Niue

Bandera nasional

Niue es un isola e pais en la Mar Pasifica sude, a 2400 cilometres a norde-este de Zeland Nova, a este de Tonga, a sude de Samo, e a ueste de la Isolas Cook. Sua area de tera es sirca 261 cilometres cuadrida, e sua popla, xef polinesian, ia ave sirca 1612 persones en novembre 2016. La isola es comun conoseda como "La Roca", cual veni de la nom tradisional "Roca de Polinesia".

Niue, de cual sua capital es la vileta Alofi, es un stato autonom en asosia libre con Zeland Nova; e Zeland Nova fa la plu (ma no tota) relatas diplomata per lo. Niues es sitadanes de Zeland Nova, e Rea Elizabeth 2 es la xef de stato car el es la Rea de Zeland Nova. Entre 90 e 95% de persones niue abita en Zeland Nova, con 70% de la parlores de la lingua niue. Niue es un pais bilingual: plu ca 30% de sua abitores parla e niue e engles, an si la cuantia persental de persones ci parla sola engles es sola 11%, e 46% parla sola niue. Rugbi es la sporte la plu juada en Niue. En otobre 2016, Niue ia declara ofisial ce tota sua deta nasional ia es paiada.

Niue no es un membro de la Nasiones Unida (NU), ma organizas NU ia aseta sua state de stato libre asosiada como corespondente a autonomia per la intendes de lege internasional. Tal, Niue es un membro completa de alga ajenterias NU spesialida (como UNESCO e la Organiza Mundal de Sania) e es invitada, como ance la Isolas Cook (la otra stato membro non-NU) a es presente a conferes NU abrida a "tota statos". Niue es sudivideda a 14 viletas (munisipas). Cada vileta ave un comite cual eleje sua presidente. La viletas es ance distritos elejal. Cada envia un asemblor a la Parlamento de Niue.

En 2003, Niue ia deveni la pais prima de mundo cual ia finansia la furni de interede sin filo a tota abitores. La Asosia de Cultivores Organica de la Isola Niue intende fa ce Niue deveni la prima de la nasiones intera organica de mundo ante la fini de 2020. Un gidor en crese verde, Niue move ance a enerjia solal, aidada par la Uni European. Niue intende deveni 80% renovable ante la fini de 2025. An tal, a presente, Niue ave un de la tasos la plu alta de mundo de produi de gases invernerial per person (pos sola Cuait e Brune).

En 2015, Niue ia comensa furni linias de telefon a tota sua abitores. En 2008, lo ia deveni la pais prima de mundo do on furni computadores portable a tota studiantes de scola. Un nasion peti e multe democrata, niues es multe libre e elejes aveni en cada anio tre. On ave aora no partitos political en Niue: tota asemblores es nondependente. La partito final, la Partito de Popla Niue (1987–2003), ia gania a un ves, ma ia sperde a pos.

En janero 2004, Niue ia es colpada par Siclon Heta, cual ia causa multe dana a la isola intera, incluinte destrui la plu de la sude de la capital, Alofi. La desastre ia retarda la isola par sirca du anios de sua projeta de reali la Projeta Stratejial Integrada Niue, en cuando la nasion ia labora per recovre.

Niue es un de la isolas de coral la plu grande de mundo. La tereno es composada de falesas presipe de calcario longo la costa con un plano sentral levante a sirca 60 metres supra la nivel de mar. La isola es ensircada par un resife de coral, en cual la sola buco major es a la costa ueste sentral, prosima a Alofi. Un cualia notable es la multe cavas de calcario prosima a la costa.