Lompat ke isi

Kabupaten Solok

Wikipedia Minangkabau - Lubuak aka tapian ilimu
Artikel ko barisi tantang kabupaten. Untuak artikel tantang kota, caliak Kota Solok.
Kabupaten Solok
Daerah tingkat II di Sumatera Barat, Indonesia
Patuang Ayam Kukuak Balenggek di kompleks kantua pamarintahan Kabupaten Solok
Patuang Ayam Kukuak Balenggek di kompleks kantua pamarintahan Kabupaten Solok
Lambang rasmi Kabupaten Solok
Lambang
Semboyan: Alue jo patuik
(Minang) Karajo sasuai prosedur sarato pado tampeknyo
Nagara Indonesia
ProvinsiSumatera Barat
Tanggal paresmian19 Maret 1956[1]
Dasa hukumUU Nomor 12 Tahun 1956[1]
Ibu kotaArosuka
Pamarintahan
 • BupatiEpyardi Asda
 • Wakil BupatiJon Firman Pandu
Laweh
 • Total3.738,00 km2 (1,443,25 sq mi)
Panduduak (2021)[2]
 • Total392.338 jiwa
 • Kapadatan105/km2 (270/sq mi)
Demografi
 • AgamoIslam 99,91%
Kristen 0,09%
- Protestan 0,08%
- Katolik 0,01%[2]
Zona wakatu
Kode telepon0755
Plat kandaraanBA xxxx H**
Jumlah kecamatan14
DAURp 588.040.074.000.-(2013)[3]
IPM▲ 69,24 (2021)
manangah[4]
Kode Kemendagri13.02 Edit nilai pada Wikidata
Situs websolokkab.go.id

Kabupaten Solok adolah salah satu kabupaten nan ado di provinsi Sumatera Barat, Indonesia. Kabupaten iko marupokan kabupaten produksi bareh paliang banyak di Sumatera Barat, nan tanamo jo Bareh Solok.

Geografi

[suntiang | suntiang sumber]

Sacaro geografis latak Kabupaten Solok barado antaro 00° 32’ 14’’ dan 01° 46’45” Lintang Selatan dan 100° 25’ 00” jo 101° 41’ 41” Bujur Timur. Topografi wilayahnyo ado dataran, lambah jo bukik-bukik, katinggian antaro 329 meter – 1 458 meter di ateh pamukoan lauik.

Kabupaten Solok mampunyoi danau, antaronyo itu adolah Danau Singkarak, Danau Kamba (Danau Diateh jo Danau Dibawah), jo Danau Talang. Salain itu, Kabupaten Solok punyo pulo ciek gunuang barapi, iyolah Gunuang Talang. Dicaliak dari lataknyo, posisi Kabupaten Solok strategis karano disampiang tampek jalur Jalan Lintas Sumatra, daerahnyo juo babateh langsuang jo Kota Padang salaku ibu kota Provinsi Sumatra Barat.

Ditinjau dari komposisi pemanfaatan lahan, pado tahun 2010 sabanyak 38.88% wilayah Kabupaten Solok masih punyo status hutan negara jo 15.99% bastatus hutan rakyat. Sadangkan nan diolah rakyat untuak baladang sakitar 10.37%, sarato nan dikelola dek parusahaan pakabunan sabanyak 2.18%. Pamanfaatan lahan untuak sawah labiah kurang 6.30% dan marupoan areal sawah paliang gadang di Sumatra Barat.

Sabagai lumbuang padi di Sumatra Barat, pado taun 2010 sawah nan paliang lueh di Kabupaten Solok adolah sawah di Kecamatan Gunung Talang, kamudian diikuti dek Kecamatan Kubung, jo Kecamatan Bukit Sundi. Kecamatan-kecamatan lain luas sawahnyo masih di bawah angko 3000 Ha.

Samanjak pusat pamarintahan dialihkan ka Arosuka sabagai ibu kota Kabupaten Solok, jarak tampuah ka Kota Padang manjadi samakin pendek yaitu 40 km. Sadangkan jarak ka Kota Medan 825 km jo ka Banda Aceh kiro-kiro 1.433 km. Disisi lain , ado panamabahan saketek jarak kalau ka pai dari ibu kota kabupaten ka ibu kota provinsi lain contohnyo Pekanbaru (231 km), Jambi (495 km), Palembang via Muara Enim (993 km), Bengkulu via Muaro Bungo (736 km) sarato Bandar Lampung (1 170 km).

Pamekaran wilayah Kabupaten Solok pado akhia taun 2003 malahiakan ciek kabupaten baru yaitu Kabupaten Solok Selatan. Jo tajadinyo pamekaran iko berarti luas wilayah Kabupaten Solok ado pangurangan sacaro signifikan dari semulo , yaitu dari 708.402 Ha (7.084.02 km²) manjadi 373.800 Ha (3.738.00 km²).

Sijarah

[suntiang | suntiang sumber]

Daulu wilayah Solok (tamasuak kota Solok jo kabupaten Solok Selatan) marupoan wilayah rantau dek Luhak Tanah Datar, nan sasudah itu tanamo jo Luhak Kubuang Tigo Baleh. Di sampiang itu wilayah Solok ko juo marupoan daerah nan dilewati dek nenek moyang Alam Surambi Sungai Pagu nan barasa dari Tanah Datar jo diasabuik juo jo nenek kurang aso anam puluah. paristiwa iko kiro-kiro tajadi pado abad 13 sampai 14 Masehi.

