Nyiragongo
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Nyiragongo is ‘nen actieve vulkaon in ‘t noordooste vaan de Democratische Rippebliek Congo. Heer heet ‘n hoegte vaan 3470 meter en ligk gans in ‘t Virunga Nationaol Park. De Nyiragongo ligk op ‘n hotspot vaan de Groete Afrikaonse Rifvallei. De vulkaonische krater euverlap deils mèt twie awwer vulkane, de Shaheru en de Baruta. In de buurt vaan de Nyiragongo gief 't väöl kleiner krejkegels. Daartien kilometer in ‘t noorde ligk d'n ouch nog actieve vulkaon, de Nyamuragira.
Op 17 jannewarie 2002 brook ‘r weer oet. Deze kier waor d’r ‘n spleeteruptie. Versjèllende lui gónge doed door ‘n benzine-opsjlaagruimte dee oontplofde. Oongeveer 400.000 lui woorte tijelek oet hun hoezer verdreve, wie ‘t centrum vaan de stad Goma aon de grens mit Rwanda gans woort euverstruimp mit lava. Dees lava versteinde tot ‘n dikke zwarte laog, de huugte vaan ‘n verdeping vaan ‘n hoes. Dees lava is hel wie beton en de nui hoezer zien bove op de lava gebouwd.
Allewel ‘t observatorium vaan directäör Kavotha woort getroffe door e projectiel, de tillefoonleidinge woorte aofgesnooje en de brögke opgeblaos woorte en de weitesjappers neet langer woorte betaold veur hu wèrk, bleve sommege hu wèrk doen. De oetbarsting heet hun op z’n mins de steun vaan de internationaol gemeinsjap opgelieverd.
Sinds 2002 is Nyiragongo bekans permanent actief mit aspluime, gaas-emissies en beweginge in ‘t lavameer.