotel a Mizrahi.
En el 19. sieclo fueron emprimadas gazetas i eskriturias djudiyas, i esto izo trokamientos en la vida kultural del puevlo en Izmir. En el 1846 salyo a luz la primera gazeta djudia, perta del oriente, de parte de Pincherle. I despues salyeron 5 eskrituriaz djudiyas como la Buena Esperansa (1871-1910) el messerret (1897-1922) i todos en ladino. En el 1838 fina el kavo del sieklo fueron emprimados mas de 110 livros en ladino, komo poeziyas, livros de ley i konsejas.
El 20. sieklo
En medio del 19. sieklo la kantidad de los djudios de Izmir empeso a abashar. En el anyo 1868 biviyan en Izmir 40.000 djudios. En el empesijo del 20. sieklo abasho a 25.000 personas. Entre eyos aviya una chikitika keila de Eshkenaziz ke se fondo de parte de los emigrantes ke vinieron de Rusia en el anyo 1905. Lo ke ayudo a adelantar la keila fue vapores ke viniyan de Odessa. Kada diya de mierkoles, una ves ala semana para Estanbol, Izmir, Biria, Haifa Yafo fina Aleksandriya. Estos vapores fueron uzados i para la sigunda aliya ke vinieron de Odesa.
Dospues ke kayo la Emperia Ottomana i la gerra entre los Turkos i los Gregos 1919-1921 ke fue derrokada la sivdad munchos djudios abandonaron la sivdad. Munchos se fueron a la Gresia, Fransia, Amerika i Argentina. En el anyo 1927 aviya en Izmir 17.000 djudios, en el 1947 abasho la kantidad a 15.000.
En los diyas de la sigunda gerra mondial los djudios de Izmir ayudaron a salvar kaji mil djudios de las tyerra gregas ke fueron okupadas de parte de los nazistos. En disiembre 1943 kon la ayuda de los partizanos gregos fuyeron ala Turkiya kon barkitas una kantidad de djudios gregos. Eyos fueron aresividos en Izmir de parte de la keila, fina ke el governo Inglez de Estanbol permitio ke emigren a Israel. Dospuez ke se fondo el governo Israel emigraron komo 10.000 djudios de Izmir a Israel. En el empesijo del anyo 1960 aviya en Izmir manko de 2.000 djudios, ke antes aviya en Izmir 2.300.000 moradores. Dospues de Estanbol Izmir era la sigunda sivdad de grandor en Turkiya.
La keila de oy
El apokamyento de los djudios en el empesijo del anyo 1950 del sieklo 20. kavzo a serrar unos kuantos lugares de la keila. Komo la eskola Allians, ke se avio de muevo i se serro por entero en el anyo 1960. En la keil;a aviya una eskola i dos sinagogas, ospital i un beit din en la kavesera del Rav Arashi Moreno Sigura fina su muerte en el anyo 1966. En el anyo 1970 aviya dainda aksiones de mansevikos, una vida relijiosa kon dos sinagogas. Beit El i Shaar Ashamayim, una sinagoga mueva en la maale mueva Alsancak, i aya se topava el buro del rabanut i la keila. Las ovras kulturadas era aranjada de parte Liga una organizasion de donos fondada en el 1990. La eskola antika Talmud Tora se serro en el 1998, los elevos ke kedaron fueron pasados ala eskola Amerikana del lugar. Komo 150 elevos ambezan en la eskola elementaria djudiya. La lingua ke se ambeza ez el Turko 15 oras ala semana ambezan el Ebreo. En el ospial de Karatash son mirados i hazinos ke no son djudios.
Ekonomia
El turizmo es parte emportante del manadero de la ekonomia de la sivdad de Izmir. El su sentro o kasko antiko kuenta kon antikas fraguas ke engalanan el porto.
Turizmo
La sivdad de Izmir konta kon una emportante oferta ostelera, ay aki munchos sitios de intereso ande los turistas pueden visitar.
- Palasio de governo, fragua onde governa.
Akodros
Sivdades ermanas
Esto ez una amigavle ke se aze entre la sivdad del paiz kon otras sivdades ajenas. Loz miembros de las minisipalidad konfirman ke la sivdad ermana kale ke akonante de parte Kulturala, Ekonomiya, Komersio, Turizmo, Estudio, Spor i Sanedad. I kale ke tengan relasyones de amigavle i de pas. Aparte de esto las doz sivdades ermanas paresen en la istoria, geografiya i kultura. Izmir tiene 31 sivdades ermanas:
|
|
Referensias
- ↑ Esmirna Real Academia Española, Diccionario panhispánico de dudas (en lingua kastilyana)
- ↑ Xablón:Cita publicación
- ↑ Xablón:Cita libro
- ↑ . Consultado el 5 de diciembre de 2017.
- ↑ Xablón:Cita libro
- ↑ Xablón:Cita libro
- ↑ Xablón:Cita publicación
Atamientos eksternos