Kabupaten Solok bukanlah daerah baru karano Solok alah ado jauah sabalum undang-undang pambantuakan wilayah dikaluakan. Pado maso panjajahan Belando dulu tapeknyo tanggal 9 April 1913, namo Solok alah digunokan sabagai namo sabuah unit administrasi satingkek kabupaten yaitu Afdeeling Solok sabagaimano disabuik an di dalam Besluit Gubernur Jenderal Belanda nan kamudian dimuek di dalam Staatsblad van Nederlandsch-Indie. Sajak dilakekan namo Solok satingkek jo kabupaten taun 1913 sampai kini, Solok tetap digunokan sabagai namo wilayah administratif pemerintahan satingkek kabupaten/kota.

Pado taun 1970, ibu kota Kabupaten Solok bakambang jo ditetapkan manjadi sebuah kotamadya jo namo Kota Solok. Barubah statusnyo Ibukota Kabupaten Solok manjadi sabuah wilayah pamerintahan baru indak sarato jo pamindahan ibu kota ka lokasi baru. Pado taun 1979 Kabupaten Solok baru mamindahan pusat palayanan pamerintahan dari Kota Solok ka Koto Baru, Kecamatan Kubung, namun secaro yuridis Ibu kota Kabupaten Solok masih tetap di Solok.

Jo dikaluakannyo Undang-undang nomor 22 tahun 1999 tantang Pamarintahan Daerah, pamarintah kabupaten/kota diagiah kawenangan nan nyato jo luas sarato tangguang jawab panuah untuak maatua daerahnyo masiang-masiang. Kabupaten Solok nan katiko itu salueh 7.084,2 Km² punyo kasempatan untuak maatua latak wilayah administrasi pamatinhannyo. Penataan patamo dilakukan pado tahun 1999. Sasudah itu pado tahun 1980, manjadikan kecamatan sabanyak 13 kecamatan induk lalu ditingkatkan manjadi 14 sementaro jumlah desa jo kelurahan masih tetap samo.

Pado tahun 2001 dikarajoan penataan ulang nan sajalan jo sumangek babaliak banagari di Kabupaten Solok. Sabalumnyo ado sabanyak 14 kecamatan, 11 Kantor Perwakilan Kecamatan, 247 desa dan 6 kelurahan, kamudian diubah pado tahun iko manjadi 19 kecamatan, 86 Nagari, dan 520 jorong. Wilayah administrasi iko ditetapkan jo Perda nomor 4 tahun 2001 tantang pamarintahan Nagari jo Perda nomor 5 tahun 2001 tantang Pemetaan dan Pembentukan Kecamatan.

Pado akhia tahun 2003, Kabupaten Solok dipisahkan manjadi duo kabupaten yaitu Kabupaten Solok jo Kabupaten Solok Selatan. Pamekaran iko dilakukan jo dasa Undang-undang Nomor 38 tahun 2003. Dek karano iyu, lueh Kabupaten Solok manjadi 4.594,23 Km². Pamekaran iko badampak ka pangurangan jumlah wilayah administrasi Kabupaten Solok manjadi 14 Kecamatan, 74 Nagari jo 403 Jorong.

Pamarintah Kabupaten Solok mangaluakan Perda Nomor 2 tahun 2009 tantang Penetapan Hari Jadi Kabupaten Solok nan hasianyo adolah tanggal 9 April 1913 ditantuaan sabagai hari lahia nyo Kabupaten Solok. Tanggal 9 April 2010, marupakan patamo kali Kabupaten Solok marayoan hari jadinyo nan ka 97.

Pariwisata

[suntiang | suntiang sumber]

Pariwisata unggulan dari Kabupaten Solok adolah wisata alam. Kabupaten iko mampunyoi limo danau, antaro lain Danau Diateh jo Danau Dibawah, Danau Singkarak, Danau Talang, sarato Danau Tuo. Kudian ado pulo Gunuang Talang nan marupokan gunuang api nan masih aktif dan manjadi tampek tujuan pandakian. Di sakaliliang Gunuang Talang tabantang kaijauan parak teh nan masuak dalam Kecamatan Gunung Talang. Salain gunuang jo danau, ado pulo wisata bukik cando Angin Berembus jo Puncak Gobah di Aripan, Bukik Cinangkiek di Singkarak, Puncak Kanada di Kacang, sarato Puncak Hepi di Guguak Sarai.

Rujuakan

[suntiang | suntiang sumber]
  1. ↑ a b "Pembentukan Daerah-Daerah Otonom di Indonesia s/d Tahun 2014" (PDF). www.otda.kemendagri.go.id. Diarsipkan dari versi asli (PDF) tanggal 12 Juli 2019. Diakses tanggal 6 Desember 2021. 
  2. ↑ a b "Visualisasi Data Kependudukan - Kementerian Dalam Negeri 2021" (Visual). www.dukcapil.kemendagri.go.id. Diakses tanggal 6 Desember 2021. 
  3. ↑ "Perpres No. 10 Tahun 2013". 2013-02-04. Diarsipkan dari versi asli tanggal 2013-02-14. Diakses tanggal 2013-02-15. 
  4. ↑ "Indeks Pembangunan Manusia 2020-2021". www.bps.go.id. Diakses tanggal 6 Desember 2021. 

Pautan lua

[suntiang | suntiang sumber]
Diambiak dari "https://min.wikipedia.org/w/index.php?title=Kabupaten_Solok&oldid=2444469"