Benteng Kuto Besak
Benteng Kuto Besak adolah benteng tuo nan talatak di Palembang, Indonesia. Iko adolah struktur arsitektur lokal paliang tuo dan paliang gadang, nan manjadi simbol tapantiang dari sijarah kasultanan Palembang di maso lalu.[1] Indak sarupo jo banyak benteng lain di Indonesia, benteng ko indak dibangun dek kakuasoan panjajah, malainkan dek sultan-sultan Palembang surang.[1] Benteng Kuto Besak kini ko marupoan salah satu obyek wisata rasmi nan tanamo di Palembang.[2]
Namo
[suntiang | suntiang sumber]Kato Kuto dalam bahaso Malayu Palembang baarati koto, istano, benteng, atau kubu bapaga tinggi, sadangkan kato Besak baarati gadang.[3]
Sijarah
[suntiang | suntiang sumber]Benteng ko dirancang dek Sultan Mahmud Badaruddin I (1724-1758) jo dibangun dek anaknyo, Sultan Mahmud Bahauddin (1776-1801).[1] Pambangunan maambiak maso tujuah baleh taun untuak manyalasaiannyo, nan akianyo dirasmian pado taun 1790.[1]
Sajak mulo dibangunnyo, Benteng Kuto Besak alah manjadi simbol dalam perlawanan lokal taadok kakuatan Eropa, iyolah Inggirih jo Balando.[1] Benteng ko di maso kapamimpinan Sultan Mahmud Badaruddin II disarang Balando tigo kali, nan bamukasuik ka manaklukan Kasultanan Palembang. Sarangan patamo bulan Juli 1819 di bawah pimpinan Komisaris H.W. Muntinghe sato sarangan kaduo bulan Oktober 1819 di bawah pemimpinan Laksamana C.J. Wolterbeek indak barasia, dima tantara Balando dipukua mundua.[4] Anyolah pado sarangan katigo, bulan Juni 1821 di bawah pimpinan Jenderal H.M. de Kock, Balando dapek manambuih patahanan benteng ko.[4] Sultan Mahmud Badaruddin II kamudian ditangkok dan diasiangan ka Ternate, Maluku Utara.[5]
Sasudah pangambiak-aliahan kakuasoan dek Balando taun 1823, pasukan Balando ditampekan di benteng.[1] Nantinyo sakali lai kaadoan baubah, dek karano panampatan militer Indonesia di siko satalah kamardekaan Indonesia.[2]
Bangunan
[suntiang | suntiang sumber]Benteng ko dibangun di tapi Sungai Musi nan maalia dari ulu ka ilia, tabantang dari barat ka timur. Salah satu ciri khas dari benteng ko iolah adonyo tigo katelum, iyolah pinjuru benteng nan manjorok ka lua. Bangunan benteng ko cukuik gadang, panjangnyo 289 meter panjang, lebanyo 184 meter, dan tingginyo 10 meter.[1] Pintu masuak utamo talatak di sisi selatan benteng, nan maadok ka Sungai Musi.[3]
Daulunyo di dalam benteng ado istano sultan, tampek tingga putri bangsawan, taman, sato kolam.[1] Kini ko, di siko ado detasemen militer (Kodam II Sriwijaya) jo rumah sakik militer (Rumah Sakit Dr. A.K. Gani) nan masih batampek di dalam benteng.[2]
Pariwisata
[suntiang | suntiang sumber]Di sabalah benteng ko ado sabuah museum kota, iyolah Museum Sultan Mahmud Badaruddin II, nan daulunyo marupoan tampek tingga Residen Balando patamo, J.L. van Sevenhoven.[2] Bangunan ko cukuik gadang juo, jo duo janjang nan rancak turun dari lantai tingkek ateh ka bagian muko, jo atok bangunan nan babantuak "Limas", samacam atok nan umum pado rumah-rumah bangsawan satampek.[2] Di dalam dan di lua museum taseba bamacam batu jo patung paninggalan arkeologi.[2] Lokasi bangunan ko sabananyo adolah bakeh benteng kaduo nan labiah tuo, banamo Benteng Kuto Lamo atau Benteng Kuto Tengkurek, nan lah diancuaan dek Balando.[2]
Di muko benteng ado sabuah lapangan tabuko, nan disabuik Plaza Benteng Kuto Besak (Plaza BKB) dek masarakaik satampek.[3] Lapangan ko talatak di tapi Sungai Musi sato dakek bana jo Jembatan Ampera.[3] Kaindahan Sungai Musi jaleh taliek malalui babagai kagiatan di sungai jo pado bangunan-bangunan di sakuliliangnyo.[3] Satiok ari, Plaza BKB salalu ramai dek pangunjuang, nan malapehan panek atau makan edangan lokal, dari tangah ari inggo patang.[3] Lampu bawarna-warni mulai manarangi pamandangan kutiko matoari tabanam, suasana tu lah jadi dayo tariak utamo bagi wisatawan di kota ko.[3]
Catatan kaki
[suntiang | suntiang sumber]Rujuakan
[suntiang | suntiang sumber]- Nas, Peter J.M.; Nas, Peter (2003). The Indonesian Town Revisited. Singapore: LIT Verlag Münster. p. 428. ISBN 3825860388, 9783825860387. http://books.google.co.id/books?id=lyB0mHURvIsC&pg=PA173&dq=Kuto+Besak+Fort&hl=en&sa=X&ei=hlFqU-K6HIn4rQeFkYCQCA&redir_esc=y#v=onepage&q=Kuto%20Besak%20Fort&f=false.
- Sukawi (26 November 2009). "Menikmati Musi di Kuto Besak". Suara Merdeka.[pranala nonaktif permanen]
- Poesponegoro, Marwati Djoened; Notosusanto, Nugroho (2008). Sejarah nasional Indonesia: Zaman pertumbuhan dan perkembangan kerajaan-kerajaan Islam di Indonesia. 3. Jakarta: PT Balai Pustaka. p. 385. ISBN 9794074098, 9789794074091. http://books.google.co.id/books?id=HiZvFZbm6sgC&pg=PA46&dq=Perang+Menteng&hl=en&sa=X&ei=J9ZwU_C6LdSfugTR6YCoBA&ved=0CDcQuwUwADgK#v=onepage&q=Perang%20Menteng&f=false.