Alkmaar

Alkmaar es un site e munisipa en Nederland, locada en la provinse de Holland Norde. Alkmaar es bon notada per sua mercato de ceso tradisional. Per turistes, lo es un destina cultural popular.

La nota la plu temprana de la nom Alkmaar es en un documento de la sentenio 10. En cuando la vila ia crese a un site, la site ia reseta la diretos de site en 1254. La parte la plu vea de Alkmaar ia es construida sur un riva de arena cual ia furni alga proteje de la inondas en la eda medieval. An tal, lo es sola un o du metres supra la rejion ambiente, cual es composada de alga de la polderes la plu vea.

En 1573, la site ia sufri par un aseja par la fortes espaniol su la comanda de Don Fadrigue, fio de la Duxe de Alva de Espania. La sitadanes ia envia mesajes urjente per aida a la Prinse de Orania; el ia responde par promete la abri de la portones de la paramares e inonda la rejion si lo deveni nesesada. Contra la protestas de la campanianes, ci ia es ansiosa per sua colies, la Prinse ia dona la comanda.

Alga de sua mesajes ia fini en la manos de Don Fadrigue, e con la acuas comensante a leva, la espanioles ia para la aseja e fuji. Lo ia es un punto de turna en la Gera de 80 Anios, e furni un espresa "Bij Alkmaar begint de victorie" (Vinse comensa a Alkmaar). La aveni es ancora selebrada cada anio en Alkmaar a 8 otobre, la dia en cual la aseja ia para.

En 1799, en la Geras de a Revolui Franses, un forte engles-rusce ia catura la site, ma ia es ultima defetada en la Batalia de Castricum. Pos acel batalia, a 18 otobre 1799, la oposores ia inisia la Confere de Alkmaar per determina la destina de la forte engles-rusce defetada. La vinse franses ia es reconoseda sur la Arc de Triomphe en Paris como "Alkmaar".

La Canal de Holland Norde, ia abrida en 1824, ia es escavada tra Alkmaar. En 1865, la ferovias entre Alkmaar e Den Helder, e en 1867. entre Alkmaar e Haarlem ia es construida.

En la dui du de la sentenio 20, Alkmaar ia estende se rapida con la developa de visineria nova. A un otobre 1972, la vila de Oudorp e la partes sude de Koekijk e Sint Pancras ia es ajuntada a la munisipa de Alkmaar.

Alkmaar ave multe construidas medieval e ancora intata, spesial la tore alta de la "Grote de Sint-Laurenskerk", do multe persones de Alkmaar usa lo per rituos de sposi. La otra aveni xef, spesial en la menses de estate, e la mercato de ceso a la Waagplein ("plaza de pesa"). Lo aveni de la venerdi prima en april tra la venerdi prima en setembre. La rituos aveni ante la eglesa - la Waagplein. La rituos inclui detalias como la colpa de manos en la curso de negosia e la pesa de la cesos. Lo es un de sola 4 mercatos tradisional ancora esistente.

La rituos no es per compra ceso, sola per la diverti e istorial. Ma on pote compra ceso Alkmaar a la botecas e stalas cual ensirca la Waagplein. La cesos presentada es la cesos tradisional per la area, e no la otra marcas ance popular, como Edam e Gouda.

Alkmaar ave 399 "rijksmonumenten" ("monumentos de la rena"), de cual la plu de los es locada longo la canales ves de la site