Absalon
Dit Woort hett noch annere Bedüden: kiek dorför ünner Absalon (Mehrdüdig Begreep).
Absalon Hvide (* 1128; † 21. März 1201 in Klooster Sorø) weer en däänsch Arzbischop un Staatsmann. He weer de Söhn vun Asser Rig vun Fjenneslev ut dat Slecht Hvide un Inge Eriksdatter. He is tosamen mit sien Broder Esbern Snare un den lateren König Waldemar I. opwussen. He studeer denn an de Universität in Paris.
Dat fröhste, wat hüüt mit en Tietangaav överlevert is (vun Saxo Grammaticus in sien Gesta Danorum), weer dat Bankett 1157 in Roskilde bi König Sweyn, to dat Absalon un ok Prinz Waldemar inladen weren. Sweyn versöök siene Gäst ümtobringen, aver se kunnen utneihn un na Jütland flüchten. Sweyn folg jüm, wörr denn aver in de Slacht vun Grathe Hede slagen, so dat Waldemar to’n König opstigg un Absalon to’n Bischop vun Roskilde möök.
1160 weer Absalon de Anföhrer vun ene Expeditschoon gegen de Wenden in Pommern un op Rügen, de as Freebüter de Oostsee unseker möken un jümmer wedder in Däänmark infüllen. Dat duer bet 1168, dat se de Hööftveste in Arkona op Rügen innahmen harrn. Ok de Hööftstadt Garz kunn he innehmen. Op Rügen lett he twölv Karken inrichten, de heidnischen Wenden to’n Christendom to bekehren. 1170 nehm he ok noch Dievenow op Wollin in.
He bo vele Karken un festig dat Christendom in Däänmark. He organiseer ok de eerste Synood in Däänmark 1167 in Lund.
Bischop vun Roskilde weer he bet 1191 un vun 1178 an as Nafolger vun Eskil de Arzbischop vun’t Bisdom Lund. De 1167 boote Absalons Borg weer de Utgangspunkt för de Stadt Kopenhagen.